上海老底子每天呈送精彩文章一组
打开尘封的记忆,寻觅往昔的岁月
叙上海老底子事 忆上海老底子人
诉上海老底子情
南昌路风情
作者:徐子亮
沪语改写、讲述:俞颖
指导推荐:丁迪蒙
编辑:王乙其
南昌路平行蜿蜒勒淮海路后头,东起重庆南路,西至襄阳南路,是一条勿起眼个小马路。南昌路虽然勿长,却勒勒弯来绕去当中匟勒交关老房子。伊眼老房子,有个囥勒弄堂里,走过弄堂口,看里向邪气深,还有点绿树掩映,勿显山勿露水,但颇有来历,是可以大做文章个;有个就勒沿马路,虽然经岁月个洗蚀显得破旧,但伊眼西式建筑个格局,宽阔个栏杆搭仔廊檐、拱形门庭,还含蓄个显露出昔日富华个痕迹。
二十年前,南昌路是少有行人搭仔车辆个。路两旁个梧桐树种得邪气密,到了夏天,繁茂个枝叶遮得一路清凉。近年来街面住宅陆陆续续地开出勿少小店。店小却邪气精致,有卖干花、工艺品、久久堂保健品、香薰精油个;有收购古董玉器字画个;也有画廊、音像店等,林林总总,大都数侪是一、两开间个门面。还有几家成衣店铺,铺了宽条地板个。店堂里大多数有一张小台子,几本时尚杂志摆放勒上头,一种居家休闲个气氛。走进迭能个小店拣衣裳,就像到邻舍好友屋里做人客一样适宜。好像晓得靠牢仔精彩个淮海中路,南昌路只是勒默默展示自己个一丝风韵。南昌路是内敛个,就像鲜墙房搿能个餐厅,开勒南昌路浪个窗门也是半关勒海,勿事张扬。只有到了夜里,街面停靠个汽车搭仔百叶窗里透出个灯光再展示了宾客盈门搭仔生意个兴隆。
最能显示南昌路风情个是伊眼从老房子里进进出出个女人了。勒南昌路个早浪搭仔上半日行走个,大多是伊眼上了岁数个女人。伊拉花白个头发是梳得一丝不乱个。衣裳整洁而服帖,有个式样虽然已经过时,但看得出料作是上承个,所以穿出来还是邪气体面。伊拉大多出来散步搭仔购物,有到农贸市场,也有到淮海路个食品店,手里拎了一、两只马夹袋,偶尔也有拎着上世纪六十年代流行款式个草包,走路是慢悠悠个。假使有老先生陪勒海,搿肯定是一位穿戴整齐的,皮鞋、外套都清清爽爽,相信就跟年轻辰光者去上班或约会一样地认真。南昌路个下半日,呒没早浪个繁忙搭仔傍晚个热闹,迭能个下午是清静的。勒勒迭能个下午,路浪会走过几个悠闲个女子。伊拉大多勿再年轻,但风韵犹存。伊拉穿着随意,但搿是一种有品位个随意,简约新潮个风格,是跟淮海路浪个美美百货矜持低调相一致个。
傍晚时分南昌路又闹猛起来,搿个辰光路浪走个女人当中多了一眼知识女性。伊拉穿了精心裁剪个职业套装,步履匆忙就搭上班一样,有个是到学校去接小囡,有个是去超市购物。迭个辰光勒伊拉手浪除脱仔上班带个各式拎包、手袋之外常庄多了一、二只马夹袋,搿基本浪是一家门个夜饭或早餐。搿能个女人是“上得厅堂,下得厨房”个。勒外面打拚了一天之后,还会得勒厨房间整理出一顿精致可口个夜饭来。暮色苍茫中假使侬走过南昌路,或许还会看见伊拉勒勒宽宽个廊檐下晾出带着清香个刚汰清爽个衣裳唻。
南昌路老少有穿了吊带裙个妙龄女郎走过,南昌路是属于积淀了岁月精华个有魔力个女人个。
假使侬勒上海长住,侬会慢慢叫个发现上海有交交关关像南昌路迭能风情独有个小马路,搿是一眼最有上海气质个马路。
讲述:俞颖
迪蒙,启迪蒙昧者也。上海市人。原上海大学中文系教师,多年来一直致力于沪语和海派文化的传承。
沪语是吴方言的代表方言,是吴侬软语的典范。她既可以用来拉家常,也同样可以用来朗读各类诗歌散文。
沪语完全可以书写,同粤语可以写作是一样的。本平台所有文章都是经过改写后,用沪语来演绎的,汉字书写也是正确的。
丁迪蒙所撰写的,与沪语相关的著作主要有:
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》,少儿出版社。
转自:“海上梦叠”公众号
联系客服