沪语朗读:仝康民
作者:尤今
来源:夜光杯2019年12月3号
上海话改写:郭莉
朗读:仝康民
朋友阿德有个囡女叫小彦,勒勒同龄个小囡里向,样样事体侪是伊带头个,赛过是个小头头;就是跟搭比伊大个小囡勒一道,伊也处处显得邪气沉稳。顶顶难得个,是伊小小年纪,倒是会得时时刻刻为人家着想。
大家侪讲:迭能个小囡,当然是爷娘个基因好啊!只有我晓得,阿德勒勒教育囡儿花了勿少辰光,是费了勿少心血个。
有交关家长侪欢喜毫无原则个放纵、溺爱自家个小囡,阿德偏生拿教育个重点,放勒小囡性格个熏陶,搭仔小囡个逻辑思维训练方面。伊认为,为小囡品格打地基,越早开始,地基就越是扎足;因为“阿拉是勿好拿一幢豪宅,去造勒勒浮冰浪向”个。小囡就像是一块巨大个海绵,阿德迭个爸爸就是用自家个理念,化成无孔不入个水份,渗透进每一寸海绵里向,影响小囡。
我举几只例子:要是一个小囡掼跤了,哇啦哇啦哭起来,一般家长个做法侪是拿小囡抱起来,又是亲咾又是撸,好像是发生勿得了个大事体了;有眼家长还要叽哩咕噜骂地板、噼噼啪啪个打墙壁,拿小囡掼跤个责任侪推到地板搭仔墙壁浪向。但是阿德却是从来也勿会搿能做个。侬看,伊拿勒哭个小彦扶起来,搭伊讲:“嗯,吸一口气,冷静店!”小彦平常辰光看来已经接受过搿种训练了,所以尽管眼泪水还勒海落下来,但是呢,伊还是真个吸了口气,做出只“冷静”个表情,哭声自然也就慢慢叫停下唻了。阿德趁机用一种邪气轻松个口气讲:“现在,让爸爸检查检查看,小彦是勿是出血啦?”伊认认真真、上上下下看了一遍,乃末讲:“噢,呒没受伤嘛,葛末阿拉小彦为啥要哭呢?”爸爸个镇静淡定影响了小彦,小姑娘马上就勿哭,还笑起来了,一歇歇辰光,伊又蹦蹦跳跳去白相游戏了。
又譬方讲,好吃个物事摆勒眼门前,交关家长就会得让小囡一家头独享,甚至还会得拿别人个手挡脱,帮牢小囡呒没礼貌个拒绝别人:“㑚做啥?伊欢喜吃嘛,让伊吃!㑚覅动伊个物事!”阿德邪气反对搿种家长个做法。伊严肃个搭我讲:“阿拉大人是勿可以对小囡传递错误信息个。”阿德认为,就算是“龙肝凤胆”,吃下去立时三刻就可以让小囡增加一尺智慧,伊也勿会让囡儿一家头独吞个。就勒勒爸爸搿种教育影响下头,小彦个口头就是:“阿拉一道吃好伐?侬一半,我一半。”阿德还训练囡儿个自我节制能力,小彦那,特别欢喜吃榴梿,阿德告诉伊,榴梿是热性个,多吃了喉咙要痛个。所以每趟小彦拿自家手里一块榴梿吃脱之后,就自觉个去汏手了,绝对勿会要求多吃,真是有邪气好个自我克制毅力。阿德认为,“只下禁令勿去解释,小囡就可能阳奉阴违。跟小囡解释、沟通,对随便几化大个小囡来讲,侪是邪气重要个。”
有一趟,阿德屋里向请客,台子浪向是杯盘狼藉,地板浪向侪是瓜子壳。迭个辰光,大家竟然发现小彦主动去拿了扫帚畚箕,跑过来收作了!人客侪呆脱了!只看见小姑娘拿好仔比伊高出交关个大扫帚,东拖西扫,邪气认真,一眼也勿是存心勒人客面前作秀。原来啊,迭个是小彦勒勒屋里像每日天夜饭以后,一定要做个家务。是爸爸告诉伊,一家人家也要分工合作:妈妈烧饭、爸爸汏碗,小彦就要扫地。
搿能,今年只有三岁个小姑娘小彦,伊个一言一行、一举一动里向,我看到了伊个爸爸阿德苦心经营个痕迹。人世间,勿要去想啥个“不劳而获”个事体,侬勒勒田里种了豆,偏生希望田里长出大西瓜,真是捏牢仔鼻头做梦。阿德教育小囡呢,真叫是种瓜得瓜,瓜是长得又甜又美啊!
图片来自网络
上海言话叙身边事体
往期回顾:
“上海言话讲起来”旨在传播沪语,若有不当之处,敬请留言指正。
感谢您的支持转发,欢迎关注本公众号
联系客服