沪语朗读：王宇洲
朗读者
我家的黄猫白猫
原载《新民晚报》2009.12.4
作者：何新旧
沪语改编：丁迪蒙
朗读：王宇洲
我从小就欢喜小动物，但是一直呒没机会养猫。后来有缘，一养就是两只。
有一日，我到水果店里去买香蕉，看见店里向有只小黄猫邪气活泼可爱，就称赞了一句。勿想老板讲：“店里向老虫忒多，原来养了只黑猫，几天前头落脱了，就寻了搿只，想勿到大猫又回来了。侬假使欢喜末，就拿回去，也是伊搭侬有缘分。”想起儿子从小就宠爱猫，当时就带回去了。
黄猫邪气受全家欢喜，自然就成了明星。我屋里住勒一楼，伊可以用脚爪移开窗进进出出，吃饭勿愁，玩乐又自由，生活真是过得幸福。
有一日天，一只小小个白猫蹲勒我屋里向个门口头叫，我姆妈看伊可怜，就拨伊吃了一眼猫粮，但是，吃饱以后伊还是勿肯离开。猫是欢喜独居个，但讲起来也蛮奇怪，黄猫看见了白猫，并勿排斥，反倒是像自家个儿子一样，舐犊情深。“就当伊拉是兄弟，再养一只伐！”妻子讲了以后，黄猫就多了个“阿弟”。
两只猫个性格完全勿一样。黄猫聪明、又邪气高雅，拿大小便个盆子摆勒卫生间里，教了伊一次，伊就学会勒勒盆里向大小便了。假使伊想吃了，会得静静叫个看着侬。要是饿得急了，勒侬个大腿浪蹭来蹭去也没效果以后，再开始喵喵个叫，而且，一定是要用伊专用个盘子再肯去吃，十足个少爷派头！
白猫呢，就差远了，定点大小便学了交关辰光再会，伊只要肚皮一饿，就勿断个用老大个声音喵喵喵喵穷叫八叫，假使勒侬个大腿浪向蹭来蹭去呒没反应，伊就用脚爪扑勒侬个大腿浪了。伊吃个辰光一定要拿盆子里个鱼拖到地板浪，弄得地板邪气龌龊。
但是啊，黄猫好像并勿烦阿弟白猫。白猫小，活泼好动会勿断要去寻黄猫挑衅。黄猫勒椅子浪向睏觉，白猫会得用脚爪去抓黄猫。面对“阿弟”个骚扰，“阿哥”显得邪气有耐心。每日天早浪向搭仔夜里向，两猫嬉戏就成为了家中一景。
推上海言话叙身边事体
究吴侬细语吟诗词歌赋
往期回顾：
图片来自网络
联系客服
