题记：吾就是一个土生土长个上海人，今早仔，吾就决定采用上海方言俚语词语，唻撰写一篇搭各类人事物情有得关系个文章，吾还觉着，要是用方言唻写文章，也是属于邪气有意思个一桩事体！
勒拉吾个城市，有得一段辰光邪气欢喜讲讲“朋友”迭句口头禅，勒拉搭对方讲事体个前头，眼扳数先要讲讲“朋友”迭个词语。
勒拉老底子，上海人还欢喜讲讲迭能一句闲话，覅是讲：“到上海去伐（不）”，就是勒拉迭句闲话个前头，再去添加“朋友”迭个词语，就变成为“朋友，到上海去伐（不）！”朋友，当侬听到有人勒拉开口讲迭句闲话个辰光，勒拉内心深处弄嘞覅好还会得去产生一眼眼疑问打上一个大大个问号唻哦，并且还会得因此去“认为”，要么讲迭句闲话个人，伊大概覅是上海人，是从外省市过唻个人，要覅然个闲话，伊哪能会得讲得出迭句闲话唻啊？！要是伊是一个正宗个上海人，是“坚决覅可能讲迭句闲话个”，实际浪向“到上海去伐（不）”，是吾伲上海人勒辣老底子每隔一段辰光眼扳数要讲个一句口头禅，而且使用频率是邪气多个，只畀过今朝仔很少有人再去讲伊而已！
勒拉上海滩浪向有一条江就叫做“黄浦江”，勒拉老底子个上海滩浪向，基本浪向就是以黄浦江为界线个，只要是黄浦江以东就一律畀叫做浦东，黄浦江以西就一律畀叫做浦西。“到上海去伐（不）”，主要还是指居住勒拉浦东地区个浦东人乘摆渡船过黄浦江到浦西去白相，因为勒拉掰搿辰光，勒拉黄浦江个上头，呒得啥个跨江大桥个，勒拉黄浦江个地下头，也是呒得啥个越江隧道个，浦东人去浦西，只好乘坐摆渡船，要是碰到冬天介迷雾天气，摆渡船还要停航唻！
勒拉老底子个辰光，勒拉跨江大桥搭越江隧道还呒得建成个前头，对于浦东地区个浦东人唻讲伐，畀去黄浦区外滩看看情人墙、轮船勒拉黄浦江浪向往来穿梭、万国建筑群；逛逛原南市区老城隍庙豫园、黄浦区荡南京东路步行街、虹口区四川北路布店、大世界；僎叫做“白相（大）上海”，或“到（大）上海去白相”，覅仅是迭恁样子，甚至于浦东人畀凡是黄浦江个对岸（面），侪是统称为“上海”。
还有个就是，勒拉老底子个上海滩浪向，有得十大郊县搭十个区，迭个十大郊县分别就是指：上海县、川沙县、南汇县、奉贤县、金山县、松江县、青浦县、嘉定县、宝山县搭崇明县，十个区分别就是指黄浦区、虹口区、徐汇区、静安区、杨浦区、长宁区、普陀区、南市区、卢湾区搭闸北区。吾为啥要撰写迭能一段文字啊，就是因为吾还了解到迭能一种情况唻，就是因为勒拉掰搿辰光，只要是十大郊县里向个人，到黄浦区、南市区等市区白相，伊拉侪是会得讲讲迭能一句闲话个，唻讲道：“吾伲到上海去白（相）相伐（不）！”……
记得就勒拉吾读小学个辰光，外公倪根生外婆张榴妹个屋里向就是住勒拉原上海市川沙县洋泾镇永安街北凌家弄上头个，就是今早仔个浦东大道崮山路路口“一品粤珍”酒店个所在地，还勒拉掰搿辰光，吾覅只一趟听到迭能一句闲话哦，而且有得听到过好几趟唻，只要是洋泾镇浪向个老百姓，就算是跑到嘞歇浦路渡口，乘“宁歇线”摆渡船，到对岸（面）个杨浦区第三百货商店去购物买买各类么事，去松潘路小菜场买买小菜，啊一样会得称之为“到上海去伐（不）”，“今早仔吾（伲）到上海去买过么事嘞”。勒拉伊个辰光上海有得12爿百货商店，尽管原先勒拉浦东大道永安街路口啊有得两爿商店，面朝东个一爿是百货体育用品商店，面朝西个一爿是百货日（食）用品商店，镇浪向个洋泾镇西路同样啊有得一爿百货商店，但畀过对于镇浪向个人唻讲，更加愿意乘摆渡船到对岸（面）个杨浦区平凉路1489号第三百货商店买卖么事，【备注：第三百货商店就勒拉杨浦区工人文化宫个对面，杨浦区工人文化宫简称叫做“东宫”。】勒拉浦东人看唻，就算是到过上海嘞，迭个尤其是浦东洋泾镇人心目当中个上海滩嘞。
覅仅是迭能样子唻，2003年7月份－－2009年12月份个辰光，勒拉掰搿辰光里向，吾个工作地点就是勒拉浦东新区个凌桥地区，夯吧啷当也就工作六年多辰光，等日脚一长以后，吾还觉着迭个地方个人也是属于交关有趣个，凡是迭个地方土生土长个人，到草高支路乘“草临线”摆渡船去杨浦区五角场；到三岔港乘“三淞线”摆渡船去宝山区；啊同样称“到上海去伐（不）”“到上海去白相相”。
就从吾出生一直要到16岁往里，有得一半个辰光，是住勒拉原川沙县高桥镇上头个，另外一半个辰光，则是住勒拉原川沙县洋泾镇，即今早仔个浦东新区高桥镇、洋泾地区，虽然讲迭两个城镇，勒拉伊拉是属于原川沙县历史浪向个四大名城镇当中个两大名城镇，勒拉郊区地区，伊拉商业啊可以算得上是交关繁荣发达个，但畀过，覅管哪能去讲，毕竟还是勒拉浦东地区，搭浦西地区根本覅是一个档次个，绝对是覅好去相比较个，彼此之间个距离要相差十万八千里唻。
所以讲，勒拉计划经济个年代里向、勒拉老底子，浦东地区个老百姓只要是勒拉自家经济有一眼眼宽裕个条件下头、再加上还只要是有得嘞空余个辰光，想要买高档一眼、时髦一点、好一眼、带有品牌个各类么事搭商品，还是要到浦西去跑一趟哦。勒拉滑稽戏段子当中，也有类似个讲法，一段滑稽戏是迭能唻讲个，尽管有浦西老百姓搬迁到浦东唻嘞以后，还相信浦西地区个么事好，浦东地区个么事就是属于邪气推扳、覅大灵光个，要买卖各类么事，还是跑到浦西是来得比较好个，呒得想到个一桩事体，那就是－－结果等到自家买回到屋里向以后，僎发觉自家所买个么事搭商品，侪是浦东生产出唻个。
为此、为嘞能够更加好个说明迭种情况，还是就让吾唻例举几个方面个例子讲讲清爽伐。比方讲：去原南市区十六铺东门路45号第五百货商店【注解：第五百货商店今早仔已经畀拆忒嘞！】、原唻仔卢湾区淮海路903号第尼百货商店、原唻仔卢湾区淮海中路449号妇女用品商店、原唻仔黄浦区南京东路830号第一百货商店……凡是过往与种种人事物情，真个可以讲是举不胜举个。对于浦东地区个老百姓唻讲伐，个人搭家庭拥有嘞空闲个辰光以后，想要跑到外头去白相相个闲话，浦东地区个老百姓依旧是欢喜往浦西去跑一趟哦。假使讲浦东地区个老百姓，实在是覅想跑到浦西去嘞，但畀过又想出去逛逛买卖么事，那又该哪能去办呢？！吾伲还可以乘81路、85路公交车，到崂山西路、东昌路，勒拉掰搿辰光，迭个两块地方还归黄浦区管辖，各类商品啊算得上交关齐全个，勒拉浦东地区啊可以算作是两个购物个好地方哦。畀过，搭浦西做一个比较，还是有得一定个差距个！
勒拉老底子，相比之下而言，浦东地区个商业运转模式搭程度，远远较覅如浦西来得繁荣跟发达哦，交通啊呒得浦西地区来得方便便利哦！勒拉掰搿辰光，还呒得啥个越江隧道跟跨江大桥唻，浦东地区个人要想跑到浦西去白相相，只恁够去依靠摆渡船，去一趟啊覅是邪气容易方便个事体啊，一旦是碰着嘞大雾弥漫个大雾天气，摆渡船（自轮渡）还要去停航唻，“到上海去伐（不）”好算得上是一桩大事体嘞，所以勒拉去个前头，事先就要去盘算谋划好，看看天气么哪能样子、灵光伐？！还要成群结队三五成群唻，大家一道结伴同行。
勒拉掰搿辰光，也就是吾还是处在童年搭少年个时代里向，吾唯一有一位上海个亲眷－－大姨夫沈小兔搭大姨妈倪榴娣是居住勒拉虹口区东汉阳路上头个，就勒拉掰搿辰光个里向，吾个屋里厢是居住勒拉有得800多年历史、高桥古镇上头个，当辰光走到今早仔，吾依旧还能够清清爽爽个去记得迭能一桩事体，那就是－－每趟仔要是到大姨夫搭大姨妈屋里向去白相相个闲话，大清老早就要爬起唻嘞，眼扳数要勒拉七点钟前头出发个，最最晚个辰光也要勒拉早浪向7点钟左右，到81路公交车终点站上头等公交车，覅是先乘公交车到歇浦路站下车，去乘“宁歇线”摆渡船过江，再转乘22路电车或28路电车，就是乘81路公交车到民生路站下车，去乘“民丹线”摆渡船过江，再转乘22路电车或28路电车，到嘞大姨夫搭大姨妈个屋里向，勒拉绝大多数个情况下头唻讲伐，基本浪向已快要到喫中饭个辰光嘞！
到大姨父搭大姨妈个屋里向去做人客个闲话，往往是做人客一做就要做一整天，要是覅喫好夜饭个闲话，大姨父搭大姨妈是坚决覅肯让吾伲回去个。每趟仔等到吾伲侪都喫好仔中饭以后，辰光往往已经是到嘞下半日嘞，只要是一到下半日以后，勒拉绝大多数个情况下头，吾伲就会得搭大姨妈、大表姐陈翠英等亲眷，大家一道跑到四川北路上头，因为勒拉掰搿辰光四川北路就是属于一条邪气有名气个商业街，有得各式各样个布点搭商店，去荡荡马路买卖么事，勒拉老底子有得覅少个上海老百姓，邪气欢喜荡荡迭条马路买卖各类么事个，老底子还流行一句闲话叫做：“看看逛逛其他路，买卖请到四川路！”
吾还想去讲个闲话，那就是－－就算历史个滚滚车轮走到嘞今早仔，勒拉土生土长个老上海人，或多或少还照样是有得迭能一种看法个，还仍旧是要畀上海人区分出三六九等唻个。覅管辰光过忒有多久，吾还是能够去记得迭能一桩事体，勒拉吾孩童搭少年个辰光里向，每趟仔搭亲眷去四川北路荡马路个闲话，一跑到商店里向挑选各类商品、买卖各类么事个闲话，就因为讲闲话带有浦东地区个口音，营业员伊拉就会得带有看覅起个味道讲：“有得阿乡唻买么事嘞！”……
每趟仔到上海去白相相，回到屋里向以后，假使是有买过么事个，朋友、邻居以及同事看到以后，眼扳数会得围拢过来问问情况，侬迭眼么事，或侬迭件衣裳是勒拉啥地方买个？！迭个辰光讲闲话个人，伊个语气要比平常日脚硬气得多嘞，语调语气当中畀定会带着一份自豪感搭满足感个，回答道：“勒拉上海（浦西）去买个！”或者讲：“勒拉上海南京东路市百一店买个！”……迭个辰光覅要忒扎台型哦！【备注：“扎台型”是上海方言，是指“邪气有面子”个意思。】
吾还清爽个去记得，尽管原先洋泾镇建平路上菱冰箱厂对面有的一个蔬菜批发市场，勒拉掰搿辰光假使屋里有一眼事体，【备注：通常情况下头“屋里有一眼事体”是指：每过一段辰光所有个家庭成员聚集勒拉一道，喫饭、喝酒、嘎讪胡。勒拉掰搿辰光，无论是社会还是家庭，各种条件远覅如今早仔好，饭店也少，一旦有家庭大聚会，多数情况都是呆嘞屋里向，自家动手去做。】洋泾镇人宁肯到歇铺路乘“宁歇线”摆渡船过江，去对面松潘路菜场买卖小菜，啊不愿意去洋泾镇蔬菜批发市场，因为勒拉掰搿辰光，松潘路菜市场个品种多、货源邪气齐全、选择余地交关大，家父陆吉良带吾去过好几趟唻！
勒拉小辰光，吾个屋里向是居住勒拉高桥镇上头个，假使爷娘告诉吾明早仔吾伲带侬到上海去白相相，当天夜到头眼扳数高兴兴奋地睏覅着觉个，期盼天马上就亮起唻，就好到上海去白相嘞，假使一年到头能去六七趟已算是邪气幸福个事体！又假使交关辰光呒去嘞，自会得向爷娘央求道：“上海去伐，到上海去伐（不）？！”……
联系客服
