作者：何菲
改写：周红缨
讲述：王幼兰
小姊妹是吉林人，伊个先生是昆明人。轮着到婆家过大年夜，就总归是平淡而失落个，因为呒没辞旧迎新个饺子。捱到年初二、天还呒没亮，伊就会出发，踏上回东北娘家个归途，哪怕航班要经停西安，哪怕到屋里向已经是夜里向八九点钟了，但是，一想到一家门围勒海包饺子个场景，一路风尘霜雪就化作了无尽个动力。
伊个娘家是个大家庭，等伊拨阿哥阿弟接到屋里以后，娘家正式开席。丰盛个酒菜只不过是前道，轰轰烈烈个永远是饺子。过脱仔夜里十点钟，男人仍旧勒吃酒、吃菜，女个呢，就开始弄饺子了。和面、擀皮子、调馅子，包饺子，剥大蒜，硬币消毒……小囡也凑勒包饺子个队伍里，打打下手。接近零点，第一镬子饺子就烧好了。新年个气氛勒迭个一刻拨推到了高潮。
迭盘奔走了大半个中国、隔了一百多个日日夜夜再吃到个饺子，搭伊个食物属性已经呒没多少联系了，搿是团圆个符号，是故乡个图腾。是勿是欢喜吃饺子，老里八早就勿重要了，重要个、是伊搭家庭个关联。中国人含蓄，一句“想吃饺子了”，其实讲个是想屋里向了。而海外游子，勿管是中国啥地方个人，最想屋里个辰光，一般性侪会得去吃饺子。
勒北方，每家每户侪有各自个包饺子个秘方。即使平常勿善长烧饭，对包饺子却有一种类似宗教仪式一样个虔诚。饺子皮必须是自家擀个，摆多少黑面粉、多少精白粉加多少水，馅子里摆多少肉、多少蛋、多少开洋、多少韭菜，侪有一套家传古法。
天津个素饺子“津味素”素雅清鲜，让人觉着好看勿过素打扮。胶东半岛个鲅鱼饺子软糯，墨鱼饺Q弹，大连个海胆饺子颗颗爆浆，是我吃过个海味水饺个杰出代表。
陕西酸汤饺个点睛之笔，是泡了饺子个埃碗开胃酸汤。而勒山西，老陈醋搭大蒜是饺子勿变个灵魂。
北方冬至有得吃饺子个习惯，弄得现在个上海人冬至也开始吃饺子了。勒南方，饺子个食用意义远远大于文化情感个附加意义，并且改良了造型搭仔饺子皮个厚度。锅贴，一直是海派饺子个主流，搿种生煎饺子其实是生煎馒头月牙形个变种。
广东虾饺，饱满弹脆个虾，包勒盈透个皮里向，是早茶“一盅二件”当中个“常在”。四川钟水饺是扁平个纯猪肉水饺，饺子皮邪气薄，浇点红油辣子花椒香菜等搅拌调味。意大利面食Ravioli相当近于饺子皮对折不打褶个钟水饺。
周作人讲，“中国南北两路个点心，根本性质上有一个很大个区别。简单个下一句断语，北方个点心是常食个性质，南方个则是闲食。”
据讲，唐朝以前饺子、馄饨呒啥两样，饺子搭馄饨侪源自于北方，后来，馄饨慢慢形成独立风格，勒南方发扬光大、并且形成勿少分支：粤港云吞，福建扁食，四川抄手，江西清汤……。馄饨搭饺子透露了南北两种膳食文化及人文特色。饺子实在，馄饨精细，饺子强调馅料，馄饨讲究汤料，从外形来看，也好看出北方人个爽直搭南方人个灵秀。
粤港云吞面通常由三箸竹升面配四颗弹牙个云吞、以及由鱼虾猪骨熬制个汤底构成，再洒几根韭黄，勿但鲜香浑然天成，份量也是刚刚好个：勿会忒饱却又可以解馋了。南方人大多数是汤迷，一碗馄饨勒汤水里飘浮如云，勿管视觉、嗅觉、味觉，侪是一种享受。
往期回顾：
图 / 编辑：渺渺
联系客服
