我个上海 来自渺如胭 00:00 07:44
沪语朗读：苏凯音
我个上海（上）
来源：网络
改编：丁迪蒙
朗读：苏凯音
用几千个字写座城市是桩勿明智个事体，何况搿座城市叫上海。上海忒大了，大到所有个结论侪勿成定论，所有个意见侪成了偏见。但是也没关系，一千个人眼里向就有一千个哈姆雷特，我讲个只是我个上海。
对上海个记忆要从弄堂开始。
弄堂有交关名堂。斯文里、大庆里伊能个叫石库门，九江里、八埭头伊能个叫广式里弄，静安别墅、霞飞坊是新式里弄，上方花园、凡尔登花园则属于花园式里弄……
无论是石库门还是洋房，开头辰光侪是（蛮）气派个，人与人之间保持勒蛮体面个距离。后来轧进了忒多人家，葛就从大户个独门独院，变成了市井“七十二家房客”，生存环境逐渐逼仄（了）。上海人就被迫练出了螺蛳壳里做道场个功夫。
灶披间搭卫生间侪是四五家人家公用个，居民要争马桶，争水龙头，争楼梯转角里向个半尺空地，长年累月吵闹勿休。啥人家晾衣服多占地方了，啥人家汏菜多用水了，大家侪看辣眼睛里向；阿里个皮小囡拨打了，阿里一对夫妻勒床浪向声音大，侪是公开个秘密。家庭妇女碰勿碰就骂山门，一骂呢，就拿自家屋里个家底露出来了……。山东人泼辣，苏北人野蛮，苏州人促狭，宁波人刻薄，各有各个招数，各领各个风骚。也难怪伊拉，往上头数三代，其实侪是外地来个人。
落雨了，吵得最凶个邻居会得帮忙拿衣裳收进来。啥人家屋里做了好个菜，一定会得送拨邻舍隔壁，来来来，盛一碗拨小囡吃。东家个宁波汤圆，西家个梅干菜烧肉，亭子间里个咸鸭蛋，后厢房个赤豆粽子，我是吃百家饭长大个。
1997年梅陇镇广场第一个夏天，附近弄堂里个居民跑过来吹免费空调。外婆讨厌争抢马桶个日脚，常庄搭我讲：“明明啊，跟外婆到梅陇镇去上厕所好伐？”四年以后，中兴泰富广场搭仔恒隆广场侪造好了，外婆就有眼看勿上梅陇镇：“到底是恒隆个厕所嗲呀，邪气清爽，还有音乐听听。”问题是，用外婆走路个速度，步行到恒隆至少要十分钟。所以伊要有提前量，稍有感觉，就要出发。屋里向人笑话伊，伊一撇嘴：“有啥好笑头啦？搭我一样个老头、老太勿要忒多咾。”安乐坊有个老头子，每日天带只茶杯、带张报纸，适适意意坐辣厕所外间个沙发浪，一坐就是一个下半天。
讲上海人精明但是勿聪明，还是有点道理个。上海人勒勒“佮算，勿葛算”当中，拿自家毕生个聪明才智用光了。
上海人最放勿下个，是搿个人间个烟火。
老清老早，菜场里就邪气闹猛了，早锻练回转来个老伯伯，胖乎乎个脚搭仔露勒半胸口个少妇，着仔睏衣“头势”还邪气清爽个爷叔，一个一个走过来，轧来轧去看，货比三家，讨价还价以后，各自拿好战利品回去了，面孔浪向有少许欢喜。
大姆妈拎勒热气腾腾个豆浆、粢饭，搭邻舍隔壁大声抱怨：“喏，搭囡儿带个呀。一把年纪嫁勿出去，书读到研究生有啥用噢，还要我搭伊买早饭。”
白发苍苍个阿婆挑了交关辰光，拿了一颗最最小个花菜问摊主，“好切一半勿啦？我就一家头吃呀。”
夜市呢，就要冷清交关了，摊主已经忙仔一天了，现在侪懒洋洋坐勒，像只拨解了冻个蹄髈。落班个爷叔熟门熟路寻摊头，车把浪向挂条两条带鱼回去烧。
一面孔疲倦个小白领呢，对牢仔一堆陌生个蔬菜，勿晓得哪能办法？其实啦，自家能够买菜来烧个小白领还算是蛮幸福个。搿座城市里向有交关年轻个打拼者，大多数人只好用便利店个饭团、面包、微波炉饭来填饱自家个肚皮。混得好个呢，可以去吃伊眼贵得要死个“商务套餐”。
本公众号最近发布的原创：
图片来自渺渺
联系客服
