沪语朗读
来源：夜光杯
作者：薛理勇
沪语改写：郭莉
文字修正：丁迪蒙
南京路搭仔外滩重新“牵手”，吸引了大批市民游览观光，南京东路江西路转角浪向个“慈昌里”，就成了交关游客个打卡地。
2020年，上海有关方面修缮南京东路江西路转角“慈昌里”街面房子，也就是南京东路150-172号，搭仔江西中路298-314号老房子，搿搭也是“星火日夜商店”。
老房子拆脱了底层屋檐下头个粉刷层，就露出了China Realty Co.Ltd.一行英文，迭个是旧上海美商中国营业公司个店招牌。挨下来，同样勒勒“慈昌里”沿街个位置，又露出了其他个英文店招牌。搿桩事体引起上海市民邪气大个兴趣，交关朋友侪希望我来讲一讲迭幢房子个历史故事。
上海人侪晓得，英籍犹太人哈同是旧上海“房地产大王”，统计下来，南京路沿线大约摸三分之一地皮侪是哈同个。当时，房地产商可以勒自家买个地皮浪向造房子，提供租赁，收取房租，倒也是邪气有油水个。
当年个上海，还流行一种叫做“租地造屋”个房地产经营模式，就是土地所有者（甲方）拿土地中、长期个出租拨乙方，由乙方投资建造房子。搿种合同一般侪有廿三十年。合同有效期内，房子归乙方直接使用或者直接支配，等到合同期结束，乙方无条件拿土地连同地块浪向个房子，统统归还拨勒甲方。
一般情况下，甲方侪希望乙方按高标准建造房子，但是乙方当然从自家个利益考虑，只要合同期内确保房子勿坍脱就可以了，乃末造房子过程当中偷工减料、以次充好个事体到处侪是，凡是上海房地产商投资建造个住宅，质量侪好勿到阿里得去个。
“慈昌里”个房子是哈同1904年左右勒自家买下来个地皮浪投资建造，再提供租赁个。当时，上海远远叫呒没现在介繁华，南京路沿马路大部分也侪是搿种两层楼个房子，底层是商铺，楼浪是写字间，从前上海人叫办公室侪叫“写字间”个。当然，楼浪也可以住人，或者作为仓库个。美商中国营业公司，是蛮早租赁“慈昌里”开业个一家外商公司。
进入20世纪以后，上海城市人口以每年增加十万个速度上升，南京路越来越闹热。1917年之后，华侨资本个先施公司、永安公司、新新公司等等一大批以“四大公司”为代表个大型百货公司先后开张，南京路成为了有名个商业街，搿能一来，就引领南京路沿线规模性个改造搭仔建设了。哈同希望有人来“租地造屋”，葛末，就可以拆脱老个“慈昌里”来造新房子了。大概是价钿谈勿拢伐，一直呒没人来接盘。哈同呒没办法，只好自家勒旧房子上头加层改建，搿能来提高建筑面积，也好提升房子品质，增加租金个收入。
“慈昌里”房子是1922年加层改建个，旧房子就搿能介变成功了新房子，租金上升了，房子品质当然也有所上升个。后来，辰光勿长，上海著名个美商中美图书公司、英商伊文思图书公司等等一批文化用品商店也勒此地落脚。建国之后，迭眼外国商行侪撤退、离开了上海，但是，我还记得，此地一带仍旧是南京路文化用品商店最集中个街区。
搿趟南京路发现了100年前头外国商行个店招牌，引起了勿少人个关注，也引起了大家个兴趣。有人希望保留迭眼老物事，也有人建议铲脱搿种旧物事。还好，现在房子个业主，也可能是设计师，勒勒旧个店招牌外头另外做了只“套”子，“套”子个外头可以是新店个招牌，市民或者游客立勒海伸伸头，就可以看到过去个“遗迹”，真个是两全其美，各得其所呀。嗯，勿错个！
往期回顾：
图：网络 / 朗读 & 编辑：渺渺
联系客服
