讲述：王维杰
新生活（1）
最重个还是书。林莉立勒办公位浪，拿书装进纸箱子里。
我来帮侬搬书，侬自家拿零碎物事。张潮讲。
葛末就麻烦侬了，也谢谢侬拨我纸箱。喂！我昨日加了一只群，里向侪是从大厦辞职个人，大家过得侪比老早好。伊笑着讲。看得出来，离职让伊邪气开心。
阿拉部门就侬一个男人，侬应该帮我搬个呀。伊还是照样笑嘻嘻个。张潮搿歇再刚刚发现伊调了只新发型，原来落到肩头个头发剪短了，纤细泛黄个头发像煞是涂了一层蜜蜡，闪着健康个光泽。
老大哥也是男人啊。张潮拿纸箱子封盖交错起来封好。
侬确定伊是男人？算了伐，交关人侪是是雌雄同体唻。伊压低声音讲。
搿我就勿晓得了。
声音轻一眼，办公室有得介许多办公位，让人家听到打小报告就勿好了。伊个食指竖勒嘴边讲。
啥人会得介无聊个啦？
我勒勒搿搭十几年，一些人呒没本事，就靠打小报告混日脚。告领导打小报告来提高自家个地位嘛。伊笑嘻嘻个讲，好像老早就看透了大厦里个一切。
勿管伊拉。其实老舍勿得侬走，阿拉搭档蛮融洽个。
还会得招新人来个，侬会得有一个年轻漂亮个新搭档。
到辰光还要培训，勿会像侬一样涉猎广泛，还会得帮我润色稿件。
先搬伐，顺便让侬参观参观我个小房子。隔手阿拉再一道去版房，修改我编辑生涯中个最后一期。
张潮搬起箱子，发现箱底承受勿了书个重量，伊只好拿箱子横勒海搬。
搬得动伐？老重老重个。伊问。
我腰板还可以。讲发讲发，两个人就朝大厦电梯走过去。
伊个小房子就勒勒文化路浪，估计当初买房子个辰光觉着会得勒勒大厦做一辈子，再选勒搿只位置。
小房子一室一厅，生活设施一应俱全，比张潮勒文化路另外一栋大楼里租个单间大得多。张潮拿装满书个纸箱子摆到客厅电视柜旁边，茶几浪向也堆满了书。一个与书为伴个女人。
有眼眼乱，懒得收作。小囡勒勒我姆妈伊面，我上班呒没辰光照顾伊。伊讲。
蹲勒单身女人个房间让伊浑身勿自在，放好物事就退到了门外。
再去搬伐，办公室里还有书唻。伊勒勒门外头讲。
勿搬了，办公室个书是留拨侬个。多看看书，勿要让工作耗光了侬个灵气。伊锁好房子个木门搭仔外头个防盗门。
伊天仔个天气又闷又热，浑身勿适意，手节头个缝缝里也是湿哒哒个，像煞是沾了女人身浪向个啥个物事。夜快头个辰光，张潮又去兰媄发屋，享受一下微小个消遣。勿远个地方人民大厦负一楼个绅士会所有得更加大个消遣，小姑娘个裙子侪邪气短，伊晓得伊面勿是自家应该去个地方。老干部们勒勒楼浪向开好会，伊拉介辛苦，当然要到地下室去放松放松。伊自家寂寞个辰光曾经去过一趟，只要付钞票，就可以随便寻一个可怜个小姑娘压勒身下，像只狗一样，喘一阵粗气潦草了事，还担心传到坏毛病，实在是糟糕个体验。
朗读者
往期回顾：
图：网络 / 编辑：渺渺
联系客服
