爱唱山歌唔怕羞
(鬼话山歌)
作词:余而立
1
爱唱山歌唔怕羞,新编山歌唱风流。
条条唱出哥心事,首首唱出解妹忧。
2
新买排插排对排,你系用哩租畀涯。
还早就话你爱用,用后涯会同你买。
3
买只插头两脚尖,爱用之时莫咁蛮。
到时莫话佢唔得,面鳌面会谁也难。
4
新买手机四四方,阿妹话机系原装。
原装水货莫介带,唔用也会沤拖箱。
5
新买手机爱装卡,手拿卡号插紧下。
插紧就来打电话,阿妹接到开心花。
6
阿妹买部新手机,爱租爱借由得你。
肯借畀涯拔两下,冇租也爱讲涯知。
7
阿妹买部新手机,阿哥爱用租畀你。
你系合适拿去用,钱多钱少冇问题。
8
微信支付打圈圈,卡紧爱用喊王天。
卡得久来肚火起,唔想骂来也想哼。
9
如今手机真稀奇,爱存爱取由得你。
爱支一百就一百,你爱定期就定期。
10
微信转帐唔使卡,快捷方便二维码。
今晡你若爱支出,滴嘟一下就到啦。
11
买只锅头两面乌,唔输涯个拖煤夫。
昨晡同佢洗一摆,到今锅下还帝乌。
12
新买锅头光秃秃,一面凹来一面凸。
手拿锅铲来炒菜,尽话施展新妙术。
13
胡椒磨子圆叮咚,手上握紧像电筒。
涯爱用时扭两下,看你胡椒容唔容。
14
买支东西三寸长,棍子细细放中央。
软个大来硬个细,舔得两下令荡光。
15
半山石头圆叮当,阿哥上山去放羊。
小羊田边来吃草,看佢舔下又舔上。
16
两只柚子圆叮咚,半斤八两般般重。
左右两只同样大,比来比去冇唔同。
17
半山割地墓门开,七月十五鬼出来。
手拿镰刀来割草,割完同你烧纸灰。
18
阿哥陪妹上山岗,行到半山来开荒。
开好山岗种柚树,种冇两下话柚秧。
19
妹拿脚头上山岗,阿哥同妹去开荒。
种哩杨桃种橄榄,到时又话租柚秧。
20
如今后生系懒尸,每摆爱钱讲透支。
支到一百话唔够,咁样支付冇药医。
21
抵只妹子系齐斜,讲转讲去唔春车。
还早就话租涯用,过后又话唔着华。
22
客家山歌歌传情,双关比喻有拟人。
夸张借代用排比,临场还可唱即兴。
联系客服