1
新妇:
母啊!婴仔互你顾,
我要出去吃普渡,
会记共伊换尿布,
牌仔无博袂耽误,
闲闲抱伊去散步,
带去公园学行路。
担家:
无咧是你的奴才,
逐项听你咧安排,
恁翁若是做总裁,
老岁煞着据你宰?
看你彼个尖下颚,
趁早去着趁早来
2
新妇:
阮翁若是有才调,
嘛是你生的脚数,
有倘好额尚好料,
老岁呣倘嘴翘翘,
等你袂走搁袂跳,
嘛着靠阮咧关照。
担家:
靠你这个好新妇,
难怪阮是逐项有,
厝里涂脚逐日撸,
手皮磨破有血珠,
田园着做几六区,
未到五十腰龟龟。
3
新妇:
老人若呣讲道理,
囝孙会去冤枉死,
你有拼扫擦桌椅,
我嘛三顿照直煮,
油盐酱醋鱼肉米,
全部是我咧排比。
担家:
你的功劳咔大天,
阮的辛苦全押边,
你敖你勥你后生,
当阮老岁老妖精,
看你彼个面青青,
苦阮呣去跌落坑。
4
新妇:
老岁你哪说这话?
声声句句咧相怪,
无人逼你去做活,
只是婴仔还搁细,
叫你看顾暂代替,
你哪闲话这呢多?
担家:
阮咧做活呣捌咳,
厝边头尾逐个知,
无代无志惦厝内,
淡薄闲话就不该?
悲哀悲哀真悲哀,
互你当作老痴呆。
联系客服