沪语朗读:渺渺如胭
朗读者
清爽冬至邋遢年
原创:薛理勇
来源:淮海白领群
上海话改写:郭莉
朗读:渺渺如胭
冬至,顾名思义,就是冬天到了。无论从历法来讲,还是从风俗来讲,伊侪是一个邪气重要个日脚。冬至是勒勒公元历个12月22号左右,迭个一天是北半球白天最短,天黑得最早,夜最长个一天。勒勒古代周朝辰光,拿十一月作为正月,所以冬至就是一年开始个第一天,也就是“新年”,迭个是交关重要个大日脚。一直到乃,冬至仍旧是邪气重要个传统节日。
从冬至日开始,北半球白天是一日比一日长了。古人拿夜里叫做“阴”,拿日里叫做“阳”,所以冬至也是“阴衰阳盛”个开始。但是冬至前后一段辰光,地球北半球毕竟气温低,地表温度也低。从冬至日开始,要经过九九八十一天,乃末算是寒气基本散尽,大地回春了。三九、四九是顶顶冷个辰光,所谓三九严寒嘛。
清朝辰光上海人秦荣光勒勒《上海县竹枝词·岁时》里向讲:
冬至花糕更粉圆,分冬酒吃闹年年。
衣冠拜贺亲朋后,肉块堆盆夜祀先。
看来,冬至辰光民间祭祖、供神,要吃糕团、分冬酒,还要吃大肉。有句言话讲,“冬至夜里一块肉,譬如呒没到冬天”。“冬至夜”就是冬至日前一天夜里,冬至个风俗活动一般就是勒勒“冬至夜”进行个。“冬至夜里一块肉,譬如呒没到冬天”,意思就是:冬至夜吃个物事是特别补身体个,冬至夜开始进补,可以让人身体健康、强壮,有抗寒力道,尽管寒冷冬天已经来临,但是侬个抗寒能力强了,就觉勿着冬天到来。
勒勒中国几千年个农耕年代,年复一年春播、夏耘、秋收、冬藏。大家侪以为冬天是收藏个季节,吃到肚皮里个物事也是一样最容易吸收、保藏个。我记得我小辰光,我阿奶就会得勒勒冬至日硬劲要阿拉多吃眼物事,伊还要讲:“冬节吃物事有补啊!”屋里有眼铜钿个人家,就会得勒勒冬至日前头,请郎中开一张补药方子,乃末根据方子去熬膏子药,勒勒冬至日开始服用,搿种习俗到乃还是邪气流行个。侬看,冬至来临之前,上海交交关关店家侪备足了所谓“冬令大补膏”,市场浪向人人抢购“冬令大补膏”,也是上海一道风景线。
江南民间还流传搿能一句言话:“清爽冬至邋遢年”。迭个“年”是指“新年”,也就是春节。传统习俗过新年,除夕是顶顶闹猛个,所以“年”也特指“年三十”。清爽冬至邋遢年个意思是讲:假使冬至迭个一日天晴气清,葛末年三十迭个一日一定落雨,从前侪是烂泥路,一落雨,里里外外环境侪踏得来邋里邋遢;反过来,冬至搿日天气邋遢,葛末过年就一定是晴空万里,艳阳高照。搿句老古话流传了勿晓得几化年数了,但是也呒没啥人去认认真真想一想看一看,迭个到底有啥个根据。
实际浪“邋遢”是“垃圾”早期个写法。《辞源》里向“邋遢”个解释是搿能个:“脏土和扔弃的破烂杂物。本作‘邋遢’,‘拉’、‘遢’双声,用畚箕敛拾东西的叫‘圾’。因属脏土之类、字又改从土字旁,写作‘垃圾’。”从发音来讲,“邋遢”古音接近“lese”,港台地区个国语影视片里向,“垃圾”侪讲成“lese”,我想,迭个应该是港台方言里向保存个“邋遢”个古音。
从冬至到春节新年,每年有长短勿一样个一段辰光,所以“清爽冬至邋遢年”并呒没啥科学根据。我有一次到电台做直播嘉宾,碰着另外一位嘉宾是卖炮仗焰火商店个经理。经理讲:从前仔碰着冬至天气勿好,以为过春节炮仗可以赚大钞票了,结果到了年夜,又是阴雨连绵,进货个炮仗焰火大量积压,所以就勿再相信啥个“清爽冬至邋遢年”个讲法了。
还有一只讲法是“冬至勿回娘家门”,就是出嫁个女儿勒勒冬至搿日天,是勿好回娘家个。迭个是因为冬至是白天辰光最短个一日,要是路远个回娘家,一早出门,天黑还赶勿到娘家,所以就“冬至勿回娘家门”了。另外,冬至节日,一家门必须团聚勒屋里向祭拜老祖宗。因为“冬至大如年”,冬至祭祖活动比新年还要重要,也更加繁琐,到了迭个一天,所有家庭成员侪必须勒勒屋里参加祭祖活动,当然,出嫁个女儿么,也就“冬至勿回娘家门”了。
图片来自网络
吴侬细语吟诗词歌赋
往期回顾:
“上海言话讲起来”旨在传播沪语,若有不当之处,敬请留言指正。
感谢您的支持转发,欢迎关注本公众号
联系客服