【沪语】上海人屋里厢的热水瓶

上个世纪五六十年代，物资比较短缺，但是自来水的供应总是有保证的，热水瓶也就成为了上海人家必备的日用品之一。

当时，大部分的热水瓶是竹壳的，后来有一部分是搪瓷铁壳的，而铝壳喷漆的热水瓶更是上档次了。一般来讲，新婚夫妻结婚的时候，都要买一对漂亮的热水瓶摆在房间里面。你们家的老式热水瓶是否还留着？一起听一段音频来回味一下老早底，热水瓶带给我们的那些温暖！

音频请点击↓↓↓

上海人屋里厢的热水瓶 来自上海发布 00:00 06:06

讲起热水瓶啊，一定是上海人，家家屋里必备个日用品；就像电灯泡、煤气灶一样。上个世纪五六十年代，虽然物资供应短缺，大多数人家屋里生活条件呢侪比较推扳，但是自来水个供应总归保证个，要想吃一口热茶（上海人啊喝白开水也叫吃茶），搿还是有保证个。

我记得老清爽，小时候吃热茶个辰光，屋里向个大人总归要拿开水倒辣辣杯子里向，等水勿冷勿热刚刚好可以吃个辰光呢，才肯交到阿拉手里向。喔唷侬覅讲，老底子个搿种热水瓶个质量还真是勿推扳，隔夜冲下去个水，到第二天早浪向起来啊，热水瓶里个水还是叠叠潽、滚滚烫。

当时大部分热水瓶个外壳呢是竹壳个，后来有了一部分搪瓷铁壳个。嗨嗨我好几趟辣辣描写解放前个故事个电视剧里向，看到出现搪瓷铁壳热水瓶个影子，喔唷我真佩服迭些导演、美工个“穿越”水平。

而铝壳喷漆个，是上档子个，一般来讲新婚夫妻结婚辰光呢，侪要买一对摆了新房间里向；特别像当时个“向阳牌”铝壳热水瓶，红颜色个保温瓶外壳浪向，喷绘了一朵盛开个牡丹；牡丹啊大家晓得有“花中之王”美誉，再加上设计师用醒目个酒红颜色搭配，呈现出吉祥富贵、喜气洋洋个感觉，成为众多新婚夫妻首选个结婚伴侣。

当然咾，有种小夫妻偶尔寻相骂个辰光呢，也欢喜用掼家生来表示自己个威力；有种人呢就是欢喜掼热水瓶，假使搿只热水瓶里正好装满开水，正好就掼下去呢，喔唷迭个灵光，掼地浪“嘭”，玻璃瓶胆破碎一地，“滋”，地浪冒起一层热气，简直就像一件威慑力十足个“原子弹”。

不过搿桩事体过脱以后呢，伊拉肯定也要后悔个！

要讲后悔啊，我个亲眷碰到一桩事体，可以讲是“空前绝后”。

我个一位亲戚呢，要结婚了。伊兴冲冲跑到上海采购新婚装备，主要呢还是紧缺个日用品，其中就有铝壳个热水瓶、奶糖、花生牛轧糖等等。临走个迭一天啊，我陪伊到北火车站，买了一张站台票，幇伊一道拿行李轧上51次列车。我再三关照伊，别个物事问题勿大哦，侬迭个两只热水瓶一定要当心，勿要敲碎脱。啊呀伊讲侬放心放心，两只热水瓶哼我捧了手浪，搿总呒没问题了？哎我想，搿只脑子被伊动得出，服帖伊！

几日天以后，我个亲戚打来电话，除了感谢我个帮忙以外呢，邪气痛心地搭我讲，一对热水瓶，敲碎了！

原来啊，伊上了火车以后，虽然是卧铺，但是伊一路浪向只要勿是吃饭、上厕所，伊就拿搿对热水瓶捧辣身浪向，生怕敲碎脱。火车经过南京长江大桥、穿过郑州、西安，翻越秦岭山脉、走出玉门关外……当伊背浪向背大包、肩胛浪搭小包、手捧热水瓶走出车站，看到来接伊个未婚妻个辰光，一阵激动，张开双臂冲向未婚妻个辰光，只听得一声“空”（因为热水瓶呒没水，声音勿是“澎”），千辛万苦手浪向捧了三天三夜个热水瓶，最后还是……碎脱了，但是热水瓶外壳浪向“避免激烈震荡及碰撞”厂个使用说明，深深地刺痛了伊个心！但总算还好，里向瓶胆碎脱了，外头壳子呢还呒没碎，结婚辰光装装样子呢还蛮好。

当然咾，现在进步了，大部分人家屋里侪配备了电热个饮水机，只要接上电源，24小时为侬服务，用勿着摆辣炉子浪么烧，也用勿着拎仔热水瓶倒。

想来想去啊，还是老办法最灵光：烧水个，辣辣炉子浪向拿水烧得滚开滚开，冲进热水瓶，想吃就吃，吃得又放心。

再讲还有啥物事能够像热水瓶一样，表面冷、里向烫。有辰光，就算天老冷，就算人老孤独，只要从热水瓶里倒出一杯水，水是滚烫个，用手捧辣海，一歇歇辰光，浑身侪热了，心里个殟塞，也就勿觉着了。

资料：学上海话 微信（作者：秦来来）