归去来（十）

讲述：周恋云

归去来（十）

作者：欧阳德彬

来源：渡十娘

沪语改写：边秦翌

沪语讲述：周恋云

推荐：丁迪蒙

新生活（2）

第二天张潮上班个辰光，旁边个台子已经空脱了。伊收到一批出版社邮寄个新书，很快就投入到日常工作当中去。老大哥坐勒靠窗个位置，戴勒一付油腻腻个大耳机盯牢仔电脑屏幕。

年底个辰光，张潮已经还清了信用卡，还有了一笔小小个存款，搿眼钞票勒勒外人眼睛里向可能是微不足道，伊倒是心满意足。伊打算每天夜到去健身房，练得告拳击手一样强壮。就算有朝一日辞职个辰光心情好，呒没打啥人一顿，肌肉呒没派到啥个用场，伊也勿想让愚蠢个大肚皮破坏自身个美感。

一封关于内退个文件勒大厦里引起一阵骚动，交关人勒勒抢内退个名额，各种关系也开始悄悄走动。抢到个闲话，就可以享受事业单位退休待遇，退休金告正常上班领到个工资基本持平。错过搿趟机会以后再退休个闲话，就只好按照企业待遇了。大厦里个改革一歇歇大张旗鼓，一歇歇潜移默化，每日天侪勒勒变化，每个人侪勒勒担心自家盘子里个奶酪。前头办公桌顶勒副处级头衔个老丁，十天半个号头看勿到伊来一趟单位，也呒没看到伊做眼啥个事体，必过人家台子浪个工资条数目一度大得惊人。新个考核办法实施之后，伊个收入一记头落下去了，伊个办公台子也呒没收作就快点内退了。

办公室天花板浪向个老虫像滚雷一样穿过，让人觉着大厦里潜伏勒一支老虫大军。有辰光，台子浪向个书也拨老虫啃成功碎屑屑。打印机里偶然也会得钻出老虫，吓得正勒勒打印文档个半老徐娘发出少女个尖叫。勿止一家灭虫公司派人来过，侪呒没办法彻底解决，还是照样无济于事。

我也要退休！最晏最晏三十五岁一定要退休！张潮翻开一本书，假装勒勒看，心里迓迓叫个盘算。交关人眼痒张潮个工作，上班就看书，接触个侪是志同道合个文化人。当然，看指定个书，勿能随心所欲。有一趟张潮拿出一本自家欢喜个书看，拨老大哥发现了，老大哥讲，上班辰光覅看搭工作无关个书，想要看闲书，自家辞脱工作回去看。哼哼，搿是早早晏晏个事体。张潮心里想。老大哥常庄勿厌其烦个唠唠叨叨，讲，啥个年青人勿要好高婺远啦，要脚踏实地好好叫做生活啦。