三唔识七
粤语嘅词语除咗有好多系同吃有关之外，亦都有唔少系同数字有关嘅，颇具地方特色。例如“三唔识七”、“九唔搭八”，仲有我哋之前介绍过嘅“二打六”。
“三唔识七”哩个词，来源于旧时广东地区比较流行嘅赌.博游戏“天九”里面其中一种玩法，叫做合十。玩家每人抽两张牌，加起嚟尾数为九点则最大，而十点等于零点，攞到就输硬嘅。玩家一旦攞到一张三点，绝对唔希望下一张系七点，所以就会大嗌“三唔识七”！
“唔识”，见咗面都唔认得 ，亦就系希望三唔好碰上七喇。后嚟，咿个词渐渐被用得越嚟越广泛，就变成咗形容两个人唔熟悉、互相唔了解嘅意思喇。
三口六面
喺粤语地区嘅人，若然人与人之间发声咗乜嘢争执、误会，需要当面澄清嘅话，通常都会话“我哋三口六面”讲清楚。点解讲清楚要用“三口六面”呢？
其实“三口”系指三个人三把口。因为若然得两个人嘅话，双方各执一词，公说公有理，婆说婆有理，又冇旁证，系点都讲唔清嘅，恐防仲会越讲越多误会出现。所以喺哩个时候就至少要有第三方在场，噉先可以做判定嘅。所以要讲清楚事情或者澄清误会就至少要有三个人三把口先得。而“六面”则指每个人有两块面，一共就系六面。面面相对亦即系当面讲清楚嘅意思喇。
十划都未有一撇
喺粤语里面，形容一件事离成功或完成仲差好远，通常我哋都会用到“十划都未有一撇”咿句口头禅嘅，“划”即笔画，“十划”究竟系边十划呢？指边个字呢？其实咿句话原本嘅讲法系“十字都未有一撇”，起源就系话以前啲人练字嘅时候，通常都喺先从练“横、竖”咿两个笔画练起嘅，即系通常都先练个“十”字嘅。若然系练得唔好，练嚟练去都仲系写个“十”字，一直都未开始练“撇、弯...”，噉就系“十字都未有一撇”喇，形容事情未有进展噉解，后嚟讲得多，就慢慢被讲成咗“十划都未有一撇”，用嚟表达事情离完成仲差好远。
喺粤语里面形容一个人胡说八道，我哋通常都话佢“乱噏廿四”嘅。“乱噏”喺粤语里面就即系“乱讲”，好易理解。但系后面点解会跟廿四（24）呢？而唔系14、34或者其它数字。原来里面系有少少含义嘅，读过九九乘法表嘅朋友都知道，三八等于二十四，“廿四”其实就系暗指“三八”，即系“喜欢讲是非嘅八婆”噉解。
联系客服
