【ꁱꇐ】ꋍꊭꑊꆴ

ꋍꊭꑊꆴ

ꋍꊭꑊꆴ 来自syplu 04:25

2001ꈎꆿꆪꄮꇬ,ꀉꑌꈎꃅꐻꅸꇁꀐꌠꁧꑭꁡꇤꆹꈨꑭꏁꌬꀕꑠꄲꇫꑟꇁ，ꄚꁧꑭꁡꇤꑘꃅꊿꈧꌠꆹꉌꂵꇿꃅꀋꐛ,ꄷꀋꁧꏁꍿꆿꃀꋍꂷꇁꁧꑭꁡꇤꃹꏭꀋꋌꃅ,ꊨꏦꀉꑳꈧꌠꌌꉱꈐꂁꌠꂁ，ꇣꁁꂁꌠꂁꃅꇬꊎꄉꌐ．

ꑊꁱꀊꃏ,ꀂꏾꀋꎴꇈꑊꌒꌠꇁꂷꂘꃀꆹꏨꆉꃬꑿꇁꌠꌟꃅ,ꋍꁯꅍꋍꂷ,ꋍꁯꅍꑍꂷꃅꀉꑳꈧꌠꋌꇱꇴꌊꑳꁥꀉꆹꍇꌠꇂꃴꄉꂘꃚꌶꃚꎓꃅꇬꊎꄉ，ꄚꀉꑳꀉꂿꀉꄉꈧꌠꆹꉬꇮꃅꐮꇯꂵꆧꑘꁨꅉꇬ，ꇿꃀꂱꒀꂷꇭꇂꃴꄉꌤꋌꐘꌌꐮꇐꐮꄟ,ꎥꃪꐺꌐ，ꀉꍆꍻꃅꍻ，ꁯꎓꂿꃅꂿ,ꈀꄸꄹꇬꑌ，ꀉꆨꅑꅸꀋꃅꑟꇬ,ꀉꁌꀋꁧꆹꀊꄙꊰꉐꈎ,ꊰꉐꃘꊰꈎꃅꑌꉫꎆꆫꋠꅷꇁ，ꇤꉫꈾꏿꋠꅷꇁ，ꀉꑳꌌꄉꆫꃅꂿꏿꌷꑲꆀꈜꁮꇁꌠꄸ，ꁱꂷꌷꌠꆹꌺꇖꊫꂫꀋꉬ，ꁱꂷꌌꄉꋚꃅꋠꀋꉆꄷꉉꌐ，ꄚꋍꆣꉪꇬꑌꋀꑠꃅꉪꌠꆹꅑꀋꀵꌠ，ꀉꁌꀋꁧꆹꁱꂷꑴꂷꌷꋺꂷꀋꐥ，ꁡꇤꑷꋦꇖꊰꎖꁭꌠꐭꌶꅉꄯꒉꁱꂷꌷꋺꌠꋍꂷꑍꂷꀉꄂꐥ，ꒉꌶꅉꇬꌶꋺꌠꆹꂯꀋꐥꀐꇬ,ꌷꅷꐧꌷꅉꑟꋺꌠꑌꋍꂷꂯꆏꀋꐥꌠ.

ꀉꋨꄮꇬ，ꁧꑟꁡꇤꆹꐕꍯꈝꃀꑌꇬꄻꀋꄉꌦ，ꄆꄑꂷꇭꑌꇬꀋꄔꑳꌦ，ꄚꇁꂷꂘꃀꆹꑞꑌꋌꇬꀋꑴꃅ，ꄓꆹꃬꀮꐊꄉꄓ，ꌊꆹꆪꌺꐊꄉꈻ，ꃅꄜꉈꐎꃯꁧꒊꑌꈜꈼꄷꀋꄹ，ꂵꆧꈨꑭꃆꄔꐝꑌꊷꇨꄷꀋꄹ,ꉐꐙꆈꑰꀕꇈꑘꄃꑭꁭꂫꑌꋌꀋꇻ，ꋋꆹꋍꑍꋑꀋꋒꀋꎪꏡꃅꋌꇁꌊꁧꑭꁡꇤꉜꄉꆹꇬꎷ，ꋍꁯꅍꇈꋍꁯꅍꃅ,ꀋꊌꌦꃅꎹ,ꀋꇁꌦꃅꇴ,ꀋꇊꆏꉷꃅꋚꂟꋍꂷꀋꇊꌡ.ꏦꒊꏦꇁꈩ,ꉜꅉꉜꅉꆏꄇꈬꆻꄧꃭꊭꆗꌠꑌꀋꇊꌡ，ꊿꃅꋋꉨꀋꐛꌐ,ꄷꀋꁧꊿꈌꀋꀙꍸꑠꆹꇫꊂꇁꂷꀉꑳꃼꀐꏢꀋꇉꃅꉉꌠꑌꐥ,ꄚꀉꉗꀋꐛꃅꁧꑭꁡꇤꑘꃅꃰꊿꉪꐨꆹꇁꂷꂘꃀꌌꄉꀑꐈꑊꆴꀐ，ꌷꑳꀉꐡꈐꇬꌶꌺꑌꏓꅉꇱꅉꃅꑍꂷꌕꑻꇬꄉꏓꅷꑍꊏꎖꑺꐛꀐ，ꇁꂷꂘꃀꑊꑍꑌꏎꄫꀕꌠꇬꄉꐈꇁꒊꇐꀕꃅꐙ．

ꋌꊂꈭꐨꆏ，ꉪꁧꑭꁡꇤꊿꈧꌠꆹ，ꀋꃅꀋꑽꈁꌒꄉ，ꀋꋠꀋꅝꈁꌒꄉꃅꀉꑳꋍꂷꑳꀋꑌꃅꎭꌊꌶꅉꇬꄯꒉꁱꂷꌷꁧꌐꀐ，ꀉꑌꌠꆏꏃꌊꑣꐭꌶꅉꇬꌷꄉꌐ，ꀋꒄꀉꄿꑶꌠꆏ，ꀋꃀꀉꄂꀁꇬꄉꑘꃅꋚꑣꇈ，ꀋꁧꆏꀉꑳꌕꑻꌠꏃꌊꑤꊿꋅꐭꌶꅉꇬꁱꂷꌷꄉ，ꀉꑳꈧꌠꑌꁱꂷꀋꌧꌠꀋꐊ，ꌕꑻꐯꇯꋍꂷꀏꀋꊰ,ꋍꂷꄪꀋꅐ,ꄷꀋꁧꌶꅉꇬꌕꏯꉾꌠꌶꌺꈁꁠꊌꇫꎷ，ꁧꑭꁡꇤꊿꈧꌠꑌꉬꇮꃅꇫꊂꍖꀮꌐꀋꉆ，ꋀꏤꆹꀉꑳꎁꃅꎭꏿꅦꈯꇬꑌꎬꁌꁨꀐꄷꉉꌠꑌꐊ，ꋍꂷꊯꑻꁌꌠꉬꀐꄷꉉꌠꑌꐥ.

ꀉꉗꀋꐛꃅꁧꑭꁡꇤꊿꈧꌠꆹꉬꇮꃅꀋꒄꀉꄿꄰꌷꄉ，ꀉꑳꈧꌠꎭꌊꈜꎴꃅꄷꌶꑳꉽꅉꉜꄉꌷꁧꌐꀐ．ꁧꑭꁡꇤꑘꃅꊿꉪꐨꆹꋍꊭꇈꋍꊭꃅꐛꐈꀐ．

本站仅提供存储服务，所有内容均由用户发布，如发现有害或侵权内容，请点击举报。