白相大世界
桂林西街居民 高汉良
小辰光，阿拉就住勒老西门旁边，离大世界邪气近。常常搭仔弄堂里几个“赤膊兄弟”一道去人民大道踢球，踢好球特为跑到大世界门口，往里厢瞄瞄，唉！门票价钿蛮鬼，只好悄悄离开。
过新年个辰光，弄到点压岁钿。乃末心又活起来，搭隔壁的关云、还有后弄堂阿三头一商量，决定豁上，白相大世界去！
搿天，开心得勿得了，规定十二点开门，阿拉十一点就等伊开门。一进去就拨勒里向个“哈哈镜”迷佬了。三噶头横看竖看，侬笑我，我笑侬，一息息变成“长脚锣絲”；一息息变成“矮冬瓜”。搿辰光阿三头象只“大头小妖怪”；关云个“腰”是粗得来吓人；我一看自噶，哈哈！变成浪衣裳个“竹竿”唻！
大世界个“好戏”勒后头。看好哈哈镜兴匆匆往里向走，露天广场浪向杂技和魔术刚刚开始，俩个小丑勒台浪跌来倒去，阿三勒我耳朵边浪讲“侬看呀，伊拉跌跤是装出来个！”关云佩服得五体投地：“拿看，伊高台踢碗老鬼伐？”
不觉一个多钟头过去，阿三提醒大家：“憨勿啦，一直看迭个，辰光呒没唻。”“对，快点调枪头！”露天广场两边有扇型大理石雕栏，“楼梯”像九曲桥，佬漂亮个。三噶头急煞勿西朝楼上跑。
啊唷，上头个“剧场”哪能介多啦！走到阿里，阿里闹猛。搿搭勒演沪剧“罗汉钱”；伊面勒演京剧“四郎探母”；再奔到三楼，场子更加多，东面演越剧“追鱼”；西面演江北戏“年青的一代”；还有评弹说书“啼笑姻缘”和宁波滩簧“半把剪刀”等，嗄西多好戏到底看啥？后来决定看滑?“三毛学生意”，又是笑得阿拉前俯后仰。
辰光过得真快，等到从滑稽戏场子出来已经夜快头，白相大世界才“方兴未艾”呢！
肚皮饿了，辣大世界吃夜饭。只见眼前灯火通明，热气腾腾，香飘四溢 ，花头交关多，各式抄菜告仔盖交饭，排骨年糕、油豆腐细粉佬啥，还有鲜桔水、冰镇酸梅汤、沙士水、紫雪糕、大冰砖等等，阿拉一人来了一客盖交饭，味道是勿淡来，浇头浪向有：油面筋、黄芽菜和肉絲，香得呒没闲活讲，一个字：赞！二个字：老赞！三个字：交关赞！
吃好夜饭跑到屋顶花园白相，登高望远，看到24层楼国际饭店霓虹闪闪；南京路上车流不断；屋顶花园还有有奖猜迷、套圈圈、电动游戏等。阿三头也真是，伊鲜格格去白相“电动拉力”，武松身浪向个灯只亮到腰浪向，勿来事！勿来事！
天一眼眼暗下来，阿三头、关云和我游兴正浓。勿晓得啥人提议去看电影，众人响应。赶到电影场子，放个是“山间铃响马帮来”。一场看好，又听讲接下去要放反特片“神秘的旅伴”，关云讲：索性再看一场，奈老本看出来。阿三马上响应，我一听反特片，屁股也老早驽勿动了。
连劳看仔两只电影已经11点多，大世界真个要散场了。从中浪白相到搿息，整整十几个钟头，三噶头还不舍得离开，奔上跑下真个叫“流连忘返”啊！大世界象只万花筒样样有！难怪人家讲：大世界是上海个一只窗口，外地人到上海呒没白相大世界，等于呒没到过上海滩。
深夜11点半了，大世界边门开，游兴未尽的老少玩客涌出大门，向各条马路散去，慢慢地消失在夜幕里……
联系客服
