说慢就慢,说快就快。小倌唔荡观前,弗象师母小姐笃格场,一爿店一爿店格慢氽氽细摸细相。再讲,年初头浪,观前街开门做生意格勿多,弗象现在格种商场一年到头想出刮搭弄啥"促销",独想抢人家袋袋里铜钿,天吃星样子。目今攀谈,要搭世界"接轨"。格歇辰光过年,倒搭西洋人过圣诞差不多,放假日脚,大小店铺统统关门,大家侪转去过年团圆守岁。大小年夜做脱,关门打烊歇年,早点到初五接仔路头菩萨开张,晏点要过仔正月半闹过元宵。年初头浪,只有几爿南北货茶食糖果之类格店铺开几块塞板门,摆只柜台,卖点要出客跑亲眷格朋友,添几色上门盘浪用格末市,譬如,桂园枣子桔红糕麻酥糖......侪是现成大红照牌纸斗方扎好,一拎就走。沿街倒是做小生意格闹猛,过仔初三,就肩挑手托出来赚外快哉。
本站仅提供存储服务,所有内容均由用户发布,如发现有害或侵权内容,请
点击举报。