脚踏车，大名叫自行车，现在好像只有健身个辰光有人派派用场。讲起伊个身世来，大有来头。30年前头，全中国顶顶吃香个代步工具，就是脚踏车。当时大部分青年个工资是三四十元，而一部脚踏车个身价起码是120元左右，告咾啥人家屋里有部脚踏车，老海威个，勿亚于现在买部小汽车。
“文革”结束前后，上海“永久”13型，是人人眼痒个紧俏货，克罗米龙头【把手】锃锃亮，锰钢车架贼骨硬，花鼓筒刹车顶时尚，双铃转起来乓乓响……搿个辰光，28吋锰钢、全链罩、双铃、涨刹、真皮坐垫、克罗米书包架，现在讲起来叫“顶级配置”。搿个车是当年最先进、最新潮个自行车，全国闻名，价钿大约辣180元左右。促掐个是，光有钞票还骑勿上搿部车，还要有购买自行车个票。当时分普通票搭花色票，拿到花色票个人，再好买13型个脚踏车。
当时大部分该【拥有】车子个人，爱护脚踏车就像爱护本人个眼睛一样。每当休息日脚，用一个多钟头揩车子个，大有人在。讲起来侬勿相信，伊自家揩只面孔，最多两三分钟，常常连眼屎也呒没揩清爽。还有交关人自我规定，落雨勿骑。勿是怕自己淋湿脱，是怕脚踏车淋湿脱。还有人，买一眼彩色个塑料带，拿车身（三角架）一圈一圈细仔个绕起来，生怕上下车个辰光，皮鞋拿三角架浪个漆水蹭脱。
还有极其少数个人，会拥有一部机器脚踏两用车。“文革”后期，当时“永久”生产出了一种“轻骑牌”机动脚踏车，大约每辆六七百元。相对而言，搿种车子个稀有威风个程度，远远胜过现在拥有“大奔”告“宝马”。
踏脚踏车个姿势也老有讲究个，有一种“老侠客”，上车个辰光从来勿滑行，双手一捏刹车，左脚踏了踏脚板浪，右脚一偏，甩上坐垫。伊个坐垫放了最低，踏个辰光，两只脚摆成八字形，勿是用脚尖踏，而是用脚掌个中部来踏个。我当时辣拉电台上班，屋里住了控江路，每趟踏脚踏车从乍浦路桥下去个辰光，顶爽了：当时年轻，穿一件茄克衫，敞开衣襟，从桥个中央，沿牢虎丘路“刷”飞速滑行而下，两面衣袂飘飘，好像“大鹏展翅”。为啥寻虎丘路下去，因为呒没公交车通行，比较安全。
脚踏车最靓丽个风景，就是男青年个自行车书包架浪带了一个大姑娘，左转右弯穿街走巷，算得上是上世纪七、八十年代个亮点，一眼也勿输拨现在坐宝马兜风。
据我观察，男女青年谈恋爱，坐了脚踏车浪基本浪有三部曲：第一，叫正襟危坐型。男女青年刚刚认得，女青年坐了脚踏车书报架浪向，一般侪是横坐个（也就是右面个肩胛与踏车子个男青年成直角），一只手紧紧抓牢书包架，面无表情。第二，羞羞答答型。几个月以后，恋爱进行得蛮正常，搿个辰光，姑娘坐了书包架浪搿只右手，勿再是抓牢书包架了，而是抄了男青年个腰里了，面孔浪向略带微笑。第三，如胶似漆型。等到恋爱进行到成熟阶段，坐了书包架浪个姑娘调转身体，搭前头个小伙子成前后一字形，搿个辰光，姑娘张开两只臂膊，成箩筐式个紧紧抱牢男青年个腰里了，笑容里向写满幸福，再也甩勿脱了。
联系客服
