老上海个故事
文章来源：网络
沪语讲述：和沁
（第二章）
点击下方收听音频，时长6分09秒。
搿天伊着勒件真丝个蓝底碎花旗袍，头发也盘起来了，是小菊帮伊盘个。面孔浪向扑了眼淡淡个粉，比起前个号头，真个是精神多了。
下半日个太阳光邪气轻、邪气软，也邪气暖热。
“少奶奶，搿个号头侬一直呒没出过门，到花园里向去走走伐。”小菊真个是乖巧，好像晓得伊个心思。伊微微一笑，就算答应了。
“少奶奶，侬还呒没吃过张妈做个下午茶点心伐，搿是太阿奶老底子最最欢喜吃个呀”。
一面讲，伊拉一面走到了一块墨绿个草坪浪，衬勒天空个蓝，草坪邪气像一幅浓厚个油画。一堆堆个绿，一堆堆个蓝，一堆堆个蓝绿。周围还种了交关邪气鲜艳个花，最多个还是蔷薇，一朵朵贴牢绿叶探仔头。芒刺也挡勿牢伊拉对阳光个热情。看了搿眼花，伊真想自家也是搿当中个一朵，至少勿会搿能介寂寞，至少勿会搿能呒没目的个活勒海。
“少奶奶，我现在就去叫张妈帮侬做好伐。”
“好个呀，我也有点饿了！”
伊朝小菊笑了笑，看勒搿个搭自家年龄差勿多个女小囡，心里向总归有种寂默。小菊活得倒比自家有意义呀。
坐勒白颜色个凉棚下头，像煞自家也浮华了，比起白颜色自家当然是浮华个。不过看了草坪前头清澈个水，云勒里向飘，天勒里向蓝。自家个心也就静了交关。
一歇歇个功夫，远远叫走过来一个人，看身段勿像是小菊，跑得介快，是勿是来寻自家个？伊立起来了。虽然勒凉棚里，但午后个阳光还是斜照进来，伊只好眯起眼睛看过去。噢，是李妈，因为过门呒没多少辰光，老是拿伊搭张妈搞了一道，两个侪是矮矮瘦瘦个老人。现在张妈应该勒搭自家做点心，葛就是李妈了。
“少奶奶，勿晓得少爷勒外头出了啥事体，巡捕房个人来了，讲要寻侬”。
看情况真个是出事体了，伊有眼慌，搿个丈夫搭自家有啥个关系呢？不过名义浪向自家还是脱伊有关系个啊。突然，又觉着有眼开心，再哪能，搿趟总归可以看到伊了伐。伊呒没讲啥，跟牢仔李妈邪气急个，加快脚步离开后花园。
大厅里立勒眼下人搭仔几个捕头，老爷也来了。到底是出啥事体了？哪能连老爷也拨叫来了呢？伊心里向一刻勿停个勒问。老爷因为身体一直勿适意，勒伊嫁进门之后就到檀香山去静养了，洋行个事体一直是交拨勒子轩管个。
其实，伊晓得自家个丈夫勒搭伊结婚之前有个相好个。听佣人小菊讲，子轩有个邪气欢喜个女人，只不过人家是个舞女，出生卑贱。开始是瞒牢仔老爷搭搿个舞女交往，但世界浪呒没勿透风个墙啊，还是拨老爷晓得了。老爷勿让伊拉继续交往下去，就逼牢伊结婚，搭自家结婚了。
丈夫搭搿个舞女个事体，伊勿想晓得，晓得了又有啥个用呢？只会得多眼怨气。伊也晓得就算结婚，丈夫也只是收敛一下，拨伊个父亲看个，搭搿个女人是勿可能断脱个。
伊走到前头去，曲了曲身体，毕恭毕敬个叫了声：老爷。
（未完待续）
沪语讲述：和沁
图：网络 / 编辑：渺渺
转自：“上海言话讲起来”公众号
联系客服
