最近广东人都好忙,“天鸽”前脚走,“帕卡”又准备嚟,乜台风依家都搞买一送一促销活动?买一只鸽送一条鱼?
**台风“帕卡”一名由老挝提供,“帕卡”系生长于湄公河下游嘅一种淡水鱼。
每年夏秋,广东人都会同台风有六七八九十个约会,有时候仲两三个台风一齐过嚟帮衬,乜大风大浪我哋都见过!
台风同广东微妙嘅缘分,你又知道几多?
台风或源于粤语
'台风'一词,系英文单词“Typhoon”嘅中文音译,而“Typhoon”嘅来源,就众说纷纭啦。
有人话佢来源于阿拉伯语tufan,亦有人话佢来源于希腊语巨风之神typhon,语义为暴风。
而都有人指出,“Typhoon”嘅音节与粤语极其相似,有可能系源于粤语嘅“大风”或“打风”嘅谐音。
广东系我国最早接触外来文化嘅地方,粤语文化输出成为英文单词都时有发生,比如wonton(云吞),所以“Typhoon”源于粤语并非冇可能。
不过语言发展过程漫长且复杂,以上几个说法谁是谁非暂时未有结论。
广东曾经有咩妖风?
广东系一个打风当食饭嘅省份,依家有台风到,天气部门提前四五日左右就预报,我哋查下手机就知道未来嘅天气。
而以前科技唔发达,预测台风并非非常准确,所以以前广东曾经刮过唔少“妖风”。
比如1968年6811号台风WENDY,本来雷达一直探测到台风往粤东方向移动,但喺登陆前一日,佢突然消失于珠三角所有雷达中。
直到台风即将登陆雷州半岛,先被湛江雷达监测到,此时距离登陆已经唔到20小时,各部门唯有紧急采取防风措施,最后依然带嚟好多损失,当时有人将此中途消失嘅台风称为“龙风”。
怪异嘅仲有1986年嘅台风韦恩,佢嘅运动轨迹堪称九曲十八弯,毫无规律可言,被认为系台风界“怪胎”之首。
▲轨迹:南海北部生成→逆时针绕圈→靠近广东→突然转弯到台湾→穿越台湾回太平洋→掉头返南海→顺、逆时针各绕一圈→加速登陆雷州本岛→穿过北部湾消散
韦恩系历史上稀有嘅台风,因为佢生命周期长达20日,简直系台风界嘅长寿老人,20日之内又先后经历两次风力加强同减弱、三次登陆同180°转向、四次盘旋、五次路径改向。
用一句话形容台风韦恩,佢简直就系一个发癫失控嘅醉酒佬。
妖风为何吹妖都唔涨?
各位自己友应该仲记得旧年“台风四诈糊”事件吧!
7月尾,台风妮妲临近广州,突然粒声唔出拐去粤西!
9月,超强台风莫兰蒂话会影响中秋赏月,跟住一个屈尾十,直接转弯踩油过厦门!
10月初嘅台风艾利,同样无视广州,完美避开珠三角,直奔粤西!
10月尾,双台风要登陆广东,仲未反应过嚟,双双私奔走佬,望都唔望广州一眼!
虽然台风经常帮衬广东地区,但历史上曾经为广东带来严重影响嘅台风,点解对广州影响就轻好多?有啲台风甚至仲兜路行?
网上解释有几种:
1.同深圳、香港、汕尾等城市相比,广州更靠近内陆,唔系最直接嘅台风登陆地带,热带气旋靠近内陆后通常会逐渐减弱
2.广州地区地势比较平坦,周边山脉多,风场与粗糙山脉地形产生嘅摩擦力大于平坦地形,喺摩擦力作用下,台风就会自然向东或西偏转,避开广州
3.广州离海边有两三百公里,台风移动路上遇到好多高大建筑,增大对风嘅摩擦阻力,风嘅方向就会偏离,而且风力亦会逐渐减弱。
▲话唔埋系珠江新城啲高楼大厦救咗我哋
4.广州受副热带高压控制较强,而台风一般会沿副热带高压嘅南边横扫过去,唔会直捣副热带高压范围,所以就有好多台风同广州擦肩而过。
比起四种科学解释,有时候我都会更愿意相信系广州风水好!
香港永远只有8号风球?
经常睇TVB嘅人有冇觉得,香港打风次次都系挂8号风球?从来冇听过四五六七号风球?
100年前开始,香港就用数字信号表达风暴情况,最初的确有1-10号风球。
▲1-3号有表示烈风或暴风有登陆香港的可能性,4号表示非香港登陆,5号-8号风球表示不同方向的暴风或烈风即将登陆香港,9号表示风力增强,10号表示飓风吹袭香港
后来为简化表达,就删除咗时有时无嘅2、3、4号信号,将5-8号风球信号同时归为8号信号,只保留1、3、8、9、10五个信号。
香港挂8号风球,就系表达台风即将登陆香港,香港劳工守则有规定:一旦悬挂8号风球以上,打工者就毋须返工。
所以你就知道点解每次打风落雨,都会有城哥嘅表情包——
台风“帕卡”准备登陆,大家出入都系注意安全,虽然我觉得你哋冇咁容易畀风吹走!
最后,关于台风同广东嘅缘分
你有冇咩故事?
我哋会从留言嘅自己友抽三个送惊喜!
素材出自维基百科、广州文史
羊城网负责整理编辑
联系客服