讲述：冯蓉
作者：欧阳德彬
来源：渡十娘
沪语改写：边秦翌
沪语讲述：冯蓉
第二天上班个辰光，张潮存心迟到一个钟头，告新实施个打卡考勤制度过勿去。伊勒勒单位楼下头个麦当劳点了一杯咖啡，阅读一本黑封面个小说，塞利纳个《死缓》。大厦里向搿份开水煮癞蛤巴个差事，勿就是一场死缓个判决嘛，永远勿要去设想工作能成就一个人。
等伊回到办公室个辰光，林莉正好勒勒搭老大哥吵相骂。伊快点回到自家个位置，摊开一本书假装勒看，竖起耳朵聆听。从伊拉个对话当中，隐约可以晓得争吵个原因：老大哥连续几趟追问伊具体离职个日脚，伊也连续几趟回答自家搿歇也勿晓得，要办理一连串个离职手续，等一群部门敲图章。像老阿姨一样个唠叨搭啰嗦，是老大哥一贯个特点，有眼像《大话西游》里个唐僧。假使讲勒勒平常辰光，大家勿得勿忍受。但是对林莉来讲，反正辞职报告已经交上去了，已经用勿着再忍受啥个了。
侬一遍遍个问我离职个日脚，侬到底是啥个意思啊！是想赶我跑咾？伊个外表瘦弱个女同事提高了嗓门。整层楼侪是一只只个办公位，用隔板三面隔开，留一面进出。其他部门个人听到吵相骂个声音，一个个侪像老虫一样从隔间露出头来，朝牢仔书部搿搭观望。
侬勿要生气嘛，我又勿是存心搭侬过勿去，我只是想按照辰光安排好工作。老大哥立起来，大肚皮抖发抖发，放下高高在上个姿态，小囡一样抓抓头压低声音讲。伊并勿想让争吵天下皆知，就立时三刻拿话题转移到版面浪向。
伊拉两个人共事多年，呒没想过用吵相骂个方式收场。林莉大概要拿多年个压抑一记头统统释放出去。张潮听伊讲过好几趟，职场浪向只有利益呒没朋友，假使讲有，也是个人交情。
张潮又想起前几天老大哥朝自家发火个事体，一口一个“滚侬个蛋，侬有啥个资格讲搿句闲话”，亏得自家屏牢了，否则搿歇辞职个应该是自家伐，勿对，应该是伊拉两个人。伊走了，自家也勿会得做得长个，但是勿是现在，伊还呒没足够个实力勒勒勿工作个状态下头养活自家。侵犯尊严是勿可逆个，就像吸进肺部个雾霾，牢牢个粘勒肺泡浪向，有一日天总归会得突然爆发，毁灭脱一切。
林莉告张潮做搭档个日脚里，伊总归欢喜讲起老底子个搭档魏封，就像痴情女人念念勿忘分手多年个情夫。张潮也认得魏封，两个人年纪差勿多，勒勒鸟城一眼文化场合碰着过几趟。魏封辞职之后空出来一只岗位，张潮就是拨老大哥叫得来接替伊。伊个辰光，张潮勒鸟城边缘一个叫做章阁个小镇浪租了套还算宽敞个房子，窝勒里向看书写物事，做专职作家个梦。老大哥听讲伊呒没工作，就约伊到大厦来聊聊写专栏个事体。从章阁到市中心，要乘一个多钟头个公交车，再转乘一个多钟头个地铁。张潮背仔双肩包，一看到老大哥，就讲自家是农民工进城。专栏个事体呒没谈成功，老大哥是醉翁之意勿在酒，伊是想让张潮接手魏封个工作。伊个辰光魏封已经辞职大半年了，老大哥一直勒勒物色合适个人选。
往期回顾：
图：网络 / 编辑：渺渺
联系客服
