老上海个故事
文章来源:网络
沪语讲述:和沁
点击回读
(第四章)
点击下方收听音频,时长7分54秒。
伊回到屋里向,又匆匆忙忙个出去了。勒老早伊是勿会得出去个,但是,屋里向出了介大个事体,啥人又会得去注意伊呢?佣人伊拉只不过觉着少奶奶可怜。以前是守活寡,现在倒是真个是守寡了。
伊呒没叫老赵开车子送伊,是一家头出去个。手里向夹了只包,叫了部三轮车,磕磕冲冲个融进了上海滩浓浓个夜里向。
勒一条又狭又小个老弄堂里,伊好像勒海等啥人。自家个老公老早对勿起自家,难道现在自家出来透透气也勿来三啊?伊看了看马路四周围冷冷清清,觉着自家从来呒没成为过啥人个老婆,自家还是埃个林家四小姐,还是埃个开朗而我行我素个大小姐。
一个男人朝伊搿搭走过来,戴勒一顶破帽子,一身行头看上去邪气穷困落魄。勒搿条陈旧个弄堂里,除脱仔碎个瓦片、断个石头,破个墙壁,啥人也勿会注意到伊拉俩家头,一个穿着光鲜个女子,搭一个邋遢来西个男人。
男人点了根香烟,勒迭个浓得化勿开个黑夜里向,火点发光、发热,看牢仔女人交关温暖。
“侬哪能拿张子轩也杀脱了?我勿是关照侬只要拿只贱女人杀脱就可以了嘛?”男人拿眼神深深个囥辣帽檐后头,怕露出来碰到伊个眼光。女人真想拨伊一只耳光,但辣末生头自家个心一记头痛了,讲勿定伊是看勿下去自家深爱个女人守活寡,所以拿怨恨全部指向了张子轩?勿过,伊拿张子轩杀脱了,乃末自家勿就真个守寡了吗?伊还是打了搿个男人,勿为张子轩,是为了自家。
“拨侬,到乡下头去避避风头,迭眼铜钿应该可以过几年了,等事体平息了,侬再回转来伐!”女人讲得老轻个,讲得邪气急。常怕拨弄堂里个风带出去坏事体。伊是聪明个,晓得迭个男人对自家死心塌地,就是搿眼丧尽天良个事体,伊也是呒没第二句闲话就帮勒办脱了。
男人拿过铜钿,从破檐帽底下看牢伊,迭个让伊用生命捧勒海个女人。伊也相信伊是爱自家个。伊想香伊记面孔,就搿能轻轻叫一记也好,勿过伊还是有点吓势势,伊吓自家忒龌龊,自家呒没迭个资格。
“走伐,越快越好”。女人推了推伊,叫伊可以走了,伊还是呆笃笃个立勒海,看牢女人埃只邪气急个面孔,伊看得出女人是勒为伊担心。
女人转过身,手里个包一晃荡,甩了弄堂个墙壁浪向。然后稍微转过来点面孔:“侬快走伐”!伊呒没拨男人任何承诺,伊呒没讲回来了我就跟侬过日脚,因为伊是个聪明女人,伊晓得伊只是自家东差西差个奴才罢了。老底子是,现在是,将来也勿会得变个。
男人走了,一个黑黜黜个背影旁边点烊了连牢勿断个烟,勒夜里向慢慢叫上升,看勿真切。只觉着啥个事体侪赛过隔了一个世代。女人穿出弄堂,跑到马路浪,叫了部三轮车。“去张公馆”。
(未完待续)
沪语讲述:和沁
图:网络 / 编辑:渺渺
转自:“上海言话讲起来”公众号
联系客服