作者：朱海洪
沪语改写：边秦翌
沪语讲述：曹凯
上海人顶顶听得进“勿要钞票”搿句闲话。有只“小猢狲”趁牢仔“布袋和尚”分心个辰光，用力摇小盒子，想让里向个蝍蛉子勿要爬勿要叫。
“布袋和尚”一眼看到，隔手就是一记头搨：“小赤佬，摇啥个摇啊，蝍蛉子勿要拨侬摇死脱啦。”
“小猢狲”摸摸头：“迭只蝍蛉子勿叫个，我摇摇看，看伊死脱了伐。”
“介活络个，哪能会得死脱啊。”“布袋和尚”一把夺回蝍蛉子。
“小猢狲”只好败下来了，伊问其他小朋友：“蝍蛉子哪能摇勿昏个啦？”
“布袋和尚”朗朗个叫卖声又隐隐传来：“蝍蛉子要伐，一角洋钿一只，只只勒勒爬、只只勒勒叫…”
“小猢狲”侧耳细听，必过，“弗要钞票”迭句废话拨伊删脱了。
秋意浓浓，叫卖声声；云聚云散，人来人往。
邪气想念小辰光个市井叫卖：
“桂花赤豆汤”，“白糖莲心粥”，“麻油馓子脆麻花”，“檀香橄榄卖橄榄”……
悠扬个叫卖声勒勒晨昏之间个弄堂上空飘来飘去，惹得人馋吐水嗒嗒嘀。
卖炒白果个小贩子一面翻炒一面还唱小调：“阿要香炒热白果，粒粒开花大白果，香是香来糯是糯，一只铜板买三颗”。顾客一多，小贩就“人来疯”：“老板吃仔我个热白果，生意兴隆钞票多；娘娘吃仔肚皮大，养个儿子胖又大；小弟弟吃仔热白果，聪明伶俐将来好做大老倌”。
初夏清晨，山海关路小菜场边浪，有老太太，或者是穿仔碎花衣个长辫子姑娘挎篮叫卖“栀子花～白兰花”。伊个小竹篮里向铺勒白毛巾，一半垫勒盘子浪，白棉线扎成一对一对个白兰花，温润如玉个摆勒高头，另外一半个毛巾折过来，稍微拿整整齐齐个花朵盖一盖。白兰花身形修长，爱美个大姑娘、小媳妇拿伊别勒衣襟纽扣浪，大朵个栀子花往发髻浪一插，婀娜多姿、香气袭人；有人还拿花买回去放勒枕头边浪，闻香睏觉，笑梦花丛。
冬夜，天晏冷清，明星大戏院个大门外头，照样有得老太太坐勒小矮凳浪招呼生意：“茶叶蛋吃伐，五香茶叶蛋”，寒风瑟瑟中个戏迷，就算勿吃茶叶蛋，听到迭个声音，也会得有一丝丝暖意穿过心头。
冷天过去热天来，街头巷尾也少勿了工匠艺人个吆喊：
“修洋伞喔”
“阿有坏个棕绷修伐，阿有坏个藤绷修伐”
“削刀～磨剪刀”
声声叫卖，别有情趣；搿是老上海悠悠个清唱。拙朴个俚语方言搭仔民间小调，打造出都市经济个流动业态，并以独特个民谣方式留勒城市个记忆之中。
“削刀～磨剪刀”是南方人耳熟能详个工匠叫法，北方人吆喝个是“磨剪子唻～戗菜刀”。
磨刀匠个行头邪气简单：一条长板凳，一头固定两块磨刀石，一块用于粗磨，一块用于细磨；凳脚浪有得只铁罐头，里向装个是水，板凳个另外一头绑勒坐垫，还挂了一只蒲包，里向装眼小榔头、钢铲、水刷、水布咾啥一眼简单个工具。磨刀匠扛勒长板凳走街串巷个吆喊，抑扬顿挫个拉长腔：“削刀～磨剪刀”，哎呦，迭个声音，半条弄堂侪听得到。有人要磨刀，磨刀匠就拿长板凳一放，坐勒板凳后端，拿要磨个刀摆勒凳子前端固定个“V”型木块或者铁档浪向，用小刷子勒勒水罐里向蘸点水，抹抹刀口，“锲嚓、锲嚓”就磨起来了。
新昌路浪有得一个磨刀师傅搭别人家勿一样。伊勿扛长板凳，而是手推磨刀车。迭个磨刀师傅人勿高，小方面孔，胸口挂一只锈迹斑斑个围身布，推仔车子勒勒大街小巷里向揽生意。
“小方”勿大吆喊个，偶尔来一句，就是一声长长个：“削刀～～磨剪刀”，声音邪气响，传得也蛮远个。我到“大东”酱油店拷酱油个辰光，常庄看到伊勒勒隔壁“承兴”服务站门口头磨刀。
伊个磨刀作业台半人高，像只圆木桶一样个台面，高头也有固定个V型铁块，旁边放眼工具，有榔头、钳子、戗刀、水罐咾啥，车子个边浪还嵌勒一只小砂轮。
“小方”拿刀翻来覆去个勒砂轮高头粗加工，“嚓-嚓-嚓-嚓…”火星四溅；然后再“锲嚓、锲嚓”精加工，一面修补一面眯勒一只眼睛盯牢仔刀口，一直瞄来瞄去，来来回回做，一定要到刀光锃亮再满意。忒满意个辰光，“小方”就得意起来了，拿起刀勒勒空中划一记，勿晓得伊斩到了啥个物事，挨下来就吼上一句西皮流水：“刀劈三关威名大，只杀得胡儿胆战怕…”；旁边个人吓一跳，魂灵头也呒没了。
朗读者
往期回顾：
图：网络 / 编辑：渺渺
联系客服
