潜规则
作者,沪语讲述:李海榮
今年七月十日是上海1873年有气象记录以来,最早气温高达摄氏40℃的日脚,一大早树浪个知了就开始提前开工了,侪勒了憋足劲弗停个高歌“热煞啦!热煞啦!热煞啦!”呒没命个叫,我是屋里个火头军,为了避开酷热,吃好早饭就带好口罩,匆匆出门了。刚转弯走到龙茗路口,就远远眺望到原来“江苏爆鱼店”前已经人头攒动,熙熙攘攘轧满了马大嫂。稍微走到近一眼,一看原来个“江苏爆鱼店”的店招已经摇身一变换成气派个“范当家”,自栩“民间味道守护人”,还赫然主打起“苏式爆鱼”、“南汇散养鸡”、“川味凉拌”、“金汤热卤”唠啥菜肴,再加上边浪厢还有好几只花篮祝贺开张之僖,场面烘托得要几化热闹就有几化热闹了。
我原来就是搿家三黄鸡店个常客,感觉天气炎热,中浪厢尝尝散养鸡味道也弗错,就自然而然个排勒了长队后面。虽然是老店新开,但有一个弗寻常个现象引起了各位排队食客个疑问。一向明码标价个爆鱼店,改头换面之后,开张第一天,居然所有食品一概既呒没明码,也呒没标价。弗少精明个“马姐”、“马妈”们就禁弗住问忙得团团转个老板娘:“今朝哪恁侪弗明码标价呢?”,老板娘诡异个回答:“今朝是’范当家’开张大吉!所以大家放心,绝对便宜!一律原价28元8!打八点五折!”,精明可爱个上海阿姨、大妈们一听能便宜15%,想想覅太划算噢,也就统统弗再提出任何疑义了。
热辣辣个骄阳直晒勒了店门外焦急等候的马家人,第一位马姐是34元8,只看见伊摸出手机,让老板娘扫“支付码”,阿里想到老板娘拿出一只拆骨勒新个扫码机,扫来扫去就是呒没任何反应。弄得顾客脱老板娘侪急得昏头六沖。我实在憋弗牢了,就对汗流满面个马姐讲:“今朝是老板娘开张之僖,就算侬中大奖啦!既然扫弗出来,葛末侬就白送啦!”马姐也是一个接口令十分了得个调侃高手:“迭能当然好啊!问题是老板娘个散养鸡也还呒没拨我呀!”我随口一讲:“葛末倷俩啥人也弗吃亏,两平啦!”实在晒得吃弗消了,排队个食客侪有眼弗淡定了。张三一句,李四一句,王二麻子再凑一句,弄得老板娘枪法更加乱了。最后还是从旁边窗口拿过来一张二维码,才结束了一场混乱。
挨下来个一位马妈蛮搞笑个,伊买了半只散养鸡,口口声声叮嘱斩鸡师傅:“师傅!侬鸡头、鸡屁股脱鸡皮侪弗要厾掉噢!我侪要个,阿拉屋里个狗狗最欢喜吃了。”大家侪拨搿位特别做人家个马妈逗乐啦,真是个过日脚个好手啊,全家享口福,连狗侪喂了。
谢天谢地总算轮到我了。我也要了半只散养鸡,一称齐巧500克,老板娘面带笑容个讲:“老爷叔,侬老运道真好噢,弗多弗少正好一斤,28元8,几化吉祥个数字啊!”我也戆噱噱个回应:“是啊!是啊!”拎勒还有余温个半只散养鸡,乐呵呵个继续採买别个食材。走勒走勒,总觉得好像阿里搭有眼弗太对劲?!
正所谓“智者千虑,必有一失,愚者千思必有一得”,自家整整琢磨了老半天,才刚刚如梦咋醒,搿散养鸡勒了“江苏爆鱼店”个辰光本来就是28.80元一斤,哪恁今朝开张大吉之际,老板娘口口声声:“大优惠啦!原价!28元8,打八五折!”弄了半日天所谓原价,就是已经打了八五折了个优惠价啊?
直到搿个辰光,我才刚刚如梦真醒啦:就是店家如果不歇业关门,只要重新装修门面,就意味着顾客再要原价购买个可能性几乎为“零”啦!也难怪老祖宗老里八早就已经邪气清楚个告诉阿拉“羊毛出勒羊身浪”颠簸弗破个优惠真谛啦……
“言话”基本解释:说话,谈话。南朝宋·刘义庆《世说新语·赏誉》“天锡见其风神清令,言话如流。”宋·苏轼《归去来集字》诗之三“言话审无倦,心怀良独安。”此与今日上海话中“言话”的用法是一致的。
“闲话”基本解释:指闲谈;背后议论他人是非的话;不满意的话,有关私人的谣言、传闻、幕后消息等。见陆游《雪意》诗:“闲话更端茶灶熟。”
图:网络 | 编辑:渺渺
联系客服