作者：王兴法
改写、 讲述:耕雲
审核、推荐：丁迪蒙
编辑：王乙其
讲起广播里向个经典节目，首推个是《评书连播》。沙场边关个刀光剑影，君臣将帅个运筹帷幄，才子佳人个爱情故事，市井百姓个嬉笑怒骂，通过电波传递到听众个耳朵边头，成为了寻常百姓勿需买票、用勿着出门，就可以一饱耳福个空中书场。
《评书连播》播出个内容大多数以百姓熟悉个古典小说为主，通过有名个评书表演艺术家绘声绘色、以声传神个生动演绎，带拨勒听众美妙个听觉享受。勿管是中央台还是地方台，《评书连播》侪成为了一档百姓喜闻乐见、收听率老高个节目。
大约摸1981年初，我踏上工作岗位半年之后，用了整整一个号头个工资买了只“红星牌”收音机，搿是我第一只收音机。《评书连播》成为了我茶余饭后个精神食粮，《三国演义》《隋唐演义》《岳飞传》《武松》等评书侪曾经拿我牢牢个吸引勒勒收音机个旁边。
搭原著相比，《评书连播》播出个内容既保留了原汁原味，又进行了大胆创新，说书人常庄增加了交关生动曲折个细节，而且，总归勒每回书个结尾设置了悬念，让人欲罢勿能，第二天还要千方百计抽出辰光接下去听。我记得比我小四岁个阿侄，一到节目开播辰光，也就老早坐勒收音机前头一道来听。听得津津有味呀！
后首来，《评书连播》播出个内容勿断扩展，还加入近代、现代个小说，并且播出形式勿断创新，延伸出了《小说连播》《广播连续剧》等节目。当年，由王刚演绎个《夜幕下个哈尔滨》就是通过《小说连播》节目一记头走红个。据讲，1982年王刚版个《夜幕下个哈尔滨》有108家电台播出，听众超过3个亿。
我听过个、印象最深个一部《广播连续剧》是《特殊身份个警官》。其中有迭能一个细节至今记忆犹新：打入国民党金山县警察局个地下党员毛福轩为了从局长骆百千伊面打听出敌人个行动消息，故意编了只故事，来证明东灵寺个签个灵验：伊有趟领了军饷，钞票勿晓得为啥呒没了，就去东灵寺求签，结果得了签诗：“无需东找又西寻，安安稳稳居仓亭”。原来，钞票是夹勒前几日阅读个《三国演义》“曹操仓亭破本初”一回里。由此，毛福轩得到了骆百千个信任，终于从伊嘴巴里向套出了当日个行动消息。勿久之前，我从网浪买来了1981年出版个搿本小说，重温当年《广播连续剧》惊险曲折、高潮迭起个精彩内容。
勿管是《评书连播》，还是《小说连播》《广播连续剧》，书里向个文字变成功电波送进了耳朵里，迭能介生动有趣个讲述，跌宕起伏个故事，勒伊个精神文化生活邪气贫乏个年代，无疑拨人带来了由“看”到“听”个全新个享受，成为了留存勒人们心中个时代经典，并延续至今。
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
转自：“启迪心田沪语”公众号
联系客服
