作者：杨敏捷
改编、朗读：天亮
文字编辑：麦小姐
图片来自网络
[由于公众号平台赞赏功能规则有变化，如想打赏，可长按打赏码（页面下方倒数第2个二维码），多谢朋友们对“麦唐作”的支持！]
[上海话朗读]
侬白相过扶乩[口伐]？喏，侬一看到迭个标题，大家可能会有得一个错觉，暗地里啊，会觉着好笑。老杨伯伯迭个老头子，看上去蛮斯文个一个人，哪能弄得来老不正经个问搿能样子个问题呢？其实呐，㑚确实误会了，迭个字读“鸡”个音，得㑚想象个埃个字，上头呢少了一撇，伊勿读“乱”。乃末，得大家呢打个朋，哈哈，大家侪勿是文盲，相信勿会去犯搿种低级错误。
“扶乩”迭两个字，比较冷僻，交关人可能勿熟悉。但是，侬讲伊陌生，其实一眼也勿陌生，交关古书里或者老个以农村题材拍个影片当中，大家或多或少从中呐晓得一眼。侬讲伊勿陌生，也许也有交关人晓得了蛮少、或者一眼也勿了解。迭个也难怪，现在生活辣大城市里个年轻一代，伊拉根本呒没机会去接触搿眼物事。日脚一长，就连我伲迭个一代人也一眼眼个淡忘了。
乃末讲仔老半日，大家呢可能要拨我搞得来云里雾里，勿晓得到底侬要讲点啥。其实呐，说白了，就是我伲从前乡下农村里向个人搞个一种迷信活动。我伲本地人称伊为“扛门臼娘娘”。当然咾，还有一种叫法叫“筷仙人”，得伊啊，有眼类似。乃末迭个两种之间啊，迭个意思是差不多，用官方言话讲呐，伊拉侪是一个范畴，统称叫“扶乩。勿过末，“扛门臼娘娘”啦，伊有时间讲究，一般来讲，辣辣每年个正月半做个呐，比较准一眼。而做“筷仙人”，勿受时间限制，随时随地随机可以进行个，方便又易于操作，所以更加拨了大家所接受。乃末，农村人普遍相信迷信，尤其是偏远个乡下头更是搿能样子。
我个老家地处于嘉定脱了宝山个结合部，伊算是嘉定个边缘地区。一般生活辣迭个地方个人，得城边浪向个人啊，总归是慢一拍。其实末，伊得嘉定城中心个距离也不过是十几公里，侬踏脚踏车个言话也不过是一个多钟头，应该勿算遥远，也勿是邪气闭塞。搿能样子个一个小地方，咳，勿晓得啥辰光脱了封建愚昧啊，划上了等号。我伲此地呢，至今仍然保留着搿一古老而神秘个占卜文化搭仔传统。我有得一趟回到乡下，呒没事体，立辣辣老家个洋泾桥浪向，看看对过宝山地界个面貌，高楼大厦是一幢又一幢，原本啊，弯弯曲曲狭窄个乡间小路，现在侪已拓宽成了柏油马路，车来人往，一派生机勃勃、富强繁荣个景象。再回过头来看看河个西岸，仿佛是“新旧社会两重天”，我伲搿面仍然是七八十年代个一副旧模样，几十年来几乎是呒没啥个变化。迭个辰光啊，落后得仔先进、贫穷得富裕，瞬间，叫“泾渭分明一目了然”。两岸个差距搿能样子之大，是我呒没想着个。我伲嘉定曾经是“全国首富之县”，也曾经交关有名气，风头出足。但是，勿晓得从啥辰光开始，“大众”慢慢落后于“宝钢”了？落后往往就成了“愚昧”个代名词，而愚昧就自然而然会得了封信迷信挂上了勾。
前两日，我大个阿妹抱着伊个孙囡来我伲屋里向。一踏进家门，伊就拉着我个老婆进到里向个房间。隔着门，我听到伊得我老婆讲：“阿嫂啊，小囡又生毛病了，阿会得碰着‘赤佬’了？吃药勿见好，我想末，请侬陪我一道到‘仙人’埃面去。”还呒没等我老婆答应，我啊，赶忙阻止伊拉讲：“瞎七搭八！有病勿去医院看，看啥个‘仙’啊？”
“噢哟，阿哥啊，侬勿懂，迭个“仙人”末讲得蛮准个。”我伲大阿妹显得交关固执。乃末我毫勿客气个对伊讲：“再准，也勿会有医生准！勿要耽误小人个病情，赶紧去医院里向去看看！”乃末就搿能样子呒没办法，伊拉只能听我个言话，马上呐乘仔地铁，去上海儿童医院。但是夜里向回到屋里啊，伊拉仍然用“筷仙人”个方法占了一卦，可能得到个答复并勿是邪气满意，于是伊拉仍旧怀念过去个“扛门臼娘娘”个绝活。
联系客服
