上海老底子每天呈送精彩文章一组
打开尘封的记忆,寻觅往昔的岁月
叙上海老底子事 忆上海老底子人
诉上海老底子情
1905
上海会审公廨大案爆发
让人惊愕个最终结局
来源:上海故事周末茶座
作者:柯兆银
沪语改写:丁曙立
讲述:王邦基
审阅、推荐:丁迪蒙
编辑:王乙其
(上)
上海刚刚进入20世纪,1905年就发生了桩会审公廨案件,震惊天下,轰动中外,勒历史浪留下来了经久勿绝个回响。
搿桩案件是哪能介发生个?经过是哪能个?又是以啥个样子个结局收场个呢?
示威群众火烧巡捕房
12月17日下半日,法租界四明公所有一千多个人集会,要求撤换德为门,惩罚西捕头搭仔勒工部局设置华人董事,并且取消外国监牢。
最后一个上台演讲者喊:明朝关店停业,支持个人请举起㑚个帽子。马上有得近四百个人举起帽子,现场只看见一双双举得老老高个手臂搭仔一顶顶帽子。
会议主持人宣布明朝开始大罢市,台下头响起了一片“万岁”个欢呼声。
夜快头近6点钟,一份份罢市通知发到了租界里个各个商店。通知写:“英副领事令西捕头殴辱我官长,我居民鉴此,人人自危。若勿将此事办理妥善及限制工部局之权,将来租界无一可安居,无一步可安行……”落款为“沪商会启”。
12月18日大清老早,公共租界主要马路浪个所有华商商店侪店门紧闭,商人开始罢市了。上半日9点钟左右,南京路工部局老闸捕房周围(现在个南京路贵州路)搭仔工部局市政厅门前(现在个南新雅饭店),上千名群众聚集示威,要求租界当局处理大闹会审公廨事件个肇事者。
之前,巡捕房总巡布瓦斯辣根根据侦探个密报得出结论:中国人集会一次比一次混乱,可能会得爆发骚乱。伊搭工部局总办提议,为了防止暴乱,请求租界警务委员会同意向西人巡捕搭仔印度巡捕发放卡宾枪搭仔子弹,以备必要个辰光开枪制止暴乱。伊个要求得到批准。于是,当18号上半日示威群众到老闸捕房搭仔工部局市政厅个辰光,巡捕已经全部荷枪实弹上岗了。
上半日9点半开始,一大群示威群众开始围攻老闸捕房,巡捕挥舞警棍想驱散群众,10多次驱散行动侪呒没成功。半个钟头之后,群众冲进老闸捕房,放火焚烧,老闸捕房浓烟滚滚。警钟长鸣,工部局火政处个几部救火车老快就赶过来,但是火势已旺,熊熊烈火拿老闸捕房里向个家俱咾啥侪烧为了灰烬。
与此同时,示威群众冲向工部局市政厅,守候个巡捕奉命开枪,当场打煞脱3个人。群众听到枪声,稍微朝后退了,但仍旧呒没逃散,有人拾起地浪向个砖瓦,朝巡捕厾过去。一歇歇功夫,英国兵舰浪个水兵闻讯赶来镇压,示威个群众再开始逃散。
巡捕房总巡布瓦斯辣事后迭能叙述:“华人死于市政厅前者三人,死于南京路与江西路转角者一人,死于附近各处者三人,总计死者7人,因伤致死者数人,受伤者若干人。”
搿日天,德国搭仔比利时驻沪总领事外出,也受到了中国人个攻击;英国副领事德为门个汽车拨愤怒个群众烧毁。
搿一日天爆发个流血事件,总共有得18个华人拨打煞脱,几十个人受重伤。流血事件发生之后,万国商团个骑兵队、炮兵队搭仔步兵队等,荷枪实弹,勒公共租界主要街道巡逻,维持秩序。
上海道台袁树勋发极了,伊呒没想到事体会得发展到火烧巡捕房个地步,还发生血案。伊常怕事态继续扩大,无法控制,豪扫命令到处去贴出严禁暴动布告,宣称:“如再聚众滋闹,即是目无法纪,惟有严拿按律究治。”
12月19号,《申报》分别刊登了上海道台个严禁暴动告示搭仔安民布告,上海道台袁树勋到租界个主要马路,劝告华人商店开市。
中外瞩目,局面哪能收场呢?
较量之后个最终结局
就勒《申报》刊登上海道台告示个当天下半日,勒工部局顾问福开森陪同下头,工部局总董安徒生搭仔工部局警务委员会委员布拉特到了上海道台衙门,会见袁树勋。
福开森提出,恢复秩序个最好办法是捉脱一眼不法分子。双方达成协议,由巡捕房派40个巡捕随同会审公廨两名谳员搭仔差役,一道去搜捕闹事个人。
(下)
勒如何审理大闹会审公廨肇事者个问题浪,双方意见分歧严重。道台袁树勋提出,撤换会审官德为门搭仔捕头木突生。而安徒生认为:“撤换领事之职,非工部局权力之范围,此事只能由英国搭中国政府来解决。至于撤换木突生,木突生个行为是否属失职,工部局将成立一个调查委员会专门调查此事。”伊又讲:“假使调查委员会个调查结果对巡捕房勿利,葛毫无疑问伊拉将受到处分。”安徒生表示,目前阶段可以暂时让其他人替换德为门陪审,并提出,会审公廨马上恢复开庭审案。自从袁树勋下令会审公廨暂停审案以来,工部局监牢里关押个犯人已经是人满为患。袁树勋提出:一旦会审公廨重新开庭,女犯人必须送到公廨关押所。安徒生让步,表示同意。伊恳请关烔之等人劝说商人开市,恢复秩序。关烔之要求派50名英国水兵搭仔西捕、印捕听候调遣,安徒生一口答应。于是,关炯之带领英兵搭仔西捕、印捕骑马上街,沿途宣告:工部局巡捕房认错悔过,女犯今后勿再收押西牢了。
民众个愤怒情绪开始平息,社会秩序逐步恢复,但罢市、罢工还勒继续。
12月21号,清朝大员两江总督周馥到上海来。伊看到一天前公共租界商店已经恢复营业,还是高调宣示严禁暴动,同时发布安民告示。伊要求会审公廨重新开审。
12月24号,会审公廨重新开始审案,英国副领事德为门作为会审官出庭,关炯之发觉外方陪审官还是德为门,断然拒绝出庭,会审公廨个审案被迫再次告停。英国领事署看到搿能介个情况,勿得勿拿德为门换脱,由其他人代替伊担任陪审官,搿能,风波再算过去了。
最后,讲讲大闹会审公廨案有关人员个结局。
1906年2月初,会审公廨正式决定:今后女犯一概由会审公廨收押发落,并拿以前所押西牢女犯侪送回公廨;中外互派差捕到捕房搭公廨巡视,但巡捕勿准随便进入办公场所,廨差勿得进入巡捕房总巡个写字间;英国副领事德为门维持原职,副谳员金绍成拨免职。
呒没几化辰光,德为门调到镇江任职。
捕头木突生呒没受到惩罚,副谳员金绍成后来认出来,当天勒公廨殴打侮辱中国官员个西捕并勿是木突生,而是杨树浦捕房个捕头爱尔斯,原来个指认有误。
袁树勋离开上海出任江苏按察使,后来官路蛮好,从顺天府尹、民政部左侍郎做到了山东巡抚,1909年又到广东担任两广总督。伊呼吁召开国会,呒没拨清政府采纳,第二年辞官,定居上海。
关炯之赢得了国人一致赞扬,拨晋升到外地做官。临走之前,各商会学界纷纷特制德政牌、匾额送到公审会廨。关烔之起程,民众沿途夹道欢送。
火烧巡捕房个风波还勒继续,英国驻华公使以老闸捕房遭到焚毁,几家英商遭到袭击为理由,问清政府提出索赔8万两银子个要求。
两江总督周馥邪气担忧,伊勒致外务部个函电当中表示:“若议赔偿,则上海商学两界风潮必起。”主张拒绝英国个要求,讲:“断勿能循其所请,轻许赔偿,以致下拂民情,上损国体。”
两江总督搭清政府外务部一开始是拒绝个,后来还是退让了。1906年年底,双方终于商定了解决方案,由袁树勋以个人名义赔偿了英国5万两银子。
12月18号,德国、比利时两国驻沪领事外出,伊拉分别勒南京路、威海卫路遭到中国群众个袭击搭仔侮辱——伊拉也向清政府提出索赔要求。新上任个上海道台瑞徵表示,对西人个赔偿已经了结,呒没理睬,此事不了了之。
总之,大闹会审公廨一案,以中国人个失败告终。
英国副领事德为门搭仔巡捕对中国官员个猖狂攻击,会审官关炯之等中国人个临威不屈个表现,光彩夺目,值得赞扬。
我伲可以看到,大闹会审公廨案个爆发,有伊可以理解个原因搭仔应当个理由,但发展到火烧巡捕房、袭击德国搭仔比利时领事个地步,最后造成了失败。以正义个名义行事固然应该点赞个,但勿应该超出正义个范围,否则过犹不及,搿就是历史个惨痛教训。
作者:柯兆银
讲述:王邦基
丁迪蒙
迪蒙,启迪蒙昧者也。上海市人。原上海大学中文系教师,多年来一直致力于沪语和海派文化的传承。
沪语是吴方言的代表方言,是吴侬软语的典范。她既可以用来拉家常,也同样可以用来朗读各类诗歌散文。
沪语完全可以书写,同粤语可以写作是一样的。本平台所有文章都是经过改写后,用沪语来演绎的,汉字书写也是正确的。
丁迪蒙所撰写的,与沪语相关的著作主要有:
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》,少儿出版社。
转自:“启迪心田沪语”公众号
我知道你在看哟~
联系客服