沪语朗读：丁迪蒙
朗读者
我个大学（上）
作者：李白坚
改编、朗读：丁迪蒙
1979年2月，我搿个30岁个大男人，作为扩大招生而录取个大学生，走进了上海一所大学中文系读本科。
中文系班级勿小。老、中、青一共有92个人！各占大约摸三分之一。年龄要相差13岁！“老头子”已经胡子拉渣，“老太婆”也生儿育女，而小同学个嘴唇皮浪，还只有一眼眼茸毛毛。
夜里向自修个辰光，“老烟枪”会得三五成群跑出校门，躲到隔壁弄堂个过街楼下头去过过念头，小同学则是打打闹闹、嘻嘻哈哈。“吵煞脱了！”勿晓得阿里个勒“老太婆”喊。马上，教室里像煞关脱了麦克风开关，鸦雀无声。
阿拉个老师侪是邪气有名个大人物，勒勒我个脑海里，伊拉个趣闻轶事，直到现在还清晰个留存勒海。
赵景琛先生讲个是中国戏剧发展简史，老人家讲发讲发，会得从袋袋里向拿出块白绢头，有点像帕瓦罗蒂唱歌辰光用个，用兰花节头捏勒海，甩记甩记，扭发扭发，唱起来了。老顽童个天真搭仔执着，博学与敬业，让我伲搿眼三十岁就自认为老了、没出息了个学生仔，邪气惭愧。
当年，正好勒放日本电影《追捕》。大概是高仓健演个杜丘忒深入人心，连苏轼研究大家王水照先生也受到极大个影响。勒讲唐代诗歌搿一章辰光，先生脱口讲：“唐代诗圣杜丘个‘三吏三别……”话音还没落下来，全班就发出了从来也没过个笑声。先生有眼尴尬，伊扶了扶眼镜，勿动声色，继续讲课。
当讲到杜甫个艺术风格时，又冒出了一句：“浪漫主义风格个杜丘……”搿辰光，连伊自家也熬勿牢大笑起来了。
刘季高先生开选修课“《诗经》研究”，听说刘先生来，我伲老早就拿教室打扫清爽，讲台搬开，从办公室借了把靠背椅子摆勒教室个台脚浪，旁边一只方凳子，摆了一碗泡好个浓茶。
上课了，先生细细品味阿拉准备个香茗，阿拉也就细细品味刘先生同样是邪气香醇个诗经了。先生从来勿带书上课，诗三百，侪勒先生个肚皮里向。先生讲课声音老低沉个，细细密密，像煞是春雨，淅淅沥沥。讲到得意个辰光，伊还要轻轻个哼唱，简直就是一种浑然无我个至高境界，听发听发，伊个苍老个吟诵，赛过拿阿拉带到了几千年前具有同样情怀个古人面前，情调优雅、感情直白，搿啥地方是勒勒上诗经课，分明是接受音乐个熏陶嘛！
李平先生讲个是“中国文学史”。先生湖南人，带有浓厚个湖南腔调，伊邪气幽默个，上课辰光，总归是笑声勿断。有趟伊讲杂剧当中个一个人物：“搿个女人姓“贾”，叫“若真”——也就是“假如我是真的”！一记头大家侪笑起来了，因为阿拉刚刚看过话剧，名字就就叫“假如我是真的”。
读书四年，最最让我伲兴奋个事体，是请有名个演员、艺术家、文学家到班级来开讲座了。
翁世荣先生是研究电影搭仔戏剧个，因此，有交关电影戏剧界个人脉。有一个下半日，听讲有位大人物要来，但勿晓得是啥人。
阿拉提早下课——上课老师怕耽误讲演，破天荒地早早收场——全班同学邪气开心个勒黑板前头摆了一排课桌。课桌浪向还铺了勿晓得从啥地方弄来个白颜色台布，上头有麦克风，还有清一色有盖头个茶杯，教室里像煞成了会场。
只听得走廊浪传来一阵低低个欢呼声，一个中等个子、六十左右个男子汉昂首阔步走了进来，大家一看，侪轻轻个叫起来：“啊！许云峰！”“哈！林则徐！”“是聂耳！”——是个呀，伊是赵丹！
赵丹入坐以后，一次次个拿下来眼镜，朝镜片朗向哈气，眯一只眼睛，用另外只眼睛透过镜片，像探照灯一样勒朝下头个学生左右扫射，腔调邪记撩拨，弄得来阿拉搿眼年轻人勿断偷笑，马上就喜欢搿个电影王子来了！
他讲了交关有关电影艺术搭仔话剧艺术个关系，比方，话剧演员演电影，最大个问题是，话剧平时动作比较夸张，要拍电影特写镜头了，就特别个别扭。
上海昆剧名丑刘异龙也来过，还表演了特别有名个《下山》当中头颈甩佛珠个特技，获得了满堂彩！他讲，演戏必须有精、气、神，走到舞台“九龙口”（舞台正中地位），一亮相，就必须拿全场捉牢！一面讲，他一面勒勒轧满人个教室前台走了个圆场，到“九龙口”一立，目光如炷，咄咄逼人！
呵呵！舞台演员身段神情个奥妙，原来就勒搿搭啊！
精彩回顾：
图片来自网络
联系客服
