崇岭伴侬去远方——
作者:李海荣
离开扎什伦布寺,旅行大巴经过长途行驶,傍晚我伲来到了素有西藏嗰江南林芝。林芝地处藏东南雅鲁藏布江下游,平均海拔3000米,海拔最低嗰地方仅仅900米,气候湿润,四季常青,景色宜人。有人称伊是西藏嗰瑞士,同时又被称为最后嗰香格里拉。林芝勒拉藏语里意思是“太阳嗰宝库”,林芝森林面积达264公顷,森林覆盖率46%,是西藏嗰天然大氧吧。总人口14万。极地天河雅鲁藏布江搭蜿蜒嗰尼洋河孕育了搿搭形态迥异而原始嗰人文文化。
独特嗰工布藏族有着跟拉萨河后藏地区截然勿同嗰服饰、习俗。由于气候勿同,工布地区嗰男女老少侪欢喜穿着一种像清朝满人穿嗰“马褂”式嗰叫“谷秀”嗰服装,搿搭几乎呒没人穿长袍。用氆氇或羊皮做成套头长坎肩,呒没袖子呒没领头,套长袖衣,下身着长裤。男嗰配船形帽搭工布鞋。女服套长袍或长裙,下摆拖到脚面,女嗰帽子也好像船形帽,不过帽沿剪成燕尾形,既美观又别具一格。
到了林芝我伲才第一次真正品尝了地道嗰西藏美食。藏族朋友请我伲吃了自家酿制嗰青稞酒。青稞酒顾名思义是用青稞酿成嗰。制作方法比较简单:先将青稞汏清爽煮熟,等到温度稍微降低嗰辰光加进酒曲用木桶或陶罐封好,让伊发酵,两三日天后,兑上凉水,再过一两日天就可以饮用了。青稞酒色泽橙黄,味道酸甜,酒精成分邪气低。到藏民屋里作客吃青稞酒嗰辰光,主人先倒满一杯,侬先吃一口,添满,一连三次,最后满杯吃完,之后才能自由地吃。假使侬确实勿能吃,可以用食指沾酒弹三次——敬天、敬地、敬神,再婉言谢绝。勒拉藏族屋里作客,切忌自家去倒酒茶,主人或子女会来倒酒茶嗰,但勿必自行端吃,要等到主人捧到侬面前敬酒嗰辰光再能接过来吃。我伲还吃了酥油茶。酥油,藏语叫“玛日”。一般50公斤鲜牛奶可制4公斤酥油。拿酥油放进熬好嗰砖茶里加盐勒拉酥油筒里打制,就成可口嗰酥油茶了。酥油茶是藏族同胞旦夕勿可或缺嗰饮品。
由拉萨进入林芝八一地域,过米拉山口后沿尼洋河顺流而下,搿条清澈透明嗰河流,藏族人给伊起了个邪气富有诗意嗰名字——“仙女嗰眼泪”。伊发源于米拉山,东流300多公里,于八一镇约40公里处汇入雅鲁藏布江。碧绿嗰河水穿行于灌木丛、水草、形状各异嗰卵石、沙洲、农田之间,水流半掩,宛如翠玉撒地,令搿搭沿路嗰景色越发迷人。中途稍事休息嗰辰光,我看到有嗰同事跳到尼洋河中巨形卵石上去拍照,自家也想跳过去。赵有法老师提醒我岁数大了,勿要跳过去。但当时自家老早已经被美景深深嗰陶醉了,根本听勿进朋友友善嗰劝阻,任性地纵身向河畔嗰巨石跳去。搿一回仙女倒勿流泪了,该轮到我搿个勿晓得天多高地多厚嗰老顽童落眼泪了。自家勒拉巨大嗰卵石上滑进河里,只感到右脚踝像钻心一样嗰痛,搿再感到勿听朋友劝,吃苦勒眼前了。右脚踝马上肿得像馒头一样。无奈只能勒同事嗰搀扶下,一瘸一瘸挪回到旅行大巴上。导游搭同事们侪劝我马上终止旅行,一家头登勒宾馆里养伤。我虽然感到邪气沮丧,但想到下面嗰行程假使自家勿去,可能今生今世呒没机会再来西藏重游了。我婉拒了导游搭同事们嗰好意,咬牙忍痛坚持走完了余下嗰全部行程。
等返回浙江到省武警医院检查嗰辰光,勿料已经加重为腓骨粉碎性骨折了。神医勒拉我嗰右脚脚踝上钻了5只洞,放进一块钢板,拧上5颗钢钉。等待我嗰是漫长嗰十个号头嗰病痛折磨。由于得到了家人无微勿至嗰照料,神了!勿到十个号头,最后医院X光复查嗰辰光,尽然看勿到腓骨断掉嗰地方了。讲真嗰,去西藏走完全程对我而言,遗憾嗰仅仅只是一阵子;假使终止嗰言话,遗憾嗰肯定将是一辈子呵。
(待续)
“言话”基本解释:说话,谈话。南朝宋·刘义庆《世说新语·赏誉》“天锡见其风神清令,言话如流。”宋·苏轼《归去来集字》诗之三“言话审无倦,心怀良独安。”此与今日上海话中“言话”的用法是一致的。
“闲话”基本解释:指闲谈;背后议论他人是非的话;不满意的话,有关私人的谣言、传闻、幕后消息等。见陆游《雪意》诗:“闲话更端茶灶熟。”
往期回顾:
摄影:赵有法 | 编辑:渺渺
联系客服