美金融機構拋售證券或催化熊三
五窮六絕已完成,7月能否翻身?由於道指及滬深三百上半年低位失守,恒指能否守住3月18日20572.92十分關鍵。上半年股市仲有貝南奇幫手(一再減息),下半年股市唯有靠自己。畢非德認為,美國將出現滯脹(stagflation);我老曹更悲觀,擔心美國進入通縮性衰退(類似日式經濟。高盛主席布蘭克菲恩則幾樂觀,最近收購SIV組合,認為股市快將見底,並認為美國衰退壓力好快會令商品價格回落。高盛係呢次次按危機中少數贏家之一,其言論值得思考。穆廸計劃將大摩評級降低,高盛估計花旗及美林須進一步撥備;加上MBIA情況幾令人擔心,該公司需要進一步拋售證券去集資,會否引發道指加快進入熊市三期?木宰羊。長痛不如短痛,有時痛痛快快地大跌一次,較日本股市分十三年下跌更好。
1980年雪茄伏已搵到控制通脹率上升之法,就係將利率長期維持响CPI升幅2厘以上。2001年「九.一一慘劇」後,格蛇為阻止衰退响美國出現而瘋狂減息,結果將通脹率呢隻猛獸再放出來。2004至07年初美元利率已由1厘重上5.25厘,本來可重新控制通脹率,受次按危機影響,美元利率又降至2厘,依家美國CPI係4%,又點可以控制未來通脹率?密歇根大學估計,明年美國CPI升幅將超過5%,理論上美國需要超過7厘息才能重新控制CPI升幅,會出現咩?為阻止美國樓價大幅回落,美國只有長期維持負利率(即利率低於CPI升幅)。
中國情況亦接近。過去為抗拒人民幣升值、中國利率長期低於CPI升幅,造成過去內地股樓狂升。近期CPI升幅有機會出現雙位數,先至緊張起嚟。今天中國政府欲重新控制CPI升幅,便一如1981至82年美國,必須付出衰退作代價。換言之,美國同中國如要重新控制通脹率,皆必須大幅加息。但上述行為政治唔正確,因此唔知點算好。
中國三頭馬車速度放緩
中國GDP經過八年高增長後,增長高峰相信响舊年出現,今年起逐步回落,本來好正常。今年首五個月出口增長率22.9%,較去年同期減少4.9個百分點;貿易盈餘減少8.6%。第一季GDP升10.6%,亦較去年同期減少1.1個百分點。各種各樣嘅壓力不斷增大,內地企業日子愈來愈唔好過。過去三頭馬車拉動中國經濟,正面對奔跑速度放緩,因為世界經濟狀況對中國出口前景好不利。股市、樓價回落,對消費前景亦不利。只餘下基建方面投資,今年首五個月仍較去年同期升25.6%,只回落0.3個百分點(但考慮到CPI升幅8%,即投資亦在回落中)。
日資頻收購風水輪流轉
中國股票投資者過去從未考慮過經濟降溫嘅問題,令90%以上內地投資者响過去八個月被套住,動彈不得。人行為阻止CPI進一步上升,下半年貨幣政策必須從緊,但中國CPI升幅唔可能响下半年回落到4.8%嘅人行目標位。中國投資者點樣度過呢段金融政策從緊期?下半年高油價及高糧食價格將喺內地CPI內顯示出來(依家內地汽油價格只及外國40%、米價只及泰國三分一),你說怎麼辦?
中國正面對類似七十年代美國嘅情況,即工資與物價互相追逐。美國卻冇人因油價大升而獲加薪(甚至運油工人)。油價上升令股市、樓價下跌,情況類似九十年代日本,出現信貸收縮而引發衰退。
大摩研究所得,依家差唔多所有國家都實施負利率(利率低於CPI升幅),家吓已有超過五十個國家(代表三十億人口)面對雙位數字通脹率。2002年美國政府實施負利率,令2003年道指上升,美國重返經濟繁榮期。因2002年嘅負利率引發美國信貸膨脹,但依家負利率卻令信貸收縮,因數以萬億美元嘅價值從樓市及股市消失。金融資產收縮,最終可引致美國消費減少,令美國明年CPI升幅少於2%,進入日式衰退。反之,中國通脹可引致工資上升,工資上升可產生新需求,轉過來又推高物價。响過程中,企業純利則走下坡而令股價回落(估計內地樓價跌幅有限,因為新需求不斷產生)。
1990年全球十大銀行中,有七間係日本嘅;响日經平均指數下跌及日本樓價下沉後,透過合併形成三大,到今年才叫恢復過來。2003年美林曾投資10億美元協助UFJ處理呆壞賬,高盛投資13億美元協助三井住友金融集團。今年日本最大銀行東京三菱計劃投資海外大金融機構,今年1月瑞穗金融集團亦向美林投資12億美元,6月25日三井住友金融集團投資5億英鎊响英國栢克萊銀行。日本家庭擁有15萬億美元金融資產,超過一半係銀行存款(接近冇利息),日本銀行正好利用機會收購海外金融機構,一如2003年外資入股日本金融機構道理一樣。世界真係風水輪流轉。
有知識產權才有首富蓋茨
蓋茨三十三年前創立微軟,出售佢嘅MS╱DOS(年紀大一D嘅讀者,相信都用過佢所編寫嘅DOS去操作個人電腦)。蓋茨最成功嘅地方係預見個人電腦好快取代IBM所提供嘅巨無霸式電腦,亦預見電腦硬件愈來愈唔值錢,將可以令到每個家庭都擁有一部……。但當年佢所編寫嘅DOS,卻充滿bugs及crashes,居然可以游說到當年仲係巨無霸嘅IBM响發展個人電腦業務時,將佢嘅DOS預先安裝喺IBM個人電腦硬件內。如此一來,任何人購買IBM嘅個人電腦硬件,便同時接受埋微軟操作系統(DOS),令其他操作系統較少人用。透過IBM個人電腦市場令微軟嘅DOS成為編寫電腦軟件主流。反觀今天IBM已將個人電腦業務出售畀聯想(992)。由此可見,遠見如何重要!
蓋茨响哈佛大學讀書時,極受哈佛教授克里斯坦森(Clayton Christensen)影響。佢認為,一項科技要成功必須便宜,令人人可用;必須靈活,因此人人都可應用嚟做其他工作;必須易用,因此人人都願用。佢嘅DOS未符合上述要求。蓋茨另一成功點係用一個商人嘅角度去考慮重新編寫自己嘅DOS,而非由一個電腦程式編寫員。當蓋茨推出視窗(Windows)後,奠定咗微軟响軟件界嘅地位!視窗完全符合便宜、靈活及易用三大要求,令蓋茨成為全球首富。
蓋茨成功其實同洛克菲勒一樣(因發明石油新嘅提煉法,令汽油安全、唔再容易爆炸而銷量大增);又或福特發明嘅流水作業法,每一工人只生產汽車其中一小部分而非整架車,令汽車生產成本大降。
點解上述事件只响美國發生,而唔喺中國出現?理由係美國才擁有知識產權法,佢保護咗洛克菲勒嘅發明,別人不得抄襲佢嘅方法,而令標準石油公司迅速壟斷全球煉油業。知識產權法同樣保護福特汽車廠嘅流水作業方式,令福特一度成為全球最大汽車公司(通用汽車只由多間汽車公司合併而成);並保護咗微軟嘅視窗,成為全球大部分個人電腦嘅操作系統。佢地嘅成功,亦鼓勵咗其他美國人去思考、發明,因此我地有雅虎、Google、Facebook、YouTube……。中國人社會卻抄襲成風,响咁環境下,誰去思考、誰去發明?咁樣嘅意識形態,可令中國由工業社會走向知識產權型社會咩?環顧整個東南亞及拉丁美洲經濟,發展到某一水平便不能更上一層樓,理由就係佢地嘅政府並唔保護知識產權!
联系客服