沪语朗读:渺渺
作者:沈乔生
推荐、文字修正:丁迪蒙
改编、朗读:渺渺
勒中国现代史浪,有一个阶级,伊个活力突然消失了,也就是生命中止了,就像划过夜空个流星。但是过了将近三十年,伊又勒末生头复活了,呈现出蓬勃个生命力,发出眩目个光华。不过,搿一拨发起来个人搭仔前一拨消失个人,基本呒没关系,甚至呒没一眼眼家族个血缘,但伊拉同属一个阶级。迭个阶级以前叫资产,或叫民族资产。现在叫民营企业家,或者简称老板。
我嗰父亲就是当年其中个一员。
我小辰光个交关道伴,屋里侪是资产。上世纪五十年代,上海有勿少资产,大多数住勒上海个徐汇、静安两个区。
关于父亲,我有老深嗰几个印象。
一个搭我阿妹有关,当时伊只有6岁,跟小朋友到淮海路浪去白相,路过陕西路、淮海路口个公泰水果店,有只桔子滚出来了,齐巧滚到伊脚跟边。伊觉着好白相,就拾起来带回来了。父亲回到屋里向发现了,问清事体个原由,就牵牢阿妹个小手,穿过两条马路,走到公泰水果店,搭营业员讲,小囡勿懂事体,对勿起了。
另一个印象是公私合营以后,我父亲担任南京路一带十七个店个私方经理。现在我明白不过是做做样子,呒没实权个。但我当时勿会懂个,勒相当长个一段辰光里,父亲个基本权利就是写思想改造。我键盘敲到搿搭,眼门前就浮起伊苦涩、尴尬个面孔。
我记得,父亲是从来勿用公家信纸信壳作私用个,伊写信就到文具店里去买信纸,往往是派我去,勒上海电影院旁边个一家文具店,离开我屋里勿远,只要伊一喊我就去。有意思个是,父亲认为思想改造是伊个私人事体,所以伊写思想汇报也一定要用买来个纸头。欸些辰光,私信是老少个。所以,每趟叫我去买信纸,我就晓得了欸个用场,心里就搭父亲难过。
我始终记得伊写思想改造个样子,伊睏勒床上翻来覆去,勒房间里勿停个走来走去,就像蒙了眼睛个毛驴勒推磨子。伊个面孔是有轮廓个,却像是拨无形个门轧过一样,邪气模糊。
父亲个字是老有灵气个,伊写个字近似于草书,点划随意,现在回想起来,有点王铎个意思。当时我勿懂,还骄傲个认为伊个字勿好看,比我写个推板。现在想想,伊用搿能个字写改造汇报,实在是可惜了。更加可惜个是,伊欸歇辰光个改造检讨,竟然一份也呒没拨保留下来。
1955年是资产个人生大转折。关于迭个转折,呒没多少留存下来个文字,只有一眼遥远个零星个记忆。我曾经听父亲讲起过,欸些辰光,几乎是送个,排好队,抢勒送厂、送店,恨勿得统统侪送脱,可以当一个光荣个工人阶级。事实浪向,前头个三反五反已经让资产吓得胆战心寒,强权已经摧毁了资产个抵抗意志,所以公私合营一推广出来,几乎就是摧枯拉朽。
不过,政府也是聪明个,是有选择个。我记得欸些辰光个上海马路旁边,有眼烟纸店,做眼利邪气薄个小生意,实际浪,伊拉也就是城市贫民。伊拉也一门心思想拨合营个,眼巴巴个等辣海。不过政府却勿要伊拉。所以,伊拉只好垂头丧气个守好一家薄店,卖点针头线脑、肥皂、草纸。后来侪凭票供应了,针头线脑也勿好卖了,只好卖一分洋钿一包个盐金枣,上海个小囡老少呒没吃过盐金枣个。烟纸店个生意邪气清淡,伊拉勒生存线浪老艰难个活勒海。
当然咾,也有个别资产勿老实个。我姑父就是迭能个人,每年过年,伊拉一家门侪要到我伲屋里向来拜年,吃饭个辰光,大家侪闷仔头挟菜,伊呢,总归是強仔头颈用老大个声音讲言话。伊个太太皱仔眉头讲,侬勿讲,人家勿会拿侬当哑子,侬以为就是侬有本事啊!伊就低下头来吃饭了,呒没多少辰光伊又拿头颈強起来了。
伊做橡胶生意,早先里已经吃过轧头,1955年又讲了眼勿合时宜个言话,恶运就绕牢伊了。开批判会,越开越激烈。有一日天伊消失了,勿晓得到啥地方去了。一家门寻了伊一日天也没寻到。搿是个初冬个早浪向,我赖勒被头筒里没起来,有人敲门,风钻进来刺骨个冷,我又往被头筒里缩了缩。来个是表阿哥,伊搭父亲迓迓叫讲了几句,寻到了。父亲着好衣裳,急匆匆出门了。
到夜快点了,父亲再回来,伊面色老难看,是过了蛮多辰光再讲言话个。姑父个尸体寻着了,跳黄浦了,也勿晓得是从啥地方跳下去个,一路里漂下去,漂到高庙,再拨撑船个人发现。伊拉去认个辰光,只骷榔头肿得像只畚箕,认勿出来,只好根据身浪着个衣裳再确定是姑父。自绝于人民,呒没言话好讲,孃孃还勿敢哭出声音,只好轻轻叫抽泣。第二天父亲又赶到火葬场,帮伊妹妹料理了后事。
点以下文字即有精彩回放:
图片来自网络
联系客服