上海言话讲述：耕雲
（电波里个经典记忆之三）
勒空中影院“听”电影
上海言话讲述：耕雲
“听”电影，是我年轻辰光个一大业余爱好。
影哪能“听”？原来，勒伊个年代，我国广播界独创了一种文艺形式——《电影录音剪辑》，就是对勒各电影院上映个电影进行二度创作，并通过广播个形式向听众传播，让电影从“看”过度到“听”。迭档节目还有一个响亮个名字，叫“空中影院”。
著名电影导演孙渝烽曾经回忆讲，中央人民广播电台、上海人民广播电台侪曾经寻过伊，让伊做一些可以“听”个电影。“要做好一部好听个电影邪气吃功夫个，创作文本要拿电影看熟，寻出精彩个亮点，拿原本两个钟头个电影压缩到一个钟头。挨下来，录下整部电影个声音，根据文本拿电影对白剪进去，再配上旁白。”
20世纪80年代前后，《电影录音剪辑》经历过一段十分辉煌个岁月。伊个辰光，我正好跨出校门，踏上社会，一个号头个工资只有26块，而到电影院去看一场电影要花一两角洋钿，从收音机里“听”电影倒是又经济，又实惠，成了我个一大嗜好。
我记得，我“听”过个电影有《月亮湾的风波》《月亮湾的笑声》《第二次握手》《保密局的枪声》《405谋杀案》《尼罗河上的惨案》《阳光下的罪恶》《远山的呼唤》等。有辰光到田里去参加劳动，也常庄带着收音机，边劳动，边听《电影录音剪辑》，既丰富了文化生活，又缓解了疲劳。空闲个辰光，我还曾尝试拿从《电影录音剪辑》节目里“听”到个电影编写剧情梗概，无意中锻炼了自家个文字表述能力。
当时，有一部反映农村题材个影片《喜盈门》红遍全国，据统计，观众达5亿多人次，勒搿歇，迭个是难以想像个。迭能一部影片，勿仅勒电影院邪气卖座，而且勒各地电台个《电影录音剪辑》节目里也多次播出，深受听众欢喜，我就勿止一次“听”过搿部电影。
搭电影院里放映个电影相比，《电影录音剪辑》虽然勒时间浪缩短了将近一半，但是，因为加上了旁白，使剪辑地方有了天衣无缝个过度，感觉一眼也呒没影响到剧情个完整性，有些地方甚至比坐勒电影院里看更容易理解。“听”电影，让人有着另外一种体验搭享受，成为伊个时代独特而美好个记忆。
在上海，爱上海，讲上海言话。
“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。
“闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。”
联系客服
