作者：欧阳德彬
来源：渡十娘
沪语改写：边秦翌
沪语讲述：金丽萍
葛末侬想哪能办呢？
我也想离开大厦，只必过搿歇还勿是辰光。我还要存点钞票，以后到周边小镇去买套小房子，可以埋头做做自家欢喜个事体。
葛末想做眼啥个事体呢？
当然是看自家想看个书，写自家想写个文字，反正勿想受人驱使。勿要像现在，像煞是上班辰光也是勒勒看书写字，但是要看别人家让侬看个书，写别人家让侬写个字。
葛末就呒没稳定收入了呀？
所以要先存眼钞票末。
哈哈，年轻人倒是蛮有想法个末。林莉开玩笑一样个讲。看得出来，交了辞职报告，好像让伊变得邪气轻松愉快，一眼眼也呒没离开大厦个悲伤。
我讲拨侬听呶，有趟汏好头，发现自家额角头浪窜出来好几根白头发，看得我是触目惊心啊。过了而立之年，就算阔步迈进中老男人个行列喽。
侬还年轻，勿像我，告侬女朋友个姆妈是一个年纪。侬真是有得先见之明，寻个女朋友，还有一个年轻个丈母娘，赚到了呀。
瞎讲八讲，是负担更加重了好伐。侬晓得伐，香水每趟要买两瓶，苹果手机也要买两部唻。侬一眼也勿显老，路还长，应该再寻个男人。
单身辰光长了就勿想再寻了。再讲，也勿好寻啊，㑚男人侪欢喜年轻漂亮个学生妹，阿里会得欢喜年老色衰个老阿姨啊。
鸟城外国人蛮多个，侬寻个有钞票个老外也可以个呀。
侬以为到搿搭来个老外侪是腰缠万贯个啊，讲拨侬听呶，伊拉大部分侪是穷来西个，寻女人只必过是白相相。
迭个辰光，伊拉两个人走到了风筝广场，沐浴勒弯月个光辉中，迎面吹得来清凉个微风。广场浪向个紫荆树搭仔凤凰木呈现出告白天介完全勿一样个风貌。连得大家相互之间个交谈也变得真实起来，搭白天介讲个闲话是完全勿一样个。搿能介个情景似曾相识，勿久之前，张潮搭仔女朋友到过此地，只必过伊个辰光正好是满月罢了。
等到回到文化路，就看勿到月亮了。张潮转移了话题。
文化路勿是有得侬生活个全部么？出租屋、办公室、单位食堂统统勒勒搿搭。林莉讲。
我邪气眼痒侬，可以逃离伊个地方。张潮讲。
逃离算勿上，其它地方也差勿多，好勿到阿里去。已经介晏了，阿拉吃点老酒伐。林莉提议。
要么去文化路伊面个白夜酒吧伐？张潮提议。伊面有的是容易上手个女人，一道吃眼老酒就可以去开房。代价是第二天早浪向醒过来，看到一张卸妆之后个面孔，会得拿侬吓得半死。
勿去勿去。常怕碰着熟人。勿如穿过莲花山，到山北伊面，随便寻家酒吧。
好个呀，我也正好想吃点酒。自从参加工作，三点一线个生活，觉着自家与世隔绝了。
吃酒好啊，葛末侬会得照顾一个勿当心吃酒吃过头个女人伐拉？
当然咾。邪气擅长。
林莉呒没讲闲话，笑了笑，朝牢仔山北个方向走过去。走了几步又折回来。
还是各自回去伐？伊细碎个步子也快了起来。
侬心里向只会得想侬个小娇娘。哎，问侬一句，侬是想告伊结婚，还是只想告伊睏觉？伊笑勒海问。
当然要长远发展啦。张潮回答。
葛末侬就好好叫，要当心维护侬个灵气，勿要让工作拨伊耗光了。我就是一个活生生个反面教材，拨伊份工作榨干了一切。伊讲好之后步子就更加快了，勒勒一棵挨牢仔一棵个榕树下头奔起来了。张潮随便哪能也赶勿上。奇怪个女人。
朗读者
往期回顾：
图：网络 / 编辑：渺渺
联系客服
