上海话里的“挨”字有点好白相，讲侪会得讲，但很可能自家也弗晓得用的是“挨”字。
而且，“挨”字在上海话里至少有三个读音，曰“阿”，曰“外”，曰“嘎”。
先说读作“阿”的“挨”。
排队这桩事体，处处用到“挨”。
“大家'挨一挨二’排好，弗要乱。”
“挨一挨二”，老早又叫“挨顺”、“挨次”。
“倷嗰队到底哪能排法？”“挨顺呀！”“挨次呀”。今已绝迹。
但是不排队，想插队也叫“挨”。
“侬弗到后头去排队，硬劲从当中挨进来做啥。”
老早排队往往很不堪，前胸贴后背，不管男女，无论亲疏。
总有人觉得不适意，说不定就被人来一句:“挨得吤拢（紧）做啥啦，又弗是轧姘头。”
与排队搭界的还有呢。
轮得上叫“挨得着”，轮不上叫“挨弗着”或“挨弗该”。另外，大哥不带侬白相，也叫“挨弗该”。
如：“介长个队伍，挨到年夜头也挨弗着我。”
或：“我前头没几个人了，我挨得着个。”
同样与排队沾边的，排排坐也叫“肩胛挨牢肩胛坐了一道。”
勾肩搭背，老早也叫“挨肩擦背”，其实也是“肩胛挨牢肩胛”。
再来讲读“外”的“挨”。
则有忍受、拖延、勉为其难、赖皮等意思。
如：“只老头子身体来得嗰好唻，侬嫁畀伊，看相伊房子，再挨嗰十年八年，伊也死弗忒。”
又：“叫伊付房钿，伊弗挨到月底弗会付个。”
再：“叫侬早点去睏么，侬总归挨法挨法。”
还有，“今朝嗰便宜货老早买光了，侬还挨了此地啥事体啊？”
另外，自家送上门去，老底子也讲“挨上门去”。
也就是“挜上门去”。
问人开口借钞票，何其太难。所以，“倷娘舅我，只好挨仔只老面皮去借借看了。”
家里人还不看好，讲”侬挨破面皮也借不着嗰”。
最后唻讲讲读“嘎”的“挨”。
“挨”，也有挤（轧）的意思。
“挨进去”就是“挤进去”，“挨得进去嗰”就是“轧得进去嗰”，“挨勒前八尺”就是轧到队伍最前头。
蹭饭叫“挨”。
“阿拉又没叫侬来咾，侬硬劲挨了里向啥体啊。”
蹭痒也叫“挨”。老早直接就讲“挨痒”。
“背脊骨痒煞了，爪也爪弗着，只好墙壁上挨挨伊。”
据说旧时拉琴也叫“挨琴”。
“伊只二胡挨得来像隔壁张木匠勒锯（亦音嘎）木头。”
托朋友办事体，问起某某人认得否啊？
答：认是认得嗰，不过，赛过“背脊骨上胡琴，挨伊弗着呀”。指关系搭不够也挨不上。
所以，“茄山河”、“嘎讪胡”，虽说都是英文“gossip”的记音，怎么记都可以，会不会也可以记成“挨三胡”呢？
联系客服
