（上）
上海开埠个第二年，咖啡豆就已经勒上海出现了；大作家田汉为咖啡写了一出戏，还大力宣传，讲要勒自己个书店里开咖啡馆；上海旧书店个前身是上海书店内经营咖啡馆个鼻祖……上海个书店，历来就有咖啡个情结。
当年沪上的欧裔服务员
勒上海，书店卖咖啡，追根到底是上世纪个传统。学者李欧梵勒伊《上海摩登》里写过：“最早勒勒20世纪30年代个上海，勒充满文化味道个公共空间里，咖啡拨证明是流行个都市景观。”
迭段历史还是邪气风趣个，书是记忆个追悼，配上咖啡，从中调和出个几分浪漫，几分倔强，几分温馨，几分柔情，一定会让读者忘记勿脱。
学者孙莺勒伊《近代上海咖啡地图》当中考证，1844年，上海开埠个第二年，咖啡豆就已经勒上海出现了，而到了1876年，咖啡进入了上海人个日常饮食生活当中。20世纪20年代到30年代，上海个咖啡馆数量一记头多了起来，迭个搭当时个战争有关。俄国十月革命、一战、二战、“八一三”事变，直接导致了居住上海个外侨人数增加。
光明咖啡馆的广告
迭个辰光，勒上海法租界个中心位置，马斯南路115号（今思南路81号），1927年，爷搭儿子一对，爷叫曾朴、儿子叫曾虚白，一道开了一家叫“真美善”个书店。
有趣个是，曾朴对于“真美善”个灵感，直接来源伊对法国浪漫派作家个印象，迭个写了近代畅销小说《孽海花》个翻译家，伊从来呒没去过法国。
勒真美善书店，几乎每天下半日，曾家个爷搭儿子搭一群志趣相投个朋友，边吃咖啡边讨论伊拉欢喜个法国作家。有人拿伊拉称为“真美善”文人群，请记牢迭些名字，迭些闪闪发光个人，勿仅欢喜文学，更加欢喜咖啡。迭些人多数是作家、诗人、大编辑，像邵洵美、徐志摩、田汉、郁达夫、张若谷、朱应鹏咾啥，而像李青崖、徐霞村、徐蔚南咾啥，是后来一代邪气有名个翻译家。
曾朴（1872年-1935年）
不过有眼可惜个是，真美善书店末节还是因为呒没经营好，勒1931年秋天关门了。过了几年，曾朴离开上海回到常熟老家，专心园艺，咖啡当然是吃得少了，从此以后，伊再也呒没发表过任何翻译作品，苦心经营个精神家园也呒没了。
金屋书店个老板屋里，也有迭能一只吃咖啡个客厅。金屋书店，1928年开办，老板叫邵洵美，书店地址勒静安寺路（今南京西路）斜桥路口。
上海图书馆向西，淮海中路1754弄里向有几十幢花园洋房。迭片花园住宅， 勒1916年造个。邵洵美住勒淮海中路1754弄17号，下半日三四点钟，朋友三三两两过来，勒伊个客厅里吃咖啡、聊文学。
邵洵美（1906年-1968年）
也有人拿迭批人称作“金屋”文人群，其中有施蛰存、徐訏、林徽音、孙大雨、全增嘏、徐迟咾啥，抗战胜利之后，常庄来吃咖啡个还有钱锺书、许国璋、陈少云、桂中枢、章克标、林达祖、姚苏凤咾啥。
大作家田汉为咖啡写了出戏，还大力宣传，讲要勒自家个书店里开咖啡馆。迭桩事体是由一个邪气仰慕法国文化个作家推动个，迭个人叫张若谷。伊是上海咖啡馆个头号粉丝，用自家个力量，推动了“文艺咖啡”个潮流，引发了一批文人争相开咖啡店个风雅事。
1927年11月，张若谷勒《申报》浪提出“到咖啡馆去”个口号，号召大家到咖啡馆去谈文艺，打造上海本土个“文艺咖啡”，影响邪气大。张若谷个好朋友、《申报·艺术界》主编朱应鹏也勒《申报》浪开出“珈琲座”个栏目，谈论文艺搭八卦。1929年，张若谷拿自家关于咖啡个文章，写成出版了本书《珈琲座谈》，为迭股“文艺咖啡”个火，添了把柴。
淮海中路1754弄旧址
迭能热闹，欢喜咖啡个文人，自然也要下海办起咖啡馆了。张若谷勒《珈琲座谈》里迭能讲：田汉心里也想试试，勒“珈琲座”栏目刊出书店登广告，并且“训练懂文学趣味个女招待，使顾客既得好书，复得清谈小饮之乐”。
（下）
南国书店应该勒田汉创办个南国艺术学院里向。1928年初，南国艺术学院勒上海诞生，地址勒上海法租界西爱咸斯路371号（今永嘉路371号），搭沿马路个371号到381号。永嘉路371号，迭条弄堂里向亨八冷打只有三五幢石库门式样个房子，除脱房东自家住一幢以外，其他侪租拨学堂作宿舍，乃末弄堂口就成为了南国艺术学院个大门。
其实，勒1920年，田汉就写了出戏剧《咖啡店之一夜》，迭个大概是目前看到个第一只关于咖啡馆个文学文本。一开头，田汉就对咖啡馆作细致描绘：
精致个小咖啡店，正面有置饮器咾啥个橱，当中嵌了面大镜子。前头有柜台，上头摆咖啡、牛乳咾啥暖罐以及杯子盘子，当中有菊花，瓦斯灯下头黄白争艳。两面墙壁浪挂油画搭广告画……
当然，迭个是田汉脑子里“文艺咖啡”个溯源，后来伊个作品里，出现了勿同个咖啡搭咖啡店。作为左翼作家个伊，对“文艺咖啡个看法自然也有所改变，迭个勒后来个1926年伊筹拍个电影《到民间去》当中有所表达。电影开始，革命青年聚勒一家咖啡馆里，迭个安排好像邪气有深意：有追求、有理想个大学生，勿能做慷慨激昂个口头派，要从浪漫个咖啡馆走向现实。
学者陈祖恩勒《上海咖啡》里考证，1930年2月，开设勒西门书店二楼个西门咖啡，是上海最早由书店开个咖啡座。西门书店是创造社成员周全平个，地址是南市老西门（今中华路盐城路一带）。可惜，只坚持营业了半年，最后勿得勿放弃咖啡售卖业务。
周全平咾啥个创造社成员，对咖啡热爱是有据可查个。
1927年8月前后，创造社出版部搬到北四川路之后设立了门市部。作家郑伯奇回忆：创造社勒门市部楼浪还成立“上海珈琲店”。1928年7月，《新闻报》搭《申报》侪登载过“上海珈琲店”招聘女招待个广告，广告个地址或者写作“北四川路518号”，或者写作“北四川路老靶子路北”。根据上海社科院章斯睿考证，应该勒现在个四川北路虬江路一带，开业辰光是1928年8月个一天。
“上海珈琲店”摆勒今朝，绝对是网红中个网红，再加上创造社金字招牌个加盟，一开业就吸引上海邪气多个文艺青年。据讲，当年“上海珈琲店”还用了霓虹灯招牌，“领风气之先”。不过，创造社个咖啡忒贵了，要“二角大洋一杯”，大多数文艺青年钞票少，告咾几个号头之后，生意就勿好了。1929年7月，创造社勒报纸浪刊登广告“全盘招顶”。8月“招顶”广告又登了一趟。从此就呒没“上海珈琲店”个消息了。
1928年，创造社大将张资平勒北四川路开了家“文艺咖啡”。据讲结局搭“上海珈琲店”差勿多，“文艺咖啡”从开业到停业也只有一年左右。有意思个是，西门书店二楼装个咖啡座“火车座”，就是勒张资平个“文艺咖啡”倒闭以后转移过去个。学者陈祖恩觉着，西门书店个咖啡馆半年就关门，主要还是当时两个地段商业价值勿一样，北四川路比南市老西门更加有咖啡消费氛围。
勿再卖咖啡个西门书店，到1950年改名群众书店，之后又迁到勿远个地方，改名为上海旧书店，一直到现在还勒经营。
据讲，创造社成员开个咖啡馆，鲁迅先生也曾经去过，伊勒搭创造社打笔战，还写了有名个《革命咖啡店》，我想，伊勿是去“吃咖啡”个，应该是去“踢馆”个。
讲述：朱友好
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
转自：“海上梦叠”公众号
我知道你在看哟~
联系客服
