上海老底子每天呈送精彩文章一组
打开尘封的记忆，寻觅往昔的岁月
叙上海老底子事 忆上海老底子人
诉上海老底子情
我的演艺生涯
作者：徐慧敏
改写、讲述：知足常乐
审阅、推荐：丁迪蒙
编辑：王乙其
唱堂会，也勿是啥个好生活。讲实在个，勒我个童年经历中，最勿愿意回忆个就是搿桩事体，因为伊带拨我个，勿是快乐搭仔自豪，而是屈辱搭仔勿平。尽管伊个辰光我还小，但也尝到了世态炎凉个味道。总归会得想，还勿如生勒平常百姓屋里个好。
记得有年冷天，寒风刺骨，市面萧条，路浪向行人邪气少。不过，与此相反个是歌台、酒榭、舞塲、饭馆却是邪气个闹猛。霓虹灯勒大放异彩，达官贵人个夜生活开始了。我搭大伯伯徐剑铭，互相搀牢仔勒北风呼啸个严寒当中，跌跌冲冲个朝杏花楼大酒楼走过去。今朝夜里向有富豪，要为伊个姨太太庆寿。我要演个是《三娘教子》当中个倚哥，搿只戏个另外只名字叫《双官诰》，是讲三娘教子出名了，后首来做了大官受封赐个故事。祝寿，一般总归欢喜点搿出戏，图个吉利。
我搭大伯伯匆匆忙忙赶到杏花楼个辰光，快轮到搿只戏上演了，我豪扫上好妆，着好自家个行头，却呒没想到搿家人家个小少爷，要客串演倚哥，硬劲命令我拿行头脱下来拨伊穿，闲话还老难听，骂我算个啥，敢来搭伊抢“角”，坏了伊白相票个雅兴。大伯伯搭仔管事个伯伯，横讲竖讲总算是平息了伊个怒气。我个心里却是充满委屈，我实在勿愿意拿我个行头拨伊穿，但是呒没办法，啥人叫阿拉穷呢?管事个伯伯偷偷叫搭我小声讲“就让伊演伐!铜钿照样拨侬”我生气个讲：“我呒没唱，覅铜钿。”管事伯伯拿我拉到台下头，指牢摆满酒宴拨工作人员吃个台子讲：“乖囡，天冷，去吃点伐”，我一看别个台子浪，坐满了珠光宝气有铜钿个太太、小姐、先生，还有勿少打扮得老阔气个小囡，伊拉侪对牢我做怪腔，有个大点个男小囡，跑到我面前阴阳怪气个讲：“喂！小戏子，侬想吃伐？搭我来唱一段……”我气得差眼眼泪水落下来，闲话一句也讲勿出来，快点奔到后台，寻到已经化好妆，要勒下出戏里演出个大伯伯讲：“阿拉回转去伐！”大伯伯晓得我受委屈了，豪扫安慰我：“等我唱好搿一出……”
搿就是旧社会，现在个演员，哪能晓得伊个辰光做演员个辛酸搭仔艰难啊？！
唱堂会，唱堂会，搿就是我一趟唱堂会个遭遇。当然，也勿是所有堂会得侪迭能样子个。也有好点个人家，起码可以待人客气点，尊重点。不过，闲话讲转来，勿客气、勿尊重又能哪能呢？勒旧社会，阿拉是穷唱戏个，还好讲啥个尊严搭人格呢？赚点外快再好弥补生活开支个勿足呀！总个来讲，唱堂会，实在勿是桩好差使。相声大师候宝林先生有两只段子：《关公战秦琼》《改行》，讲个就是当年艺人生活个写照
解放之后，搿种事体再也勿会发生了。只有社会主义制度再能真正提高演员个政治地位，社会地位搭经济地位。再勿会得有为了活命去唱戏个事，取而代之个，是为了弘扬祖国个文化艺术，保护国萃个繁荣，演员再可以理直气壮个勒舞台浪大显身手。
希望我写个搿些事体，多少可以拨现代锦衣玉食个幸福个儿童，有点教益搭仔啓示伐！
作者：徐慧敏
讲述：知足常乐
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
转自：“启迪心田沪语”公众号
联系客服
