只有住勒此地、
再好看到爷爷个码头
来源:More城读
作者:董鸣亭
改写:边秦翌
讲述:牛美华
推荐:丁迪蒙
编辑:王乙其
(一)
引子
上海,是个充满美妙个矛盾搭仔奇异反差个国际大都会。
伊,有辰光有点俗艳,就像个苏北来个姑娘,虽然漂亮但也虚荣,上海迭个地方真个是蛮妖个,无论是阿里个苏北姑娘,伊讲一口标准个苏北闲话,辰光一长,伊就感觉老好个,认为自家是上海人了,认为苏北闲话就是上海闲话了,就像现在讲普通闲话就当做是沪语了。
大卫坐勒乍浦路桥个栏杆浪,讲仔口只有老上海人再会得讲个沪语,伊两只手臂膊抱勒胸口头,又细又长个两只脚像螺丝钉一样,叉勒海抖发抖发,摆出副上海男人个腔调——“老嘎嘎”个。
01 上海腔调
大卫是完全有资格摆“强调”个,伊勿单可以勒乍浦路桥搿搭数一数二个称为上海男人,就是勒全上海,伊也可以掼交关男人几条横马路。
虽然讲,伊勒国外生活了交关年数,但语境呒没改变,侪是一帮子80年代就从上海出去个人。伊个辰光,上海闲话个发音还分尖团音,一听就晓得侬是住勒虹口个还是黄浦个,或者是住勒南市个,甚至,虹口个发音也好听出来是住勒四川北路个还是住勒海宁路个。
大卫还是看勿惯上海人个劈硬柴,有本事叫大家一道吃饭,就要请人家吃最好个物事,除非请勿起人家,葛末索介就覅请了。
勿是吹牛噢,大卫从懂事体开始,就一直请朋友吃饭个,四川北路浪个几家饭店伊侪好闭仔眼睛摸到门口头,甚至,有得几家饭店还有伊专门个座位。
但是,大卫有辰光还是蛮低调个,特别是勒几个赤膊兄弟面前,伊从来勿掼所谓个“浪头”,因为,搿几个侪是知根知底个,从爷爷辈起就是知交了。
想到搿眼兄弟,大卫面孔浪露出了欣慰个笑容,伊又勒想夜到到阿里家饭店去吃饭了。
今朝,大卫就勒乍浦路桥浪等伊几个兄弟,伊要搭伊拉宣布一个重要消息……伊一面等,一面搭边浪几个拍照片个老男人讲闲话,老男人拉用一根不锈钢个杆子,夹仔手机勒拍太阳朝西移动个延时照片。
大卫最勿欢喜看搿眼老男人个样子,好像伊拉从来呒没看到过苏州河浪太阳升起来、落下去个样子。假使讲,一个上海人连得苏州河浪个太阳也呒没看到过,伊算啥个上海人啊?
02 往事如烟
70多年前头,大卫生勒四川北路浪个一栋花园洋房里,因为靠近景林堂,全家人侪信教,爷爷就搭伊起了迭个名字——大卫。
爷爷年轻辰光到上海来,搭几位同乡一道勒乍浦路桥个桥堍建了只码头,供四面八方来个舢板停靠,并勒苏州河边浪有只仓库,仓库里堆勒交关物事,吃个、着个、用个,样样啥侪有。所以,大卫是生勒一个衣食无忧个家庭里,从小受到家庭搭仔教会个影响:对身边个人好眼,大家侪是兄弟姊妹。可惜,好景勿长,大卫读小学个辰光,爷爷个码头拨公私合营了。
从大卫懂事体开始,伊就晓得自家有三兄弟,伊拉常庄勒一道白相个,到乍浦路桥浪乘乘风凉啊,开心辰光一道跳进苏州河里去游游泳啊,游到爷爷曾经个码头边浪,大卫就搭兄弟讲:迭只码头我早晏点要拿伊回来个。
实际浪,大卫讲搿句闲话个辰光是随口讲讲个,伊啥个也勿懂,只晓得后首来伊迓迓叫拿爷爷囥起来个“小黄鱼”到银行里去调成功人民币现钞,隔手请几个兄弟到“新亚饭店”吃饭,到国际电影院看电影,还帮阿国一道去追个女同学,伊认为,阿国个事体就是自家个事体。
作者:董鸣亭
讲述:牛美华
迪蒙,启迪蒙昧者也。上海市人。原上海大学中文系教师,多年来一直致力于沪语和海派文化的传承。
沪语是吴方言的代表方言,是吴侬软语的典范。她既可以用来拉家常,也同样可以用来朗读各类诗歌散文。
沪语完全可以书写,同粤语可以写作是一样的。本平台所有文章都是经过改写后,用沪语来演绎的,汉字书写也是正确的。
丁迪蒙所撰写的,与沪语相关的著作主要有:
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》,少儿出版社。
转自:“启迪心田沪语”公众号
联系客服