老早邻居称呼多

文/侯宝良

小区里新开了“邻里中心”活动室，勿少邻居碰辣一道就是面熟陌生，勿晓得用啥称呼好？侪老尴尬嗰。搿倒是让我想起老房子里邻舍道里个称呼。

讲到老早点个邻舍关系，只要住过老房子搭仔老弄堂个人侪勿会忘记脱嗰。埃歇辰光，假使有陌生人来弄堂里寻人，只要讲起大概相貌或者工作单位，邻舍道里侪会帮伊指路。

现在住辣新公房、商品房里，勿管是房子面积，还是生活配套，侪是相当勿错，勿过邻里之间个关系就远了，通常大门一关，互相勿搭界。即使晓得对方住个房间号头，但是对方姓啥叫啥一般是勿晓得嗰，所以互相称呼起来就比较麻烦了，假使用301阿姨、402老伯来称呼，总感觉邪气别扭，结果就是就算辣电梯里、楼梯浪碰着，也就是感觉面熟陌生，互相点点头，笑一笑，就算打过招呼了。

由此想起老早子一栋楼房里个邻居互相称呼，五花八门，感觉还是蛮好白相嗰。其中有用房间名称来称呼嗰，比如：亭子间娘娘、前楼爷叔、后楼舅妈。也有用出生地来称呼嗰，比如：苏州好婆、扬州奶奶咾啥。要么干脆明叫：小宁波、老山东，喊起来倒也乓乓响。假使晓得对方做啥工作，就可以用对方个职业相称，比如：小木匠、老皮匠、买糖粥嗰、吹喇叭嗰、唱京戏嗰。

顶好白相嗰就是阿拉搿点小八腊子个称呼侪用绰号，爷娘摆大饼摊嗰，儿子就叫“小大饼”；屋里开煤炭店，小人就叫“小煤球”；有一个小朋友屋里是开南货店嗰，阿拉侪叫伊“咸猪头”……勿管哪能叫法，大家开开心心一道过日脚。直到现在难板辣路浪碰着，往往名字想勿起来，脱口而出就是绰号。听到耳朵里侪勿会生气，反而感觉特别亲切温暖。