上海老底子每天呈送精彩文章一组
打开尘封的记忆，寻觅往昔的岁月
叙上海老底子事 忆上海老底子人
诉上海老底子情
上海曾经有过一条
薛家浜
来源：黄浦文博
作者：薛理勇
改写：丁曙立
讲述：耕耘
修正、推荐：丁迪蒙
编辑：王乙其
靠近南浦大桥个地方有条叫作“薛家浜路”个小路，伊南面接油车码头街，西北面接青龙桥街，长大约摸500米。
我几趟提到，历史浪个上海是水乡城邑，水渠纵横，池塘密布，现在上海有勿少带“浜”个路名，譬如肇嘉浜路、方浜路、陆家浜路咾啥，搿些马路往往就是填脱原来个河浜造起来个，薛家浜路弯弯曲曲个，显然也是迭能造起来个。不过，历史浪个薛家浜比现在个薛家浜路长得多了，今朝阿拉就来讲讲薛家浜个故事。
薛家浜，勒明朝《弘治上海县志》浪个记录只有一句：“薛家浜，在二十五保”。清朝个《乾隆上海县志》记录就详细多了，大致是：薛家浜是黄浦个支流，横贯上海县治，明嘉靖年间建设上海城墙个辰光，勒小南门开了座水门，薛家浜从搿个水门进到城里，勿晓得啥个原因，呒没建造薛家浜出西城墙个水门，结果，薛家浜成为了一条“断头浜”，日积月累，“水无蓄泄，积聚秽浊”，成为了臭水浜。当时个地理先生又到处讲，薛家浜勒上海县城个东南方，关系到上海个“人文盛衰”，希望整治，地方政府伤透脑筋。有人建议勒西城墙增开薛家浜水门，恢复薛家浜原来个走向，有交关人反对，认为，当初勿开西城墙个薛家浜水门，也是地理先生讲个，现在增开，同样破坏风水，还要用脱交关铜钿，政府无可奈何，无所适从，只好造坝拦沙，再清理淤泥。用脱仔交关铜钿，薛家浜个淤塞问题还是没解决。
……
沧海桑田，薛家浜老里八早消失了，交关老地名也湮没了。近代以后，上海城市人口激增，出行个方式有了邪气大个变化，河道失去航运功能，管理又勿力，淤塞越来越严重，对环境搭生活侪勿利，健康搭安全侪有影响了。
于是，19世纪末20世纪初，上海出现了“填浜筑路”个高潮。
光绪三十二年（1906年），上海拿薛家浜个西段填脱筑路，地理先生认为，搿条勒上海城邑西南方向个薛家浜，关系到上海个“文运”；搿段薛家浜搭文庙又相近，就取名“尚文路”，两三年之后，增开尚文路城门，拨叫作“尚文门”，也叫“新西门”，就是现在个“小西门”。
几年之后，薛家浜分期填浜筑路，薛家浜原来个主流河道由东向西，大致浪相当于现在个油车码头街、薛家浜路、董家渡路（西段）、乔家浜路、凝和路（南段）搭仔尚文路。……现在个凝和路是薛家浜个一段，河浪向有座“人和桥”。
上海老城厢至少有700多年个历史了，一直是上海县治所在地，是历史浪上海个政治文化中心，交关物质个、非物质个遗产留下来了，有交关可歌可泣个事迹，也有交关有趣个故事。所谓“遗产”，就是祖宗留下来个物事，好比一个家庭处理祖浪留下来个遗产一样，勿可能侪保留，值铜钿个留下来，呒没用个厾脱；继承城市文化遗产，也同样应该去伪存真，取其精华，去其糟粕，侬认为呢？
作者：薛理勇
讲述：耕耘
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
联系客服
