沪语朗读：孙维陵
鱼仙人、眼仙人、蟹壳里仙人（下）
作者：薛理勇
沪语改写：丁迪蒙
朗读：孙维陵
实际浪向，搿种风俗，古代叫做“鱼卜”，就是用鱼骨头来占卜，江南一带拿胖头鱼个搿对骨头叫做“鱼仙人”，“掼鱼骨头”讲做“请鱼仙人”。也许，古人比较迷信，认为胖头鱼个鱼骨头有神灵，就拿伊叫做“鱼仙人”。“请鱼仙人”就是请神灵指点迷津，保佑平安；现代人讲究科学，“掼鱼骨头”只必过是一种寄托，一种祈祷，一种白相相而已。
人个眼睛有点像玻璃弹子，假使侬靠近另一个人个眼睛，对牢仔伊个眼睛看，一定可以发现，伊个眼睛里向有一个小小个人影，搿个人影实际浪是侬自家勒伊个眼睛里向个投影，以前个中国人勿懂科学，错误个以为搿个人影是隐藏勒人身浪向个“仙人”，是帮助农看清物事个，所以，江南一带拿眼睛里向个“仙人”叫做“眼仙人”。眼睛好个人“眼仙人”邪气清晰，反之，视力比较推板个人眼珠子就比较混浊，“眼仙人”也迷迷糊糊个，一旦得了白内障之类个疾病，眼球浪向就蒙了一层白翳，人一旦失去了视力，“眼仙人”也就消失得无影无踪了。所以，吴方言也拿人个眼睛叫做“眼仙人”。比方，评弹《孟丽君·洞房刺奸》：“勿吃下去，勒新夫人面上塌台个，所以一口气吃仔十几杯，吃得眼仙人发定，舌头发大”。
松江人郭友松用松江方言写个《玄空经》，成书于1884年，第七回：
出气姑娘一看老爷勿灵，等他死尽之后，向蟹壳里仙人处去买粒九转还魂丹来救他；看看醒勿转，就猫哭老鼠假慈悲，一把鼻涕一把眼泪哩啦（劈里啪啦）哭起亲夫来。
“出气”就是漏气，老酒甏封口勿严实，里向个老酒走了气，吴方言讲做“出气”，“出气姑娘”指个是未婚就已经有得性行为个“姑娘”；吴方言拿寺庙里向供个神道像叫做“老爷”，“老爷勿灵”就是“求神无用”；“蟹壳里仙人”就是“蟹和尚”，清秦荣光《上海县竹枝词》：
九十团尖膏满筐，老饕筵佐醋和姜。
无肠牵挂成和尚，蝴蝶双粘壁上僵。
作者原注：“案：蟹筐中有袋泥软壳，俗呼‘蟹和尚’。螯内有片壳，白而透明，雄者较大。两片相合，黏贴壁上，俗呼‘蟹蝴蝶’。又，蟹称‘无肠公子’。”“蟹壳里仙人”、“蟹和尚”实际浪向就是大闸蟹个粪包。民间传说《白蛇传》当中，白娘娘带领虾兵蟹将，水漫金山，向法海和尚发起进攻，法海和尚无处可逃，就躲到蟹个肚皮里向，变成了蟹个粪包。勒吃大闸蟹个辰光，拿粪包外头个一层透明个翳去脱，就可以发现有只形似趺坐个和尚个粪包。雄性个大闸蟹螯比较大，吃蟹个辰光，一般会得拿螯折断脱，断裂个蟹螯连牢里向个白颜色个壳片，两半爿相拼，形似蝴蝶，就称为“蟹蝴蝶”，文人、骚客辣吃大闸蟹个辰光会得拿“蟹蝴蝶”黏贴勒墙壁浪向，搿种风俗老里八早就已经消失了。
上海言话有“仙人跳”一语，茅盾《子夜》八：“钻狗洞，摆仙人跳，放白鸽，你就不如我了。”徐珂《清稗类抄·方言类·上海方言》：“仙人跳，男女协谋，饰为夫妇（亦有出之正确之夫妇者），使女子以色为饵，诱其他之男子入室，坐甫定，同谋之男子以夫之资格猝自外归，见客在，则伪怒，谓欲捉将官里去，客甚惧，长跪乞恩，不许，囊括金以献，不足，更迫署债券，订期偿还，必满其欲壑，始辱而纵之去。”搿种诈骗个方式搭仔行为今朝仍旧有个，但已经勿叫“仙人跳”了。“仙人跳”可能是“仙人跳脚”个省略。勒上海方言里向，“跳脚”比喻人拨逼到有口难言，无可奈何到了极致个辰光个状态，“仙人跳脚”伊个意思是，即使是仙人也是有口难辩、无可奈何了。
点以下文字即可听到精彩回放：
图片来自网络
联系客服
