难忘当年高考

沪语朗读：陈飞

难忘当年高考

原创:孙宏彝

来源：上海老底子

方言改写：郭莉

讲述：陈飞

推荐：丁迪蒙

年年高考临近，赛过一场呒没硝烟个战场拼搏，人生竞争。高考跟莘莘学子命运选择有密切关联，所以伊始终牵动了成千上万人个目光，牵动了大家个心弦。

也是搿能个一个大热天，1978年——恢复高考个第二年，7月20号到22号搿三日天，我跟牢仔全国 590 万考生个浩浩荡荡个人流，踏进了久违个考场。

上一趟高考是勒半年之前，伊歇辰光，我勒单位里工作蛮忙个，所以呒没去报名，搿趟勿好再错过机会了。为了勿让单位领导晓得了会得讲我勿安心岗位工作，我是偷偷叫勒勒报名截止个最后一日，溜到区招生办公室去报名个。当时我勿晓得可以用“同等学力”名义去报考研究生，否则我一定会得去直接试试考研个。

回想起 1966年5月，我高中毕业个前夕，大家侪勒邪气有信心个复习功课，勒考虑高考志愿到底要填啥个院校搭仔专业，想勿到文化大革命爆发了，考大学成为了水中月、镜中影。高中毕业之后个十年里向，我先是上山下乡，战天斗地，后来调回市区，到建筑工程队，从事艰苦个体力劳动。读大学，只有勒睏梦头里偶然出现过。

报好名，离考试只有一两个号头个准备辰光了，虽然考勿考得进大学，对我来讲关系也勿是老大，但既然报名了，总归要认真准备准备吧。最大个困难就是呒没复习资料，自家读高中辰光个教科书，老早就进废品回收站了。

一日天，上班经过复旦附中校门口，看见墙壁浪，贴了出售学堂里老师编印个高考复习资料个告示，我老开心个，豪扫跑过去翻了翻，马上就拿出了八只角子买了一本。真个要感谢迭个学堂个老师，我考大学个复习各个科目，唯一用个就是迭本复习资料，其他一样也呒没个。搿趟高考，我总共用脱了一块三角洋钿：报名费五角，加上复习资料费八角，回想起来，可能我是参加考试个所有人个里向，经济成本最低个伐！

文科要考六门课，复习辰光短，要背个内容又多，我就根据自家个具体情况，制订了复习计划 ：语文、政治因为平常接触蛮多，稍微看看就算了，主要是复习数学、历史、地理三门。外语，因为考试分数勿计入总分，只是作为录取参考个，就覅浪费辰光，放弃脱算了。

人生能有几回搏啊。日里向工作蛮吃力个，但是每日天夜饭一吃好，我就抓紧辰光复习。按照搿本复习资料个内容一页一页个背下去，常庄要弄到半夜里一两点钟。倦了，就用冷水去揩把面，到室外去透透气。邻居侪已经老里八早进入梦乡了，四周围邪气安静，只有偶然传来毛毛头个哭闹声。呼吸了新鲜空气之后，脑子清爽了，回到屋里继续复习。

伊歇辰光真个是年轻呀，身体好，精力充沛，一日天只睏几个钟头也呒没啥。为了勿让单位领导同事晓得我勒勒备考，我拿自家本职工作做得特别个认真，一眼勿好推板。据说有交关人专门请假勒勒屋里复习，我是一日天个假也呒没请过。

七月下旬，终于走进了考场。语文试卷前半部分是标点、语法、修辞、文章分析等内容，最后写作是拿一篇《速度问题是一个政治问题》缩写成为五六百字个短文；政治、历史、地理题目侪做出来了，当然勿一定回答完整；数学是最得意个，走出考场对答案，基本浪呒没啥差错；压末一天外语考试，我索介勿去参加了。总个来讲，搿趟考试题目并勿是老难，但大家毕竟侪介许多年数呒没接受过正规个课堂教育了，要想考高分，还是有一定难度个。

八月中旬，考试成绩出来了，我总分是三百七十几分，数学考得最好，93.5分。全国最低录取分数线是三百分，我心定了，觉着自家肯定会得拨大学录取个。

啥人晓得一直等到录取工作全部结束，我也呒没接到录取通知。我偷偷叫到区招办去打听原因，也一眼呒没结果。后首来再晓得，像我搿种情况有交关人。也听说过搿批人聚集起来，到市教卫办去集体申诉，还勒市革会门前集体静坐。终于市里答应尽量想办法解决。

又过了一两个号头，有关部门挖潜力，扩大招生，我终于接到了复旦大学分校个录取通知单，而迭个辰光，前头录取个考生已经勒大学里读了一学期书了。

每当新闻媒体回顾恢复高考个艰难曲折、宣传伊重大意义辰光，想起我当年高考，也是心潮澎湃个。大家侪会讲，知识改变人生，知识改变命运。的确是搿能，当年交关从农村、基层出来个历届生，就是通过读大学，彻底改变了自家个人生轨迹。

应该讲，我也是幸运个，当年录取比例只有6%，真是凤毛麟角呀。再加上 1978 年以后，像我搿能超过25岁个大龄考生，已经勿好再报名参加高考了。勒勒1978 年历史转折时期，我勿知勿觉捉牢了迭个继续深造、学习个机会，由此翻开人生篇章新个一页。

事实浪，大学毕业之后，我个工作搭仔生活也呒没发生多少表面变化，但我心里向深深个感到，通过四年大学生活，跟人接触交往个层次发生了变化，眼界、学识个视野丰富扩大了，观察问题搭分析问题个能力也大大增强了，因此，自家个生活也就更多姿多彩了。

感谢1978年高考，使我囥勒心里多年个大学梦，终于得以实现。

朗读者

   

 

方言是文化的活化石。每种语言都能表达出使用者所在民族的世界观、思维方式、社会特性以及文化、历史等，都是人类珍贵的无形遗产。当一种语言消失后，与之对应的整个文明也会消失。保护汉语方言，有利于人类文明的传承与发展和社会安定。

在上海，爱上海，讲上海言话。

“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。

“闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。”

图：网络  /  编辑：渺渺