沪语朗读：渺渺
弄堂嗰记忆
来源：网 络
指导：丁迪蒙
改写：渺渺
上海人对上海嗰记忆侪有一条弄堂，弄堂也有得交关名堂经。像斯文里、大庆里搿种叫石库门，九江里、八埭头搿种叫广式里弄，静安别墅、霞飞坊是新式里弄，上方花园、凡尔登花园是属于花园式里弄。
勿管是石库门还是洋房，开始嗰辰光侪是有气派嗰，后首来轧进去了勿少人家，独门独院变成了七十二家房客，灶披间搭仔卫生间侪是四五家人家佮用嗰，拥挤勿堪，不过上海人也由此练成了螺蛳壳里做道场嗰功夫。
上海海纳百川，啥地方嗰人侪有，公开场合侪用上海闲话打招呼。弄堂里常庄可以听到“王家姆妈”“李家伯伯”“侬好”“晏歇会”。在自家屋里么就侪讲自家嗰家乡闲话，各地方嗰方言侪有特色，山东人邪气豪爽，苏北人相对泼辣，宁波人交关生硬，苏州人邪气软糯，真是一个大千小世界。
弄堂里过着懒洋洋嗰日脚，有着浓浓嗰生活气息。侬看，秋天介个下半日，弄堂里向静悄悄嗰，空气里飘过一阵阵嗰桂花香味，老阿奶坐在太阳下头打瞌瞛，老伯伯轧在一道着着象棋、吃吃茶，迭个辰光是最最惬意嗰。
太阳落山了，灶披间飘出煎带鱼嗰焦香，红烧肉嗰酱香，老母鸡汤嗰鲜香，杂格拢种嗰香味道远远叫就闻到了，上班嗰年轻人、放夜学嗰小囡侪兴冲冲回到屋里去吃一顿邪气丰盛嗰夜饭。
饭吃好了，弄堂里向勿晓得啥人家屋里飘过：“人闲桂花落，夜静春山空。月出惊山鸟，时鸣春涧中。”
有小囡在拉小提琴，在弹钢琴，窗底下有勿少人在听免费个音乐。
夜到，万家灯火，搿个城市，搿条弄堂就是我最愿意亲近嗰地方，侬听：“纤云弄巧，飞星传恨，银汉迢迢暗度。金风玉露一相逢，便胜却人间无数。柔情似水，佳期如梦，忍顾鹊桥归路。两情若是久长时，又岂在朝朝暮暮。”
弄堂，迭个邪气温柔嗰名字，永远是我放勿落嗰世界，一辈子嗰心念。
“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。
“闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。”
图：网络 | 编辑：渺渺
联系客服
