沪语朗读：陆漫真
作者：李榕樟
沪语改写：边秦翌
诵读：陆漫真
双木成林，林再加木就是“森”；假使讲倒过来，“林”勒高头，“木”勒下头，哪能读法子，啥意思？查《汉语大字典》1226页、《中华字海》757页，再晓得读：jìn。意思是放樽个矮台子。
“林木”，是我个笔名，使用率比较高，其中个意思么，首先当然是我名字里向有三个木，其次嘛，觉着自家才疏学浅，写文章也是平平，所以木还是迓勒林里向比较好。
现在个网路拿交关信息侪公开了，要查同名同姓邪气方便，搭我同名个，上海目前呒没第二个人，而姓名里向是“三棵树”个好像也呒没。武汉有位作家，搭我一样中文系毕业，伊个姓名也是三种树个意思。写过篇关于名字个故事，搿搭拿来用用：
“邪气偶然认得三木兄。三木兄叫我三木弟，因为我个笔名李楠枫也是三个木。跟人家猜想个勿一样，我并勿是五行缺木，所谓缺啥补啥、取了搿能介个笔名，而三木兄个名字也勿是搿种原因。实际浪，我蛮晏再有笔名，勿是一开始就有个。
读大学辰光，有日天好朋友搭我讲，江湖人士侪有外号，侬既然准备混江湖，葛么我搭侬取只笔名伐。我讲好个。伊就拨了我李难封，意思是“冯唐易老，李广难封”，因为我有个室友姓冯。必过，搿位室友从来呒没用过“冯亦老”。我嫌比难封二个字忒明显，就取谐音楠枫。楠为珍贵木材，枫是高大乔木，而李，《千字文》里有“果珍李柰”。自此，李楠枫或者楠枫，就成为我本名之外唯一个字号。
后首来，我又搭自家上了个雅号，楠枫居士，还刻了方闲章，所以我住个地方，勿管是之前租个，还是后首来长租国家七十年产权个房子，也就成为了“楠枫居”。
有人问，楠枫来于难封，搿是个字面意思勿大好个名字，侬哪能还用啊？实际浪我也考虑过个。但是，生死有命，富贵在天，得之在天，成之在人。假使呒没几分汗水、几分本事，就算拨自家取名叫做“十全老人”，住个地方叫做“养心殿”，也只必过是庸夫而已。只要矢志勿移，全力以赴，像楠搿能个坚强、恒久，像枫一样个热情，有傲骨，就可以有自家个尊严，有与能力相匹配个成就。我个笔名搭仔三木兄个榕樟二字，真个有异曲同工之妙啊！”
真个呶，三木弟笔名里向有三棵树，我个真名里向也有三棵树。除脱大家侪姓李，后头二个字侪用树木来命名，冥冥之中好像呼应了泰戈尔个诗句：“树就像大地个渴望，一直踮起脚向天空窥望”。三木弟自称居士，其实并勿是，我也勿是啥个和尚，但是阿拉个笔名好像侪搭佛教有眼搭界个，真个是蛮巧个。
木是阴阳五行之一，有生长发育之性，凡具生发，柔和特性者统统属于木。
我其实本来更加欢喜水，上善若水么。水是生命之源，一生慷慨奉献，教人学会随遇而安、包容豁达；水也最有浪漫个特性。搭仔水相比，木好像勿大移动个，总归是立勒原地，但是仔细想想，其实就像舒婷《致橡树》里向讲到个，勿管是一棵、两棵、三棵，还是无数棵树，坚持就是一种恒久而又忠诚个浪漫。树木是倾听者，伊勿讲闲话，经历风雨，大风吹过，鸟儿飞过，一切归于平和，其中个变化搭仔痕迹，天空晓得，树木搭土地也晓得。
树木是世界浪最普通个物事，寿命远远叫比人类等动物要长，伊拉生生勿息，一刻勿停个勒起光合作用，吸入二氧化碳，吐出氧气，为环境作贡献。因为有树木，四季再分明，色彩再丰富。木之于山、之于土、之于水、之于火、之于艺术，乃之于阿拉个日常家庭生活，侪是密勿可分，伊拉勿但是阿拉个生活里向离勿开个帮手，也是阿拉生活生机勃勃、多姿多彩个基础，木之衰微则洪涝旱灾至，木之兴盛则环境美好来。
还是回到我搭仔三木弟个名字。三棵树，阿拉应该人如其名，坚持既定个方向，并且像树木一样，勿断焕发出新个生命力。
我想，我搭仔三棵树兄弟个勿谋而合，毫无疑问是邪气值得庆幸个。
往期回顾：
图：网络 / 编辑：渺渺
联系客服
