上海老城隍庙，排行勿是第一，名气就是第一，甚至only one（下）
作者：马尚龙
沪语改写、诵读：郭健
假使讲，老城隍庙是中国第一代“吃货”津津有味个根据地，葛末，老城隍庙也是中国第一代贤妻良母小百货个集中营。
老城隍庙勿是四大公司，伊个里向是买撑面子个物事，而老城隍庙是买过日脚个物事个，日用小百货，连大口玻璃瓶搿种物事、还有热水瓶塞头咾啥侪可以勒老城隍庙里向买到。
差勿多十年前头，姆妈突然之间脚勿好了，行动勿便，我急于搭伊去买根拐杖，却勿晓得阿里得有买。姆妈提醒，老城隍庙啊，肯定有个。我去了，果然买着了。
当年勒城隍庙买日用品个勿会是佣人，勿会是有铜钿个太太，只有贤妻良母。也只有贤妻良母对老城隍庙个五香豆更加钟情，勿剥皮勿吐核，边走边吃又勿失女人个样子。而且派头大、开销省，回到屋里分点拨人家也舍得。
有吃，有买，有九曲桥，有鱼，仍旧是小人搭女人个爱好；再朝前走，始建于清朝个湖心亭，搿是爷爷辈吃茶、听评弹个地方，蒋调、张调、徐调、琴调，拂过湖当中个荷花，沿牢九曲桥飘过来。介许多年过来，搿有声有色个美景，仍旧是美景。只是人忒多，伊丽莎白二世搭仔克林顿勒湖心亭品茗赏荷之视线所及，搿是邪气难看得到个了。
再朝里向走走，会得经历老城隍庙意境最大个反差。卖梨膏糖，代表了最市井世俗个吆喝，搿种喊叫声慢慢叫成为了野豁豁个代名词，搭卖狗皮膏药差勿多。
接勒海个另外一种市井风情，就是到中国第一代小资个舒卷怡情个集散地了——豫园。
上海人历来是拿老城隍庙搭豫园当作连体个风情地看个，实际浪，搿刚好是雅俗两种文化个巧妙对接。可以佐证个是，2013年9月，中国邮政发行了《豫园》特种邮票，一套四张，有豫园个景致，也有湖心亭九曲桥个全貌——老城隍庙搭豫园难分彼此。有情调个男女，兜好城隍庙以后会得去豫园散散步，好一眼个人家，会得勒豫园里向拍张全家福。1980年代初期，上海电视台有好几年中秋晚会，侪安排勒豫园里向，赏月，赏桂。比起现在交关电视晚会用奢侈来掩盖苍白，要生鲜交关。2014年，亚信峰会期间，好几位第一夫人游览豫园，并且勒素有“江南第一台”之称个“古戏台”观赏江南戏曲表演，到了中浪向，当然还要品尝绿波廊个点心——搿真正是老城隍庙搭豫园之间个天然亲和。
搿就是老城隍庙，具有唯一性感觉个老城隍庙。城隍庙勿是唯一个，城隍庙里元素个组合、城隍庙搭豫园对接个形式再是唯一个。甚至老城隍庙几十年还有一家全中国独一无二、真正独此一家、别无分店个“永青假发店”。小辰光每一次经过，侪会得笑出声来张望，蛮想看到一只秃头进去……没想到几十年过去了，自家也变成了搿能个人。
永青假发做勿到永青，但是老城隍庙个世俗生命力真个是永葆青春。“老庙黄金”是上海黄金饰品个品牌。论资历搭仔历史，老庙黄金是比勿上老凤祥个。老凤祥是从创始于1848年个老凤祥银楼而来个，老庙黄金搿爿店开始辰光已经是1982年个事体了，但是老庙黄金有一份全国记录，伊是国务院批准国内恢复销售黄金饰品以后上海开设个第一家黄金零售点。
为啥上海老城隍庙并勿生产黄金，但是啥人又会得讲两者之间呒没互为因果个生长呢？搿一家沾了老城隍庙仙气个黄金珠宝饰品店，沾到个是老城隍庙市井民俗却勿乏情调、意境个大上海文化，沾到个是搭老城隍庙一样个勿唯一当中个唯一。
往期回顾：
上海老城隍庙，排行勿是第一，名气就是第一，甚至only one（上）
图：网络 / 编辑：渺渺如胭
联系客服
