我小辰光老皮咯，除忒跳绳跳橡皮筋，男小歪白相咯打弹子、刮刮片佬啥，我还老老居咯，就是勿大会得做事体，连只碗盏阿汏勿清爽，阿拉姆妈心里老急咯，常庄勒拉我耳朵边上敲木鱼，小姑娘，一定要学会过日脚咯，我是一只耳朵进一只耳朵出。
69年咯辰光，15岁咯我要到安徽农村去了，姆妈怕我不会做家务出去要吃苦头，只好临时抱佛脚教我钉被头。
被夹里铺勒拉眠床浪向，铺好棉花胎被面子，四面约起来……“蛮便当咯”，我看了一歇歇就来煞勿及动起手来，手指头拨针戳了好几记，被头浪向还印了几块血印，总算拿棉花胎全部钉到被头里去了，刚刚想表扬自家哪能嘎聪明咯，姆妈伸手拉起被头，发觉我拿被单也一道钉了进去，伊是哭笑不得，我呢一面孔尴尬。
到仔乡下，姆妈勿勒拉身边，啥咯事体侪要靠自家，勒拉同学咯帮助下，慢慢较一些生活中咯小事体我侪学会了。
有一年探亲假回上海，姆妈要教我踏缝纫机，我邪气开心。
姆妈拿出来交关零碎布头，让我勒拉搿个上头练习。我踏发踏发就踏倒车来，一歇歇拿针还别断来，顾了上头顾勿着下头，弄得汗哒哒滴，结果踏出来的针脚像蚯蚓爬过一样，弯弯曲曲咯，难是难看煞了，真没想到踏缝纫机还噶难咯！
学会了踏缝纫机，有了针线生活只好去同事屋里借用，我老老想有一部自家咯缝纫机。讲到缝纫机，老底子咯上海还勿是每家人家侪有咯，紧俏商品凭票供应，老吃香咯。新娘子出嫁咯辰光，勿管会勿会做针线生活，有部缝纫机当嫁妆老扎台型咯。
欸咯辰光工资侪老低咯，想买缝纫机，只好从牙齿缝里一眼眼介省钞票。过仔几年，我咯“闺房”里终于有了一部“蝴蝶牌”缝纫机，机头上有一只漂亮咯蝴蝶勒拉飞，台面是黄颜色咯塑料贴面，价钿我记得老清爽咯，148块7角。
有了自家咯缝纫机，我开心得勿得了，一有空就端端正正坐勒缝纫机面前，两只脚一前一后踏起来，像足了“裁缝师傅”。
勿会裁衣裳哪能办呢？欸个辰光上海城隍庙有裁衣裳纸头样子买咯，买回来照牢纸头样子慢慢裁。先做睏衣、睏裤，然后试着做衬衫、长裤。后来结至婚有了小人，就帮小人做，囡小辰光咯衣裳侪是我自家做咯。
看到别人家买来咯小衣裳、小裙子佬好看咯，借来比比画画，再按照自家咯想法改一改，比起时装公司咯童装来，一眼也勿推板。大人旧咯“毛货”裤子，翻个面可以改成小囡个小马甲小裤子。
邮电局发个制服腰身收一收，裤子拆开来重新裁剪，做好用电熨斗烫一烫，裤缝笔直老挺括咯。同事讲搿套制服穿勒侬身上哪能嘎登样？
踏脚板飞快咯翻转，幸福生活就像缝纫机踏出来咯针脚一样，笔直而又欢快。
又是一年探亲假，正好上海勒拉“行”绣花，我看到阿拉阿妹绣了一对枕头套，老漂亮咯，我立了伊旁边，眼睛一煞勿煞看牢伊哪能绣。
回到安徽屋里厢，关起门做起了“绣女”。看到自家绣咯漂亮枕套罢勒眠床浪向，心里老适意咯。
四根绒线针，一本绒线书，箇嗒并一针，哎嗒挑一针，绒线书浪向漂亮个图案，侪到我咯绒线衫里来了，我结得起劲囡穿得漂亮，像蝴蝶一样飞来飞去。
后首来我回上海，姆妈觉着我比伊还要来赛，常庄表扬我会得“过日脚”了。
嘎许多年数过去了，现在大家咯日脚好过了，交关事体侪不用自家动手，不过我还是蛮欢喜做做针线个。做起针线生活来，人显得十分安详，觉着迭个才是“过日脚”咯样子。
图：网络 / 编辑：渺渺
联系客服
