上海老底子每天呈送精彩文章一组
打开尘封的记忆，寻觅往昔的岁月
叙上海老底子事 忆上海老底子人
诉上海老底子情
演变当中个上海年俗
来源：夜光杯
作者：叶辛
改写、讲述：牛美华
推荐：丁迪蒙
编辑：王乙其
我搭上海相伴了整整七十多年，亲历了上海年俗个演变。
过年唻！今年个年俗肯定又要搭往年勿一样了。搿是左邻右舍勒电梯里、弄堂小区里碰着，必然要涉及个一只话题。
现在逢到过年，老人侪会得感叹，现在过年年味是逐渐淡了。再勿像老底子伊能，有介许多个规矩讲究，老多事体只是意思意思，走只过场。意思到最后，就勿知勿觉消失了。
勒我个青少年时代，过年是生活里向个一桩大事体。除脱家家户户要打扫卫生，屋里向要搭每个小囡准备新衣裳，小囡私底下头议论得最闹猛个，是年三十夜里，大人会得拨几化压岁钿；还勒猜，压岁钿是睏觉前头拨，还是等小囡睏着，再悄悄叫个塞到小囡个枕头底下，让小囡勒大年初一醒过来个辰光，就会有得惊喜。让小囡勒新个一年开始个辰光，就有个一切重新开始个心情。
也有小囡因为考试成绩差，或者是学堂里表现勿好吃批评了，甚至老师年终个品德评语直接指出了伊个各种勿足，除夕夜到呒没拿到压岁钿，心里想，今年是拿勿到奖励了。但是一觉醒来，意外个看到了压岁个红包，小囡必定会拿迭桩事体勒小朋友面前炫耀，还表示，勒新个一年里，一定勿会让家长失望。
勒一个家庭里，过年最大个事体，其实并勿是小囡看重个压岁钿，而是祭祀活动。过了腊八节，屋里向个老人就开始准备祭祀了。要买啥食品，是选择老母鸡，还是腊鸡？总而言之，鸡、鸭、鱼、肉四大样要备齐个，祖父祖母或者外公外婆当中个某一位，还会得提出，阿里个已逝个先人生前欢喜吃雀舌，天天夜到要咪口老酒，要拿伊欢喜吃个物事备齐，菜要炒得香，酒要选好眼个。小囡往往听了觉着好笑。所有准备个菜肴，到头来侪是屋里人欢天喜地吃脱个，偏生要借祖宗个名义，讲是为伊拉准备个。
记得是勒腊月廿四之后，各家各户根据商定个日脚，聚勒一道，举行祭拜老祖宗个活动。家家户户侪摆好供桌，供桌前头还有祖宗拉个一张张照片。有得刚刚懂事体个小小囡勿认得照片浪个人，大人就会得指牢告诉小囡，搿是太祖，搿是老外婆个姆妈，小小囡听勒海，巴瞪巴瞪个睁大眼睛点头。然后呢，大人先后勒供桌前头个坐垫浪邪气虔诚个跪下来，朝牢祖宗个照片磕头，膜拜。勿少人家还会得点起蜡烛、燃起香。大人头磕过了，会得让屋里从大到小每个小囡照牢仔做，认认真真个拿搿仪式做好。
祭典隆重个人家，往往是家境比较富足个，除脱供桌浪放满美味佳肴，会点大红蜡烛，老老粗个香，供桌浪罗列个饼、水果咾啥让人眼花缭乱。
勒我童年个记忆里，过年个祭祖是最热烈、最普遍个。到上世纪50年代末、60年代初，搿种年俗活动就勿知勿觉个淡化搭仔消失了。究其原因，一是碰到了三年困难时期，二是社会提倡“破旧立新”。破旧就是破除旧风俗、旧习惯，立新就是树立新风尚、新习俗。发展到后来个大破四旧，大立四新，上海过新年辰光个年俗活动，也就演变成一家门聚一聚，勒相互恭贺新年个闲话当中，缅怀一下记忆当中个老一辈人。
要是讲，改革开放之前，只是相约勒一家住房宽敞点个亲属屋里聚聚、讲讲闲话，到了改革开放初显成果个辰光，一家门个团聚就移到饭店酒楼里，变成功真正个欢乐聚会，迎接新年。
我搭上海整整相伴了七十多年，亲历了上海年俗个演变。但透过岁月个烟尘，我仍旧可以感觉到，年俗无论哪能变，有两样物事呒没变过。
一，是吃一顿个年俗勿曾变化，过再精简个年，还是要好好叫吃伊一顿个，对得起舌尖，对得起辛苦一年个身体。
两，是拨小囡个压岁钿，总归是挂勒老人个心头，临近过年了，想方设法也要拨小囡一点欣喜，毕竟，小囡是我伲未来个希望呀。
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
联系客服
