有人話米芝蓮係鬼佬口味，亦有人話佢係死亡之吻，但作為國際最具權威嘅飲食指南，米芝蓮依然有佢值得參考嘅價值嘅。2017米芝蓮一、二、三星餐廳嘅名單就要等11月9號，但日前大會率先公開咗車胎人美食推介（Bit Gourmand）名單，即係評審選出烹調同選料用心，但消費喺$300或以下價錢相對相宜嘅餐廳。呢63間當中就有4間係新上榜，即睇介紹Mark定心水，趁未有大排長龍之前去試下先！
可能係香港最好食嘅Pho Brass Spoon
近年越南菜館喺香港越開越多，灣仔呢間就以越式牛肉粉（Pho）做主打，點單紙好似部分日式拉麵店咁畀客人揀配料分量同追加Topping。唔少食家都大讚佢地嘅河粉超滑溜又煙韌，牛肉亦嫩滑富牛肉香味。牛股湯底夠清不過稍欠鮮味，唔怕肥膩嘅可以加牛湯油增添濃香。想食飽啲仲可以試埋佢地嘅蒸粉卷同越式三文治。
優雅精緻上海菜 留園雅敘
灣仔呢間上海菜館其實係之前灣仔留園飯店嘅年輕版本，保留上海菜嘅精髓同時揉合西式感覺，出品更精緻討喜。開業以嚟水準都一直保持得唔錯，曾經喺2010年成為港澳米芝蓮精選食肆，今年就首次列入車胎人美食推介。唔少食家推介嘅必食菜式有黑松露蝦仁、蟹粉小籠包、醉蝦同燻蛋等。
意大利家庭菜餐廳 CIAK - All Day Italian
太古城呢間意大利餐廳其實係中環米芝蓮一星餐廳CIAK - In The Kitchen嘅分店，同樣由米芝蓮三星大廚Bombana出任總廚顧問，半自助形式更Casual。主打家庭式Pizza、自家製意粉、麵包同甜品等等。能夠成為車胎人美食推介，定價當然唔會太離地，不過唔少食家都話食物分量偏細，計返CP值就爭咁啲啦。
私家飯堂Hidden Gem 星記海鮮飯店（中環）
呢間飯店唔單止唔少名人都曾經係座上客，亦係唔少食家嘅best kept secret。飯店主打各款小菜，食材亦經過精挑細選，所以就連例湯都相當出色。名物包括杏汁花膠燉豬肺湯、拔絲鳳梨生炒骨、鮑汁蝦籽扒柚皮同輝哥煎咸雞等。而且叫得海鮮飯店，佢地嘅海鮮菜式亦唔輸洩，豉油皇中蝦同椒鹽鮮魷都係唔少食家心水。
開飯編輯推介：
2. 9月份好評餐廳十強
熱門文章推介：
1. 一齊滾起佢！季選任食火鍋
联系客服
