从泥城河到西藏中路（上）
修正：丁迪蒙
上海个西藏路分为北、中、南三段，其中西藏中路由泥城河（浜）演变而来。老早，勒北京东路西藏中路还有只名字叫“泥城桥”个公交车站，交关上海市区地图也勒现在北京路西藏路口另外标出“泥城桥”。
勿少上海人也觉着奇怪，此地既呒没“泥城”也呒没桥，迭个地名是从啥地方来个呢？搿要从早期个英租界搭仔西藏路个历史讲起。
1845年11月，英国领事巴富尔搭上海道订立《上海租界章程》个辰光，只规定从洋泾浜（现在个延安东路）到李家场（现在个北京东路）之间个黄浦滩以西个地方，作为英国人个“居留地”，呒没确定西面个界线。第二年，上海道搭英国领事再又一次确定，迭个居留地个西界为现在个河南中路，以前叫作“界路”，也是由此而来个。
随牢仔上海租界个建立，到上海定居个侨民搭仔生意人越来越多，房价搭地价也大幅升高。于是，上海个英国跑马总会拿原来设立勒抛球场（现在河南中路以西，南京东路以北）个一个跑马场以高价卖出，又另外勒现在个西藏中路个地方以低价买进了一块土地重新建跑马场，造成了事实浪向租界面积个扩大。
搿一年上海发生了“青浦教案”，1848年3月8日，英国传教士麦都思、雒魏林搭慕维廉三人违背当时议定个“外人走行之地，以一日往返，不得在外过夜”个规定，自说自话闯进离上海90华里个青浦县城，伊拉勒青浦城隍庙及附近地区传教并散发教会传单，引起大批乡民搭漕粮水手争相索取。混乱当中雒魏林举起手杖勒水手头浪乱打，引起水手个勿满搭仔愤怒，水手也向雒魏林还击，混乱当中三位外国传教士受了点轻伤。
事体发生之后，英国领事阿利国勿但勿怪英国传教士违背规定、私闯青浦搭仔打人个行为，相反还小题大作，要求上海道“给予完满的赔偿”。迭个无理要求遭到上海道咸龄拒绝，于是，阿利国就派副领事罗伯逊乘“爱司比格”号兵舰到南京直接向两江总督李星沅进行恐吓。勒上海个其他国家领事也采取措施搭中国政府施加压力，勒外国列强个压力下头，清政府被迫将咸龄革职，赔偿白银三百两，并拿参与“肇事”个十几个水手逮捕，带了枷号示众。
由于清政府个软弱搭妥协态度，使得列强个气焰更加嚣张，地方官员对于外事处理更加胆小慎重，所以当搿一年英国领事要求租界扩张个辰光，新上任个上海道吴健彰邪气快个就答应了迭个要求。1848年扩张后个租界，就相当干现在苏州河以南、西藏中路以东、延安东路以北搭外滩以西个范围。
现在西藏中路原来是连通苏州河搭洋泾浜个小河浜，并呒没名称。当1853年9月上海县城爆发小刀会起义个辰光，由于小刀会是打太平天国旗号个，而太平天国又自称信奉“天主”，所以勒上海个传教士对伊拉采取同情态度，同时，由于太平天国仅仅勒两年里向从广西沿湖南，顺长江攻克南京，势如破竹，清廷搭太平天国之间胜负还难以确定，所以列强采取观望策略。
为了保护租界个利益，租界提出“武装中立”个口号，一方面伊拉调动兵舰开进黄浦江，另一方面上海个英、美、法三租界联合起来组织了一支准军事化个商人武装——上海万国商团。为了阻止清军通过租界攻打城里个义军，租界就拿西界个小河浜拓宽挖深，挖出来个河泥就堆成了一道护体，因为搿条河浜是临时开挖并用于保护租界个，所以就被叫作“护界河”或者“护城河”。当清军将领吉尔杭阿带军队到上海镇压小刀会起义个辰光，由于租界勿同意借道，大批军队就只好留勒“护城河”个西边，就是现在西藏中路以西个地方安营。
“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。
“闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。”
往期回顾：
图：网络 | 编辑：渺渺
联系客服
