沪语朗读：王宇洲
作者：薛理勇
沪语改写：荣梅；指导修正：丁迪蒙
老底子，上海流行过一种叫作“炒黄豆”个儿童游戏，通常是两个人相向而立，互相握牢对方个双手，两个人同时嘴巴里向念:“炒黄豆，炒黄豆，炒好黄豆翻跟斗”，勒念到“炒黄豆”个辰光互相握牢个双手同时向左向右晃动，而到念到“炒好黄豆翻跟斗”个辰光，两个人互握个双手向上，身体作三百六十度转身。
勒我个记忆当中，搿只“炒黄豆”个游戏是20世纪60年代初期开始个，当时辰光我已经读初中了，所以，没白相过搿种游戏，一直到70年代末或者是80年代初期再消失个。现在个年龄勒勒五、六十岁以上个人应该是白相过、也记得搿种游戏个。
“炒黄豆”只不过是一种儿童游戏，所以，啥人也勿会得去注意童谣个词所隐藏个意义。不过，从语言个角度来讲，搿首邪气短个童谣词语里向就含有两个上海俗语个词，其一，就是“炒”。
“炒”通常是烹饪方面个术语，就是拿食物摆到热个镬子里去搅拌，使得食物变熟或者膨胀，屋里向或者饭店里向个炒菜，譬方讲：炒鸡蛋、炒猪肝、炒三鲜、炒肉丝咾啥；勒食品行业当中个“炒货”，譬方讲：炒花生、炒瓜子、糖炒栗子、三北盐炒豆咾啥个，也是个。
拿黄豆摆到热个镬子里向翻炒就是“炒黄豆”，勒餐饮行业里向，一盆生个料经过厨师手里向一炒而成为了美味个炒菜，价钿可以翻几倍甚至于十几倍，同样个，生个干果、瓜子经过热镬子炒熟而成为了“炒货”，价钿也就提高交关，于是，当“炒”脱离了饮食行业而成为了生活、社会个俗语——炒卖之后，词义马上就发生变化了，伊是指以人为个方式哄抬物价，或者通过制造與论、传播消息等方式来提高某人或者某种物事个名声、地位、信誉等等。
上海是个商业发达个大城市，可以“炒”个物事实在是忒多了，人为个制造一些假新闻、假消息、假行情用来抬高地价、房价，叫做“炒地皮”“炒房产”，一些大官、有钞票个富商咾啥利用自家个地位、财势让股票、证券勿断个波动，方便伊拉买空、卖空，迭个叫做“炒股票”“炒行情”“炒证券”；还有，借助媒体个力量，制造一眼流言蜚语，用来抬高一部分唱歌个、跳舞个、拍电影、电视剧个人个身价，搿个又可以讲是“炒明星”。
“翻跟斗”就是“翻筋斗”。
1959年，国内进入灾害时期，物资供应邪气缺乏，社会秩序相对来讲不叫混乱，社会失业率也有较大幅度个上升，一些“社会青年”——当时拿无业、失业个青年统称为“社会青年”，伊拉是勿计入失业人数个，虽然讲，当时个中国失业者邪气多个，但是，中国统计个失业率却是老老低个，伊拉勒电影院电影开场之前套购电影票，勒电影将要放个辰光再高价卖出来，搿个叫做“翻跟斗”，比方售价是原价个一倍，就讲“翻一只跟斗”，两倍呢，则讲“翻两只跟斗”，以此类推，从事搿行“翻跟斗”个人一般就叫作“翻跟斗朋友”了。
分析到搿搭，阿拉就可以容易理解童谣“炒黄豆”个含义了。“炒黄豆”，搿是一种手段，而“翻跟斗”呢，则是目的。
20世纪80年代，中国恢复了股票交易市场，上海市民投资股市个人数是以百万来计算个，大家习惯拿投资股票者称之“股民”，股民参与股市活动个就是“炒股”。实际浪向，搿眼“股民”弄错脱了，伊拉是忒抬举自家了。勒饮食业当中，饭店老板是“炒手”，勒股票、房地产市场里向，只有商界个巨头再属于“炒手”，伊拉可以凭借经济、政治、媒体个关系搭仔实力，翻手为云，覆手为雨，让股票市场个股价走势朝牢伊拉引领个方向升降，而手头只有一眼零星“垃圾股”个“股民”只好是热镬子里向个“炒货”，拨一眼“炒手”勒股掌之间白相，钻“炒手”拉个空子度日，伊拉假使想左右股市个走向，葛末只好是等待“冷镬子里爆出热栗子——是想也勿要想”呀。
朗读者
往期回顾：
图：网络 / 编辑：渺渺
联系客服
