久违嘅粤语童谣

陈嫚 职员

　　“落雨大、水浸街，阿哥担柴上街卖，阿嫂出街着花鞋……”上一次听呢首粤语童谣，係两年前广州亚运会之时，虽然自细听住呢啲童谣长大，但係今时今日好似冇咩交集，可能就因为依家听得少，所以有时乍一听到，会非常之触动。

　　报载，网友“炭烧老广”同东山少爷推出《冬大过年》、《行花街》和《落雨大》等一卡一曲故事明信片，用明信片同歌曲相结合嘅形式，来呈现广州特色文化。呢个方式都几有创意，既用童谣唤起大家嘅童年记忆，明信片上嘅漫画又趣致得戚。据说，呢啲明信片仲可以连埋一齐，形成好似《清明上河图》咁嘅卷轴，令人几期待下。

　　粤语童谣朗朗上口，既押韵，音调又好听，我自幼就识背好多，乜嘢《排排坐》、《月光光》、《氹氹转》、《鸡公仔》，冇事就哼哼唧唧。依家，广州人嘅普通话越讲越净，亦吸收咗好多外地文化，对于呢啲白话童谣儿歌嘅接触和传承却少咗好多，就连幼儿园教小朋友唱歌仔，都係教普通话儿歌。好似我个仔，喺幼儿园学嘅全部係普通话儿歌同英文歌。我有个朋友嘅小朋友仲搞笑，阿爸阿妈都讲白话，佢生落来都讲白话，点知上咗幼儿园之后，从此就改讲普通话，再唔讲白话了。

　　虽然普通话要普及，但係粤语童谣、儿歌都算非物质文化遗产，值得大力推广。比如喺电视上嘅广州市公益广告加上呢啲元素，又宣传咗公益内容，都传递了广州特色文化，岂不一举两得？